VOV4.Sêdang - Hbrâ ăm roh pâk vaccine hbrâ mơdât COVID 19, kơxo lơ 22/4, Khu pơkuâ ngăn pơkeăng ƀă khăm pơlât kong pơlê Dak Lak hiăng tơkŭm hnê ƀă rak tơniăn tung tơdroăng pâk ăm 90 ngế kăn ƀô̆ khăm pơlât ối tung mâu Tíu xiâm khăm pơlât tơring, pơlê krâm, pơlê kong kơdrâm dêi kong pơlê. A lâm hnê mơhno, mâu ngế hriâm châ hnê mơhno pơkâ pêi, tơkŭm po tơdroăng pâk vaccine hbrâ mơdât COVID 19; tối ‘na vaccine COVID 19; hnê mơhno xúa, rah xo ahdrối vâ pâk vaccine COVID 19; hnê mơhno pơlât tâng châ ôh tá kâi trâng ƀă pơkeăng, rak tơniăn pâk ƀă séa ngăn klêi kơ’nâi pâk; mâu tơdroăng ki pâk chêh tơ’mot tung kơmăi điê̆n tưh.

Tíu hnê mơhno pâk pơkeăng vaccine COVID 19

Nôkố, Dak Lak hiăng tơdah 15.700 klŏng pơkeăng vaccine COVID 19 ƀă kô pâk ăm 3 khu ngế, tung mê, cho mâu ngế pêi cheăng a mâu hngêi pơkeăng, mâu ngế veăng hbrâ mơdât pơreăng ƀă Mô đô̆i gak kring tíu tơkăng kong, Kŏng an, Kơ koan xiâm xo hnoăng mơhá, Khu xiâm pơkuâ mô đô̆i kong pơlê sap hâi lơ 27/4 troh lơ 7/5.

A Sa Ly tơplôu ƀă tơbleăng