VOV4.Xơ Đăng - Xuân tung hâi lơ 9/11, Kuô̆k hô̆i pơtối tơpui ‘na mâu troăng hơlâ hbrâ mơdât pơreăng COVID-19. Mâu kăn mơnhên tối khât mâu tơdroăng pơkâ dêi Chin phuh tung hnoăng cheăng hbrâ mơdât pơreăng COVID-19 vâ hmâ rơkê tung tơdroăng cheăng nếo; mơ-eăm mơdêk tơpui tơno ‘na vaccine, pơkeăng pơlât. Laga, ai mâu kăn tối tiah kố: hnoăng cheăng tối tơbleăng tơdroăng pơreăng COVID-19, pơkâ thế hbrâ mơdât pơreăng a mâu kong pơlê tá hâi hlê plĕng, tơdroăng pơkâ mâu tơdroăng chêh pro hlá mơ-éa a mâu kong pơlê tá hâi môi tuăn, pro tơpá ăm tơdroăng ki prôk lăm, pơto chơ tơmeăm.

Hên mâu kăn pơkâ thế Chin phuh kal rĕng mơnhên tối mâu tơdroăng pơkâ pơtân ‘na tơdroăng ki hmâ ƀă rơkê, tơniăn, hbrâ mơdât tơƀrê pơreăng vâ ai tơdroăng ki ‘mâi rơnêu tơtro ƀă tơdroăng tung la ngiâ. Tối ‘na tơdroăng ki hriâm ing troăng hyôh internet tung pơla ai pơreăng COVID-19, ai mâu kăn tối, tơdroăng ki hriâm tung pơla ai pơreăng tâ tú rơ-iêo la ối ai hên tơdroăng ki teăm hâi tơtro khât tung tơdroăng hnê ƀă hriâm tá hâi hlo tơniăn; kế tơmeăm xúa tung hnê ƀă hriâm ối iâ, tơdroăng rak ngăn hok tro tá hâi tơƀrê.

Katarina Nga tơplôu ƀă tơbleăng