VOV4.Sêdang - Hâi lơ 19/8, a kong pơlê Dak Lak kơxô̆ mơngế tro tâ COVID-19 hên má môi sap ing ai pơreăng xông tâ tú a kong pơlê. Tung kơxô̆ 56 ngế châ hlo, ai troh 47 ngế tung 1 khu pơreăng tâ tú tung pơlê pơla. Tiô Khu pơkuâ ngăn pơkeăng ƀă khăm pơlât Dak Lak, khu tâ tú pơreăng nếo má môi dêi kong pơlê, châ hlo a ƀuôn Kwang A, cheăm Čư Pao, pơlê kong krâm Ƀuôn Hồ. Xêo troh kơxê măng ki mê, kơxô̆ mơngế tro tâ COVID-19 tung khu tâ tú pơreăng kố hiăng cho 46 ngế cho F0.

Test a Čư Bao

Pôa Nay Phi La, Kăn pơkuâ ngăn pơkeăng ƀă khăm pơlât kong pơlê Dak Lak tối, xiâm kối tâ tú a khu tâ tú pơreăng kố tá hâi nhên khât. Vâ mơnhên khât, kal ai tơ’nôm tơdroăng ‘na mâu ngế vê rơxế kân hiăng troh a nông trương Čư Pao. Xêo troh apoăng khế 7 kố, hiăng ai 6 tơring, pơlê krâm, pơlê kong kơdrâm a kong pơlê ai mâu khu râ tú pơreăng ing 10 ngế tơngi klêng. Tung mê, pơlê kong kơdrâm Ƀuôn Ma Thuột ai 2 khu tâ tú, tâi tâng 30 ngế. Pơlê kong kơdrâm Ƀuôn Hồ ƀă mâu tơring: Čư Kuin, Krông Bông, Krông Pač, M’Drak, rêm tơring ai 1 khu tâ tú, tâi tâng 155 ngế.

Kơnôm kâng kơxái ôh tá ăm mot lo kơpong ai pơreăng, ti tăng mơngế tro tâ pơreăng, khăm ngăn, ki hên mâu khu tâ tú pơreăng a Dak Lak hiăng châ mơdât klêi kơ’nâi 14 hâi mơdât ôh tá ăm mot lo pa kong.

A Sa Ly tơplôu ƀă tơbleăng