VOV4.Sêdang - Tơdroăng mơnhông ăm thế rêm ngế veăng châ rôe ƀaoh hiêm pơlê pơla ki mơhnŏng rôe xêh a tơring Lak, kong pơlê Dak Lak hiăng châ chiâng pêi pro mâu tơdroăng ki tơƀrê khât. Hên ngế kuăn pơlê hiăng  hơ’leh tuăn tơmiât ƀă pơxiâm tí tăng ‘nâi plĕng, veăng rôe ƀao hiêm pơlê pơla ki mơhnŏng rôe xêh châ tơniăn tuăn vâ khăm pơlât, ƀă xuân châ xúa ƀao hiêm pơlê pơla drêng hơnăm hiăng krâ.

Jâ Đào Thị Vượng, 66 hơnăm, pơlê kân Liên Sơn, tơring Lak hdrối nah pro cô, hơnăm 2010 jâ hiăng pơtê cheăng xua hơnăm hiăng krâ la xua hâi tŭm hơnăm pơkâ pơtê cheăng. Châ kăn ƀô̆ cheăng ƀaoh hiêm pơlê pơla tối thế pơtối nâp ƀaoh hiêm ki tơná vâ xêh vâ tŭm tiô khế hơnăm pơkâ vâ châ kâ liăn khế pơtê jâ hiăng vâ nâp.

Klêi kơ’nâi 5 hơnăm nâp ƀaoh hiêm ki vâ nâp xêh, ing hơnăm 2016 troh nôkố, rêm khế drêng hiăng ai liăn khế kâ drêng pơtê, cho kơxô̆ liăn ki châ xo vâ rêh kâ drêng hơnăm hiăng krâ. Pakĭng mê, drêng xo kâ liăn khế pơtê jâ ối châ ăm ƀaoh hiêm khăm pơlât ƀă kơlo ki ăm 95% kơxô̆ ăm drêng pơlât.

Jâ Vượng tối:

“Ing châ kâ liăn ki mê á tâ dêi tơdroăng rêh ối chía tơniăn, ôh tá tô tuăn hên ‘na hơnăm hiăng krâ, ôh tá kơnôm a kuăn ‘nĕng chê̆m mơ’drêh, drêng châi tamo hiăng ai ƀaoh hiêm khăm pơlât. Tơnêi têa tơmâng khât kơ mâu hơnăm hiăng krâ, á hlo tơdroăng pơkâ ăm kâ liăn tiah mê hiăng tro”.

Nâ Lương Thị Tường Thi châ kăn ƀô̆ Ƀaoh hiêm pơlê pơla tơring Lăk hnê tối veăng rôe ƀaoh hiêm ki tơná vâ rôe xêh

Nâ Lương Thị Tường Thi, 34 hơnăm, ối  a cheăm Dak Liêng ăm ‘nâi: Hdrối nah, nâ pêi cheăng a môi kŏng ti krê dêi mâu ngế ki kro mơdrŏng ƀă nâ hlối rôe ƀaoh hiêm pơlê pơla tiô tơdroăng ki pơklât thế rôe mê nâ hmôu tơmiât xêh bú to mâu ngế ki pêi cheăng a mâu kơ koan, khu mơdró tê nếo chiâng rôe ƀaoh hiêm pơlê pơla vâ ai liăn khế kâ drêng hơnăm hiăng krâ. Troh drêng nâ pơtê cheăng, châ kăn ƀô̆ ƀaoh hiêm pơlê pơla hnê tối mê nâ hiăng rôe ƀaoh hiêm pơlê pơla ki tơná vâ xêh.

Tiô nâ Thi, tơdroăng xo dêi môi iâ kơxô̆ liăn nâp ƀaoh hiêm ki tơná vâ xêh nôkố, ah kô kum ăm nâ ai liăn kâ dêi drêng hơnăm hiăng krâ hmiân tuăn iâ xua iâ hên xuân ai liăn khế kâ rêm hâi.

“Hlo mâu nâ mâu tăm ăm xo dêi liăn khế hơnăm hiăng krâ á púi vâ tâng dêi tơná hiăng krâ ah ôh tá ai ivá pêi cheăng xếo ôh tá kơnôm klâi hên a kuăn ‘nĕng á xuân ai liăn khế kâ rêm khế. Mơhé vâ pêi cheăng ki ôh tá pơklât thế, ôh tá xê pêi cheăng ăm tơnêi têa mê á xuân vâ tơná ai liăn khế kâ drêng hơnăm hiăng krâ. Teăng a tơdroăng pin kâ mơhrê mê pin ‘măn kơdĭng iâ nâp liăn vâ kâ drêng hơnăm hiăng krâ”.

Pôa Vũ Văn Hải, Ngế xiâm pơkuâ Ƀaoh hiêm pơlê pơla tơring Lak ăm ‘nâi, sap apoăng troh nôkố, tơring ai 25 ngế veăng rôe ƀaoh hiêm pơlê pơla ki tơná vâ rôe xêh, mơdêk kơxô̆ mơngế nâp ƀaoh hiêm pơlê pơla ki tơná vâ xêh a tơring kố tâk 530 ngế. Kơxô̆ ki kố ối iâ tâng vâ pơchông ƀă tơdroăng pơkâ.

Tiô pôa Hải pêi pro tro tơdroăng cheăng mơhnhôk mâu ngế veăng rôe ƀaoh hiêm ki tơná vâ xêh, tung mâu hơnăm hdrối kố nah, Ƀaoh hiêm pơlê pơla tơring pơtối mơdêk hnê tối ăm kuăn pơlê hlê ki pơxúa drêng veăng nâp ƀaoh hiêm pơlê pơla ki tơná vâ xêh.

Pakĭng mê mơdêk hnê tối ‘na luât ƀaoh hiêm pơlê pơla ki tơná vâ rôe xêh troh mâu cheăm, pơlê kân ki iâ mơngế rôe, tơrŭm krá ƀă mâu kơvâ cheăng, mâu khu tơrŭm cheăng khu grup cheăng kal kí, rêh ối pơlê pơla tơring po tơ’nôm hên hâi hôp tơpui hnê tối ăm pơlê a mâu pơlê ƀă hía hé.

“Ngin kô mơdêk rơdêi tơdroăng hnê tối tung hlá tơbeăng troh kuăn pơlê ƀă hên tơdroăng má môi cho ing mâu hlá tơbeăng, rơ’jiu um tơvi, má péa, ngin kô tơpui tơno tơdrêng ƀă kuăn pơlê. Ngin xuân dế pơkâ riân ngăn nếo tâi tâng mâu ngế ki rôe baoh hiêm xah hô̆i tơná vâ xêh mê ngin kô tơpui ƀă hên tơdroăng, ‘nâ hía ngin pêi hnoăng cheăng hnê tối a mâu tíu môi tiah a kơchơ lơ a Vi ƀan hnê ngăn mâu cheăm”.

Mâu tơdroăng mơ-eăm mơnhông mơdêk rôe bao hiêm pơlê pơla ki tơná vâ xêh a tơring Lak kơ pơtối rak vế ki tơ-ƀrê, veăng ‘no hnoăng tiô pơkâ ton hâi cho tâi tâng mâu ngế kuăn pơlê xuân châ kâ liăn khế hơnăm hiăng krâ ƀă châ khăm pơlât rak ngăn ivá drêng hiăng krâ.

Nam Trang chêh