VOV4.Sêdang - Hlo ki ôh tá tơniăn dêi pơreăng COVID-19 dế xông tâ tú, vâ rak tơniăn ăm mâu ngế ki tamo châi, mâu ngế ki cheăng ‘na khăm pơlât ƀă pơlê pơla, kơvâ ngăn pơkeăng ƀă khăm pơlât Dak Lak dế tơbleăng mơdêk mâu troăng hơlâ hbrâ mơdât pơreăng COVID-19 xông tâ tú a mâu tíu khăm pơlât.

A hngêi pơkeăng kân kơpong Tây Nguyên, tơdroăng hbrâ mơdât pơreăng COVID 19 pơtối châ pêi pro, đi đo châ seá ngăn tiô pơkâ kơxô̆ 3088/QĐ-BYT dêi Khu xiâm ngăn pơkeăng ƀă khăm pơlât tơbleăng ‘na “Tơdroăng thế pêi Hngêi pơkeăng tơniăn, hbrâ mơdât COVID 19 ƀă mâu pơreăng troăng hiâm ki râ’’. Pơtối mê, vâ tơniăn pơkâ thế pêi “Hngêi pơkeăng tơniăn”, tơdroăng xing xoăng troăng prôk, mơjiâng troăng prôk krê kum ăm tơdroăng séa ngăn, rah xo mâu ngế ki tro tâ pơreăng châ rĕng pêi pro.

Tâi tâng rêm ngế mot tung hngêi pơkeăng pơrá thế pêi pro tối ƀă ƀok thái pơkeăng ƀă khăm ngăn ki tô tung châ. A bo hngêi pơkeăng ai kơƀăng chêh tơbleăng, ƀă mơngế tâ dêi tơná kơ-o, tơngê, lo têa môh, châi krôk, châi plâi nuih, ôh tá kâi hiâm, tơbrêi tơbrêh prôk troăng krê ƀă khăm a kơbong rah khăm mơngế nhôm tro tâ COVID 19 châ xing xoăng tíu a peăng bo cheăng, tơniăn ôh tá ăm mâu ngế nhôm tro tâ pơreăng châ mot tung hngêi pơkeăng.

Mâu ngế châi tamo, nhŏng o mơngế châi tamo drêng mot tung hngêi pơkeăng thế pêi tiô hnê mơhno xing xoăng troăng prôk dêi hngêi pơkeăng, klup rơkong môh, ôh tá kơchôu kơhêa hmâng vâ, ôh tá tơkŭm kơdrâm mơngế, ối kơtăn ki vâ iâ 2 met ƀă mơngế ki achê mê.

Tối ăm ƀok thái pơkeăng tơdroăng ivá a troăng mot hngêi pơkeăng kân kơpong Tây Nguyên

Tiô ƀok thái pơkeăng Võ Minh Thành, Kăn phŏ pơkuâ Hngêi pơkeăng kân kơpong Tây Nguyên, ƀă tơdroăng hbrâ kơtăng, xing xoăng hnoăng cheăng nhên rơtế mâu troăng pêi tơdâng tơ’mô ‘na tơdroăng pêi cheăng, pơkeăng, tơmeăm khăm pơlât, tơdroăng pơtâng tối, Hngêi pơkeăng đi đo hbrâ drêng ai tơdroăng, tơniăn ăm mâu ngế châi tamo, mâu ƀok thái pơkeăng, kơdroh kơlo ki tơdjâk dêi pơreăng troh tơdroăng pêi cheăng dêi hngêi pơkeăng.

“Sap ing ai ngế tro tâ pơreăng tung roh pơreăng xông tâ tú má 4 kố mê hngêi pơkeăng hiăng tơkŭm séa ngăn, pêi kơtăng tơdroăng hbrâ mơdât pơreăng. Troh nôkố tâi tâng mâu ngế tro tâ pơreăng troh khăm xuân môi tiah mơngế pa kong troh hngêi pơkeăng châ ngăn môi tiah cho F0. Xua mê thế rak tơniăn tơdroăng hbrâ mơdât pơreăng a kơlo ki kơtăng mê cho tối dêi tơdroăng tung châ ăm ƀok thái pơkeăng ƀă khăm ki tô tung châ ƀă tơkŭm pêi pro hbrâ mơdât pơreăng môi tiah klup rơkong môh, khăm ngăn ki tô tung châ ƀă ối kơtăn. Nôkố ngin pro hên tú mơdât sap ing ngế châi tamo mot hngêi pơkeăng ƀă rêm ngế châi tamo khăm pơlât bu ai môi ngế rak ngăn tê”.

Mâu ƀok thái pơkeăng gak a troăng prôk vâ khăm ngăn ki tô tung châ

Ƀă a Hngêi pơkeăng pơlât kơlo lo mơheăm ƀă châi xôu – tíu dế pơlât ăm 3 ngế tro tâ COVID 19 a Dak Lak, tơdroăng tơdah pêi pro kơtăng ‘na hbrâ mơdât pơreăng COVID 19 ing tơdah, pơlât mâu ngế châi tamo. Ƀă 3 ngế dế pơlât, hngêi pơkeăng hiăng xing xoăng 4 khu pêi cheăng teăng dêi pó, rêm khu pêi cheăng ai 1 ƀok thái pơkeăng, 2 ngế điêu dưỡng ƀă 1 ngế hô̆ lĭ.

Pơtối mê, khu pêi cheăng kô séa ngăn kơtăng sap ing ngế châi tamo mot a bo cheăng vâ xing xoăng troăng prôk, klâ kơtăn.

