VOV4.Sêdang - Nôkố, tung kong pơlê Dak Lak bu nếo ai 7 tung kơxô̆ lối 800 khu tê mơdró châ séa ngăn, hiăng mung châ kơxô̆ liăn kơjo tiô Pơkâ 68/NQCP ‘na troăng hơlâ tŏng kum mơngế pêi cheăng ƀă mơngế xúa mơngế pêi cheăng trâm pá xua pơreăng kân COVID-19. Xiâm kối cho mâu khu tê mơdró iâ nâp ƀaoh hiêm ăm mơngế pêi cheăng, môi tơdroăng ki pơklât vâ châ mung liăn. Ki nhên Dak Lak nếo ai 4 khu tê mơdró a pơlê kong kơdrâm Ƀuôn Ma Thuột ƀă 3 khu tê mơdró a tâi tâng mâu tơring, pơlê krâm châ mung liăn a Hngêi arak liăn kum rêh ối pơlê pơla kong pơlê ƀă tâi tâng kơxô̆ liăn cho 1.042 rơtuh liăn.

Kăn ƀô̆ ăm mung liăn dêi hngêi arak liăn hiăng châ achê 800 khu tê mơdró ai nâp ƀaoh hiêm pơlê pơla ăm mơngế pêi cheăng tung kong pơlê, ƀă hlo kơxô̆ mơngế pêi cheăng nâp ƀaoh hiêm pơlê pơla iâ tâng pơchông ƀă kơxô̆ mơngế pêi cheăng nôkố, chiâng pro kơxô̆ liăn châ mung tiô pơkâ xuân iâ.

A Sa Ly tơplôu ƀă tơbleăng