VOV4.Sêdang - Hâi lơ 27/10, kong pơlê Lâm Đồng pơtối châ hlo tơ’nôm 15 ngế tro tâ COVID-19, tung mê ai hên ngế tơdjâk troh tíu pơreăng ki nếo a tíu xiâm pơlê kong kơdrâm Đà Lạt. Tung kơxô̆ 15 ngế tro tâ COVID-19 nếo châ mơnhên, ai 7 ngế châ hlo a pơlê kong kơdrâm Đà Lạt, 6 ngế a tơring Đức Trọng ƀă 2 ngế a tơring Bảo Lâm. Krê mâu ngế nếo tro tâ a Đà Lạt pơrá tơdjâk troh tíu pơreăng ki nếo a kơtâu 31 troăng Nguyễn Công Trứ, bêng 8, pơlê kong kơdrâm Đà Lạt.

Đà Lạt: Hên F0 tơdjâk tíu pơreăng nếo

Nôkố tơdroăng kâng kơxái mơdât ôh tá ăm lo pa gong kơpong ai pơreăng, rah khăm ngăn, ti tăng mâu ngế tro tâ, klâ kơtăn mâu ngế ki ối achê ƀă mâu ngế tro tâ dế châ mâu khu cheăng dêi kong pơlê Lâm Đồng thăm pêi pro. Troh nôkố, kong pơlê Lâm Đồng châ hlo tâi tâng 505 ngế tro tâ COVID-19, tung mê 323 ngế hiăng châ pơlât prêi ƀă lo ing hngêi pơkeăng.

A Sa Ly tơplôu ƀă tơbleăng