VOV4.Sêdang - Kơxo lơ 8/4, pôa Phạm Ngọc Nghị, kăn hnê ngăn kong pơlê Dak Lak pơkuâ po rôh hôp vâ séa ngăn, pơkâ tơleăng mâu tơdroăng ki ai tơdjâk troh chêh pro hlá mơéa ‘no liăn cheăng a mâu tơdroăng tơkêa a kong pơlê. A rôh hôp, khu ki ‘no liăn cheăng, teăng mâ mâu khu râ, kơvâ cheăng hiăng tối tơbleăng ‘na mâu tơdroăng ki xơpá, tơvâ tơvân tung tơdroăng ki pơkâ tơleăng mâu tơdroăng ki ai tơdjâk troh tung tơdroăng ki chêh pro hlá mơ-éa ‘no liăn cheăng a mâu tơdroăng tơkêa a kong pơlê, mê cho: Tơdroăng tơkêa klâ xoăng kơpong Tíu tơkŭm ôm hyô kong kế nhâ loăng, kơpong xah hêi ƀă plông ki ki xah golf Long Ea Nhaih; pơkâ mơ’no tơdroăng tơkêa Tíu xiâm Logistics kơpong Tây Nguyên dêi Khu Kŏng ti xiâm Tơlo liăn Bưu chính Viêttel.

Tâ tá rôh hôp

Tơpui mơgêi rôh hôp, pôa Phạm Ngọc Nghị, kăn hnê ngăn kong pơlê Dak Lak tối mâu tơdroăng ki xơpá, tơvâ tơvân ƀă mâu khu ki ‘no liăn cheăng. Tơdrêng amê hnối pơcháu ăm mâu khu râ, kơvâ cheăng, kong pơlê tơrŭm ƀă mâu tíu pêi cheăng ki ai tơdjâk troh séa ngăn, tơkŭm, pêi klêi mâu tơdroăng ki tối tơbleăng, tí tăng ‘nâi plĕng ‘na mâu hlá mơ-éa ki kal tiô pơkâ, rĕg pơtroh ăm Vi ƀan hnê ngăn kong pơlê séa ngăn, pơkâ tơleăng mâu tơdroăng ki tơvâ tơvân vâ rak tơniăn mâu tơdroăng tơkêa châ tơbleăng tơƀrê, veăng kum mơnhông cheăng kâ rêh ối pơlê pơla dêi kong pơlê.

Nga tơplôu ƀă tơbleăng