VOV4.Sêdang - Roh pơreăng COVID 19 tâ tú hneăng ki kố, Dak Lak cho tíu ki hên ngế rơhêng vâ ‘nâi plĕng a kơpong Tây Nguyên ƀă mâu ngế dương tĭnh xua tâ tú ing kong pơlê ki ê. Rơtế ƀă pơreăng xông tâ tú râ ó a Pơlê kong kân Hồ Chí Minh xua mê ôh tá krê to a Dak Lak mê mâu kong pơlê ki achê (tung mê ai kong pơlê Gia Lai) xuân pêi pro kơtăng tung hbrâ mơdât pơreăng.

Tơring Čư Pưh, kong pơlê Gia Lai cho tơring ki achê ƀă tíu ối dêi ngế ki tâ pơreăng kơxô̆ 7186 dêi kong pơlê Dak Lak. Tơdrêng mê, kong pơlê Gia Lai pơtối gak mơdât pơreăng a troăng kân 14, cho a Kông 110 ki achê ƀă kong pơlê Dak Lak,  mâu kơvâ cheăng mê cho “Kăn sát gak troăng prôk, khu séa ngăn troăng prôk, mâu ngế ngăn pơkeăng ... hiăng thế mâu rơxế tot vâ khăm ngăn châ chăn mơngế, tối tơbleăng inâi tíu ối tơná.

Tiô Dương Quốc Hiệu, ngế vê rơxế  a pơlê kân Đăk Đoa, tơring Đăk Đoa, ngế ki nếo lo ing pơlê kong kân Hồ Chí Minh prôk ngi Gia Lai tối, tơdroăng pêi pro tro ‘na tối tơbleăng tơná ăm mâu ngăn pơkeăng xuâ môi tiah mâu tơdroăng hbrâ mơdât pơreăng ăm mâu khu râ pơkuâ cheăng pro ngoh ƀă hên mâu ngế vế rơxế tâ hmiân tuăn tâ:

“Troh akố châ mâu vâi ngoh o peăng khu ngăn pơkeăng pơlât khăm ngăn hdrối vâ vêh a pơlê vâ tơniăn mê a hlo vâi ngoh o pêi pro tro. A lăm pá gong prôk drô troăng hlo tơdroăng hbrâ mơdât pơreăng dêi vâi ngoh o ki vê rơxế troăng hơngế châ tơniăn. Tơdroăng ‘na kâ ôu mê vâi ngoh o ki vê rơxế iâ châ trâm tơpui ƀă mâu ngế a pơlê, vâ tơniăn to tung rơxế tơniăn ăm vâi kơdrâi, vâi kuăn ƀă rơpŏng hngêi há’’.

Kring gak kơpong kuăn ôu kâ Ba Khía, cheăm Ea Wy, tơring Ea HLeo, kong pơlê Dak Lak

Ngoh Ksor Mướt, kăn ƀô̆ ngăn pơkeăng gak ngăn a tíu gak séa ngăn dêi Kông 110 - Troăng kân 14 tơkâ luâ kong pơlê Gia Lai ăm ‘nâi, pakĭng tơdroăng khŏm thế truâ kên pâng môh rơkong, khăm ngăn châ chăn ƀă xếo kŏng, xôh pơkeăng kơdê pơreăng, tâi tâng mâu ngế xuân thế tối tơbleăng tơdrăng tro inâi, tíu ối tơná ăm mâu ngăn pơkeăng, tối tŭm tâi tâng. Malối, cho tíu pơxiâm prôk, ƀă tíu ki vâ troh, ‘na ivá hôm ai tơdroăng châi ki lâi tung châ ki ai tơdjâk troh.  Mơhé vâ mơdoh chôu, la ngế ki lâi xuân pêi pro tro tiô pơkâ, hnê mơhno dêi khu râ kơvâ cheăng:

“Tâng tơngê, lơ tâ tung châ tơná nhôm ai tơdroăng châi ki tơviah thế klâ krê, tâng khăm ngăn châ hlo tiah hmâ mê thế kuăn pơlê tối inâi tíu ối tơná ăm khu ngăn pơkeăng klêi mê nếo prôk. Cheăm ki lâi, thôn ki lâi thế vêh tối tơbleăng ăm khu ngăn pơkeăng amê, ‘na mâu ngế ki lo ing ê vêh lơ lo ing Pơlê kong kân Hồ Chí Minh vêh mê khŏm thế tối tơbleăng inâi tíu ối tơná ăm khu ngăn pơkeăng”.

Tíu gak khăm ngăn mơdât pơreăng a pơla tíu tơkăng kong Dak Lak- Gia Lai

Troh nôkố, tâi tâng mâu ngế ki tơdjâk troh mơngế ki tâ pơreăng má 7186 a Dak Lak xuân ăm hlo mơheăm ki khăm ngăn âm tính rôh má 1 SARS - COV-2, laga ối pơtối klâ krê, séa ngăn. Ƀă mâu kong pơlê tung kơpong Tây Nguyên, malối cho tung pơla prôk drô troăng kân 14 (troăng kân Hồ Chí Minh) hiăng pơtê pơtân chơ tơmối. Mâu ngế ki ‘nâ ôh tá chiu vâ pêi pro tro tiô pơkâ mê hiăng tro mâu khu râ pơkuâ cheăng pơxâu phâk kơtăng. Mâu kăn ƀă kơvâ cheăng mâu kong pơlê tung kơpong đi đo tơrŭm krá vâ tơbleăng tơdrêng, kơtăng, vâ hbrâ mơdât pơreăng Covid-19 châ pêi tơ-brê má môi.

Hoàng Qui chêh

Gương tơplôu ƀă tơbleăng