VOV4.Sedang - Tiô pôa Mai Đình Phong, kăn phŏ pơkuâ Seá ngăn – On tơhrik Dak Lak ăm ‘nâi, tung mâu hâi pơtê leh, tíu ki séa ngăn ăm hlo kĭ on tơhrik dêi môi khu mơdró kâ ki pro a Kơpong cheăng ƀă kơmăi kơmok Hòa Phú, pơlê kong kơdrâm Ƀuôn Ma Thuột hlo tâk hên, kơvâ on tơhrik hiăng séa ngăn, châ ‘nâi khu mơdró kâ kố krâ ‘măn kơmăi tĭnh ki xo liăn ôh tá xê khât, xúa on tơhrik ôh tá tro tơdroăng. Khu mơdró kâ kố hiăng tí tăng, pơxâu phak tâi tâng kơxô̆ liăn lối 70 rơtuh.

Khu tê mơdró krâ kơmăi a kơpong Hòa Phú

Xuân môi tiah tơdroăng ki lu lêa yă on tơhrik, nếo achê kố, môi khu mơdró kâ xiâm a Dak Lak hiăng pơxâu phak tâi tâng ai 285 rơtuh liăn. Riân sap ing apoăng hơnăm troh nôkố, lâp kong pơlê Dak Lak hiăng châ ‘nâi 882 ngế pro xôi tung tơdroăng ki xúa on tơhrik, ƀă tâi tâng kơxô̆ liăn pơxâu phâk vâ chê 950 rơtuh.

Pôa Mai Đình Phong ăm ‘nâi, mâu tơdroăng ki pro xôi ‘na xúa on tơhrik ôh tá tro tơdroăng pơkâ, ôh tá tro ƀă ivá ki krâ ‘măn, tong on tơhrik ƀă hên ki ê kô pro rơ-iô ăm ngế ki xúa xuân môi tiah ‘na tơdroăng ki tơniăn ăm tâi tâng.

Nga tơplôu ƀă tơbleăng