VOV4.Xơ Đăng - Sap ing mơ’nui khế 4 troh nôkố, kong pơlê Dak Lak hiăng tơdah lối 137 rơpâu ngế vêh sap ing mâu kong pơlê, pơlê kong kân peăng Hdroh. Rơtế ƀă mâu troăng hơlâ rêh ối ki hdrối tâ, kong pơlê dế xúa liăn ăm ing troăng hơlâ, kơjo kum ăm mâu ngế pêi cheăng nếo vêh vâ mung mơnhông cheăng kâ, tơniăn tơdroăng rêh ối a pơlê cheăm. Kố cho mâu ivá mơ-eăm tŏng kum kơhnâ, teăm tơdrêng dêi kuăn kuăn pơlê vâ tơkâ luâ xơpá tung pơla ai pơreăng.

Djâ dêi 3 to ro lăm kơ’nêi a tơbăng ăm rêi nhâ a thôn 6, cheăm Čư Kty, tơring Krông Bông, pôa Tăng Ngọc Thịnh, ăm ‘nâi, kơxô̆ ro mê nếo rôe kơtăn kố ai lối 1 khế ing kơxô̆ liăn mung dêi hngêi rak liăn kum mâu kơtiê. Apoăng hơnăm nah, prếi on veăng pôa lăm a kong pơlê Bình Dương pêi cheăng ukố umê vâ tăng tơ’nôm liăn. La pơreăng COVID -19 tâ tú rơ-iô, tơdroăng cheăng ôh tá tơniăn mê 6 khế kố nah, prế on veăng pôa thế vêh a pơlê tăng tơdroăng cheăng vâ rêh kâ.

Ôh tá ai tơnêi, ôh tá ai liăn pêi kâ, ôh tá châ Tôh kơdĭng liăn kum ƀă ôh tá ai liăn,  thôn hnê mơhno pro hlá mơ-éa ƀă châ mung  50 rơtuh liăn ing hngêi rak liăn kum mâu kơtiê ƀă khế hơnăm ăm mung ton tung pơla 10 hơnăm, liăn rơkâ 7,92% môi hơnăm la ôh tá êa kok tơmeăm khoăng.

Pôa Tăng Ngọc Thịnh ăm ‘nâi:

‘’Pơreăng tâ tú ó luâ râ ôh tá châ pêi cheăng xếo mê nếo vêh ai tơdroăng tŏng kum ing peăng khu ngăn mâu kơtiê ăm mung 50 rơtuh liăn rôe ro păn tơ’nôm. Á hlo tơdroăng kố tro khât, châ kum mâu ngế ki trâm xơpá môi tiah á’’.

Pôa Tăng Ngọc Thịnh xúa kơxô̆ liăn ki tŏng kum ăm mung vâ păn ro

Tung 2 khế kố nah, hiăng ai lối 20 rơpŏng kuăn pơlê a tơring Krông Bông ai ngế vêh ing mâu kong pơlê peăng Hdroh châ mung liăn ƀă kơxô̆ liăn mung lối 1 rơtal liăn. Kố cho môi tung mâu tơring ki apoăng a Dak Lak tơbleăng kơxô̆ liăn ăm mung kum mâu ngế pêi cheăng ki lo ing mâu kong pơlê vêh dêi a pơlê.

Pôa Nguyễn Tử Ân, Ngế pơkuâ Hngêi rak liăn kum mâu kơtiê kong pơlê Dak Lak ăm ‘nâi, tíu pêi cheăng hiăng hbrâ tơrŭm ƀă mâu kăn cheăm tơring tí tăng séa ngăn vâ ‘nâi mâu tơdroăng ăm mâu kuăn pơlê mung liăn vâ mơnhông cheăng kâ, rak tơniăn tung rêh ối a pơlê tơná. Hngêi rak liăn hiăng tối ăm tíu xiâm tơ’nôm liăn a kơxô̆ liăn 19 rơtal liăn ‘măn ăm mâu rơpŏng ki ai mơngế lo ing mâu kong pơlê vêh dêi a pơlê.

Teăng mâ Hngêi rak liăn kum mâu kơtiê séa ngăn tơdroăng ăm kuăn pơlê mung liăn

Tơdrêng amê, ƀă mâu rơpŏng ki kơtiê xơpá, tâng hiăng châ mung liăn, tíu pêi cheăng kô pơkâ khế hơnăm mung lơ ăm mung tơ’nôm vâ kuăn pơlê ai liăn pêi cheăng kâ.

‘’Vâi thế ai troăng rơhlâ ki nhên vâ pêi cheăng kâ a kong pơlê, malối vâi thế veăng a mâu tôh kơdĭng liăn, mung liăn dế ai a mâu tơring cheăm tung kong pơlê. A mâu tôh ki mê vâi kô hnê túa xúa liăn mung, túa pêi cheăng kâ tê mơdró tung tơdroăng a cheăm, tơring,  kong pơlê klêi kơ’nâi ton khế hơnăm ôh tá ối dêi a pơlê cheăm ƀă tối tơchoâm cho mâu rơpŏng ki mê thế xúa liăn mung pêi cheăng tro tơdroăng ƀă tung tơdroăng nếo nôkố vâ tơniăn ƀă pêi cheăng pơxúa tơ-ƀrê’’.  

Gương tơplôu ƀă tơbleăng