VOV4.Sêdang - Pêi pro tơdroăng ki hnê mơhno dêi Grup pơkuâ on tơhrik Việt Nam ‘na tơdroăng ki kơdroh yă on tơhrik, liăn on tơhrik ăm mâu khu tơrŭm, mâu ngế krê ki tro tơdjâk xua pơreăng kân Covid-19, Kŏng ti on tơhrik Dak Lak tối tơbleăng chêh inâi mâu tíu ki ôm hyô, mâu tíu ki klâ ăm ối krê tơkŭm, tíu khăm pơlât ăm mâu ngế ki tâ pơreăng, hiăng tâ pơreăng vâ tŏng kum tiô pơkâ. Hâi khế tŏng kum kơdroh yă on tơhrik, liăn on tơhrik ăm mâu kuăn pơlê châ riân sap ing rôh ki chêh kơxô̆ kĭ on tơhrik khế 6 troh rôh chêh kĭ on tơhrik khế 12/2021.

Chêh inâi tơbleăng troh kuăn pơlê châ kơdroh nâp liăn on tơhrik

Tiô tối dêi Kŏng ti On tơhrik Dak Lak, tâi tâng kơxô̆ liăn tiô tối hdrối cho lối 5 rơtal liăn. Mâu tíu ối ôm hyô kô châ kơdroh sap ing kơlo on tơhrik ki riân on tơhrik tê mơdró chu ối a kơlo on tơhrik cheăng kâ. Ôh tá êa nâp liăn on tơhrik a mâu tíu ki dế pêi pro klâ ăm ối krê, khăm pơlât tơkŭm ăm mâu ngế ki nhôm tâ pơreăng, hiăng tâ pơreăng Covid-19; kơdroh 20% liăn on tơhrik ăm mâu tíu khăm pơlât dế châ xúa vâ khăm, séa ngăn mơheăm, pơlât mâu ngế ki tâ pơreăng, hiăng tâ pơreăng Covid-19.

Katarina Nga tơplôu ƀă tơbleăng