VOV4.Sêdang - Hâi lơ 28/10, Khu séa ngăn dêi Khu xiâm pơkuâ cheăng pêi – Mô đô̆i rong râ ƀă rêh ối pơlê pơla hiăng ai roh pêi cheăng ƀă Vi ƀan kong pơlê Dak Lak ‘na tơdroăng tŏng kum kuăn pơlê, khu tê mơdró, mơngế pêi cheăng ƀă mơngế xúa mơngế pêi cheăng trâm pá puât xua pơreăng kân COVID-19. Kăn teăng mâ Kơ koan xiâm pơkuâ tơdroăng cheăng pêi, Khu xiâm pơkuâ cheăng  pêi – Mô đô̆i rong râ ƀă Rêh ối pơlê pơla mơnhên hên troăng hơlâ a Dak Lak ối hrá pêi pro, ôh tá ai tơdroăng ki tơrŭm.

Pôa Vũ Trọng Bình, Kăn xiâm pơkuâ Kơ koan xiâm pơkuâ cheăng pêi, ối tung Khu xiâm pơkuâ cheăng pêi – Mô đô̆i rong râ ƀă rêh ối pơlê pơla xông tơpui a roh pêi cheăng

Pêi pro tiô Pơkâ 68 dêi Chin phuh, xêo troh hâi lơ 26/10, kong pơlê Dak Lak hiăng kĭ ăm vâ chê 3.000 ngế xúa mơngế pêi cheăng, dâng 55.000 ngế pêi cheăng châ xúa ƀă kơxô̆ liăn lối 29 rơtal liăn. Ing mê, hiăng chêl ăm tâi tâng mâu ngế pêi cheăng, dâng 48.000 ngế pêi cheăng ƀă lối 21 rơtal liăn. Môi khu troăng hơlâ kong pơlê Dak Lak hiăng pêi pro tơtro, laga, mâu khu troăng hơlâ hiăng kĭ laga tơdroăng chêl hnoăng liăn ối iâ môi tiah: Troăng hơlâ tŏng kum mơngế pêi cheăng ôh tá ai tơkêa pêi cheăng, hiăng kĭ ăm lối 9.400 ngế, laga nếo chêl hnoăng liăn châ dâng 3.000 ngế ƀă lối 3,8 rơtal liăn, kơxô̆ liăn chêl châ 35%.

Troăng hơlâ tŏng kum mơngế pêi cheăng pơtê pơtân pêi pro tơkêa pêi cheăng, pơtê cheăng ôh tá châ kâ liăn khế hiăng kĭ ăm 357 ngế, nếo chêl hnoăng liăn ăm 173 ngế, kơxô̆ liăn chê̆ châ 47%. Khu cheăng hiăng pơkâ thế kong pơlê Dak Lak kal ‘mâi rơnêu vâ teăm tơdrêng tŏng kum mơngế tro tơdjâk xua pơreăng COVID-19.

A Sa Ly tơplôu ƀă tơbleăng