Rơtế amê, tơdroăng xôh pơkeăng kơdê pơreăng drô hngêi pơkeăng châ pêi pro đi đo, xôk châ hvât tro tíu, xôh pơkeăng tro tiô pơkâ. Hngêi pơkeăng xuân pêi pro kơtăng troăng pêi cheăng môi troăng tung khăm pơlât, ki nhên drêng kăn ƀô̆ ƀok thái pơkeăng mot tung kơbong krê vâ sâp ếo hbrâ mơdât pơreăng nếo tơkŭm po khăm pơlât, klêi khăm klêi mê troh kơbong ki ê vâ lêi ếo hbrâ mơdât pơreăng vâ pêi pro tiô pơkâ.

Ƀok thái pơkeăng Châu Đương, Kăn pơkuâ hngêi pơkeăng pơlât lo mơheăm ƀă Hngêi pơkeăng pơlât êi xôu kong pơlê Dak Lak tối ăm ‘nâi:

“Nôkố Hngêi pơkeăng hiăng xing xoăng kơpong, xing xoăng troăng prôk sap ing apoăng. Tâi tâng mâu ngế tamo châi, mâu ngế nhŏng o ki rak ngăn pơrá tối ăm ƀok thái pơkeăng khăm ngăn ƀă mah QRcode, klêi kơ’nâi khăm ngăn tâng tơ’lêi tâ tú mê ngin djâ mot kơbong khăm pơlât klêi mê krếo ƀok thái pơkeăng khăm ngăn inhên, tâng hlo tâ pơreăng mê ngin kô djâ tung kơpong klâ kơtăn klêi mê xo mơheăm vâ khăm nhên vâ tối mơnhên tơdroăng ki tro tâ pơreăng. Tâng dương tĭnh mê ngin djâ a kơpong pơlât, tâng âm tĭnh mê ngin xuân pơlât tơniăn klêi mê djâ a kơpong klâ kơtăn tơdjuôm vâ pơtối pêi pro klâ kơtăn’’.

Pôa Nay Phi La, Kăn pơkuâ ngăn pơkeăng ƀă khăm pơlât kong pơlê Dak Lak tối, vâ ví tơdroăng pơreăng xông tâ tú mâu khu pơkuâ ngăn pơkeăng ƀă khăm pơlât, Khu pơkuâ ngăn pơkeăng ƀă khăm pơlât kong pơlê hiăng pơlâ mâu Hngêi pơkeăng pơtôí pêi pro mơnhên Tơdroăng pơkâ thế pêi Hngêi pơkeăng tơniăn hbrâ mơdât pơreăng COVID 19 ƀă mâu pơreăng troăng hiâm ki râ tiô Pơkâ kơxô̆ 3088/QĐ-BYT hâi lơ 16/7/2020 dêi Khu xiâm ngăn pơkeăng ƀă khăm pơlât.

Pơtối pêi pro kơtăng mâu pơkâ ‘na rah xo, xing xoăng troăng prôk; tơniăn tơdroăng mơdât pơreăng tung hngêi pơkeăng, ôh tá ăm tá tú pơreăng a dêi pó tung hngêi pơkeăng. Mâu hngêi pơkeăng thế mơjiâng ƀă hbrâ tŭm khu pêi cheăng ki rĕng, xing xoăng tíu kơpong klâ kơtăn tiô pơkâ.

Pôa Nay Phi La tối ăm ‘nâi:

“Kơvâ khăm pơlât hiăng hnê mơhno ƀă mâu tíu cheăng cho thế mơjiâng tơdroăng krê ăm tíu pêi cheăng dêi tơná. má môi kô ai troăng klâ kơtăn rêm kơbong, lơ klâ kơtăn mâu toăng hngêi ƀă tơdroăng ki má mơ’nui cho lâp hngêi pơkeăng xua mê xuân pơkâ thế ai ngế pêi cheăng ƀă tơniăn tơdroăng khăm pơlât xuân môi tiah hbrâ mơdât pơreăng.

Akố pơkâ rêm Tíu xiâm khăm pơlât tơring xuân môi tiah mâu hngêi pơkeăng thế ai mơ-éa chêh inâi mâu ngế pêi cheăng tiô chôu vâ pro ti lâi ôh tá tơdjâk troh tơdroăng khăm pơlât, má péa nếo hbrâ tơmeăm khăm pơlât xuân môi tiah xing xoăng troăng prôk, tơdroăng khăm pơlât vâ kơdroh tâ tú pơreăng tung hngêi pơkeăng’’.

Nôkố, kong pơlê Dak Lak ai dâng 80 ngế dế klâ kơtăn a hngêi pơkeăng ƀă klâ tơchoâm, vâ chê 1.800 ngế klâ kơtăn a hngêi. Tơdroăng ti tăng mâu ngế tro tâ pơreăng, mơdât ôh tá ăm kơpong ai pơreăng, klâ kơtăng ƀă pơlât dế châ kơvâ khăm pơlât pêi pro kơtăn tơniăn, châ tơƀrê. Ƀă mâu tơdroăng mơ-eăm dêi kơvâ khăm pơlât ƀă tơdroăng ki kơtăng dêi kuăn pơlê tung pêi pro mâu pơkâ ‘na hbrâ mơdât pơreăng, Dak Lak kô rơtế lâp tơnêi têa tơdjuôm ivá troh mơdât pơreăng, rak vế ivá pơlê pơla.

Nam Trang chêh

A Sa Ly tơplôu ƀă tơbleăng