VOV4.Sedang -  Kơxê lơ 9/5, jâ  H’Yim Kđoh, kăn phŏ hnê ngăn Vi ƀan kong pơlê Dak Lak tối, tung kong pơlê nếo ai tơ’nôm ngế dương tính ƀă virus SARS-CoV2, dế klâ krê ối tung hngêi tơchôam dêi kong pơlê, mơdêk kơxô̆ mơngế ki dương tính tung kong pơlê ai 2 ngế. Ngế ki mê cho Tr.M.T, kot mâ hơnăm 1998, kơxô̆ hngêi a 189/1/25 troăng Mai Hắc Đế, pơlê kong kơdrâm Ƀuôn Ma Thuột, cho F1 dêi ngế ki tro tâ tú kơxô̆ 3237 tơdjâk troh pơreăng ki tâ tú ing Đà Nẵng.

Rơxế pơto ngế ki tro pơreăng ing plơê kong kân Đà Nẵng vêh a pơlê kong kơdrâm Ƀuôn Ma Thuột

Nôkố, Dak Lak dế klâ krê a hngêi pơkeăng 16 ngế, 19 ngế dế klâ krê tơchoâm ƀă 904 ngế klâ krê a hngêi. Tơdjâk troh tíu tâ tú pơreăng kơxô̆ hngêi 189/1/25, troăng Mai Hắc Đế, bêng Tân Thành, kong pơlê Dak Lak hiăng klâ krê kơpong hơlâ troăng 189/1/25, vâ tí tăng 12 ngế F1 ƀă hrĭng ngế F2.

Kơvâ ngăn pơkeăng Dak Lak hiăng xo ngăn mơheăm dâng 180 ngế. Kong pơlê Dak Lak hiăng pơkâ thế hok tro râ mầm non tung pơlê kong kơdrâm Ƀuôn Ma Thuột pơtê hriâm tung pơla 1 măng tĭng.

Gương tơplôu ƀă tơbleăng