VOV4.Sêdang - Troh nôkố, ai lối 140 ngế, ối tung 47 rơpŏng a hơlâ 189/1 Mai Hắc Đế, bêng Tân Thành, pơlê kong kơdrâm Ƀuôn Ma Thuột, kong pơlê Dak Lak xuân ối tro mơdât prôk lăm xua ai 2 ngế a kơpong kố hiăng tro tâ pơreăng COVID-19. Kuăn pơlê akố hiăng châ vâi krâ-nhŏng o, khu pơkuâ ngăn tơdroăng cheăng veăng tŏng kum. Mê cho, mâu kơxâk phái, kơtâ í, plâi kơchâi, kum ăm vâi phâi tơniăn vâ rơtế ƀă khu pơkuâ veăng kâi tơplâ mơdât tơdroăng tâ tú dêi pơreăng.

Châ xo mâu tơmeăm hbru ăm a kơpong klâ krê, nâ Nguyễn Thị Lý (mung ối hngêi a hơlâ troăng 189/1 Mai Hắc Đế tối, nâ ing tơring Ea Kar lăm a pơlê kong kơdrâm Ƀuôn Ma Thuột mung ối pơtân hngêi vâ po tíu pêi cheăng bro rơnuâ xâk mâ,  pâk khŏng. Kơxô̆ liăn pêi lo rêm hâi bú tŭm vâ ăm prế kuăn nôu rêh kâ ƀă liăn ăm ki mung ối veăng mê rêm khế.

Kơmăng lơ 8/5 tâng tối a hơlâ troăng tơná ối ai mơngế tâ pơreăng COVID-19 nâ xuân tô tuăn. Laga, drêng châ tâng mâu kăn ƀô̆ bêng tơbleăng tối tơdroăng rak vế pêi pro mâu pơkâ ‘na hbrâ mơdât pơreăng, nâ tâ hmiân tuăn iâ ƀă loi khât a tơdroăng ki pơreăng tâ tú kô rĕng kâi châ mơdât. Mâu hâi ki rak vế pêi pro tiô pơkâ “klâ krê” nâ đi đo tơtrŏng tung mâu tơdroăng pơkâ ‘na hbrâ mơdât pơreăng ăm tơná ƀă mơngế ki ối tâ tá

Kơchâi drêh châ chơ troh vâ ăm mâu rơpŏng kuăn pơlê ki ối tung kơpong klâ krê

Mơhé ôh tá lăm la mâu hâi hdrối kố nah, ƀă tơdroăng mơ-eăm kơjo kum mâu khu tơrŭm cheăng, mâu ngế ƀă mâu kăn kong pơlê, tơdroăng rêh ối rêm hâi dêi péa kuăn nôu nâ đi đo tơtrŏng rak vế pêi pro mâu pơkâ, ‘na nâ hiăng chôa lâng tơniăn, ôh tá tô tuăn klâi ‘na kế kâ rêm hâi.

“Tung pơla klâ krê 21 hâi mê ngin xuân trâm iâ há tơdroăng pá la xuân ai mâu kăn bêng hiăng veăng kơjo kum hên. Ngin châ xo hmê ki pế ăm, phái ƀă hên tơmeăm kâ”.

Tung tâi tâng 47 rơpŏng kuăn pơlê rêh ối a hơlâ troăng 189/1 Mai Hắc Đế, ai 20 rơpŏng, ƀă 47 pơ’leăng mâ mơngế cho mâu ki mung ối hngêi pơtân a 4 toăng hngêi ăm ối pơtân. Ki hên mâu ngế ki mê ai tơdroăng cheăng ôh tá tơniăn, kơxô̆ liăn pê lo bú iâ mê tơdroăng rêh ối xơpá. Tíu ối tro klâ krê vâ hbrâ mơdât pơreăng, môi tiah tơdroăng ki vâi ôh tá châ prôk lăm, ôh tá ai liăn vâ rêh kâ rêm hâi.

Xua mê, ƀă vâi, mâu tơdrong tơxông kâ kơxo má, lơ mâu tơmeăm ki mâu ai tuăn hơ-ui veăng kum tung pơla kố cho kơnâ khât păng ‘nâng. Jâ Đặng Thị Liệu, kuăn pơlê ki mung ối veăng tung kơpong klâ krê tối, 3 hâi kố, ƀă tơdroăng veăng kum teăm tơdrêng dêi bêng, kong pơlê, rơpŏng hngêi á ôh tá tô tuăn tơdroăng ki ôh tá ai kế kâ rêm hâi. Jâ tâ tơtô tung hiâm mơno xua ai mâu ngế ki tuăn ‘nâi hơ-ui pâ dêi mâu vâi krâ nhŏng o veăng kum ngin ki ối tung kơpong klâ krê.

Phái, kế kâ diâp ăm a kŏng kuăn pơlê tung kơpong klâ krê

“Kơnôm tâi tâng mâu ki ai tuăn hơ-ui, khu grup, mâu kăn bêng kong pơlê veăng kum ngin tơkâ luâ tơdroăng tung pơla trâm pá kố. Ngin ôh tá ‘nâi tơpui klâi bú ‘nâi to mơnê kơ tâi tâng tŭm tơdroăng”.

Riân troh lơ 15/5, Vi ƀan bêng Tân Thành hiăng xo ai dâng 30 rơtuh liăn, 300 kĭ phái, 100 kơthung xup kơxŏng khăng, lối 2 tă kơchâi ƀă hên mâu tơmeăm ki kal xuá ki ê. Nâ Vũ Thị Mai Tuyên, Ngế pơkuâ chi hô̆i vâi kơdrâi tôh dân phô̆ 10, bêng Tân Thành tối, ing mâu tơmeăm ki mâu ngế ai tuăn hơ-ui pâ kum ăm, tung mâu hâi hdrối kố nah, Hô̆i ngin hiăng tơrŭm ƀă Vi ƀan hnê ngăn ƀă khu grup dêi bêng Tân Thành diâp ăm a kŏng mâu ngế kuăn pơlê mâu tơmeăm ki hbru ăm. Ngăn ki tơ mâu tơmeăm ki hiăng kơxu, Khu ngin kô mơhnhôk mâu ngế ki pleăng hnoăng tơná veăng klâ xoăng kơxu tâ lĕm vâ xĭng xoăng ăm mâu rơpŏng kuăn pơlê.

Ƀă mâu tơmeăm ki ối drêh môi tiah kơchâi rơpê, plâi pôm mâu ngế ki pleăng hnoăng cheăng kô xĭng xoăng hlối, mâu tơmeăm ki chiâng ‘măn ton mê vâi klâ kơxu klêi mê choâ xing xoăng ăm kuăn pơlê.

“Troh nôkố mâu rơpŏng kuăn pơlê xuân hiăng tơniăn tung rêh ối a kơpong ki klâ krê. Hâi pơkâ klâ krê 21 hâi mê kal ai rơtế veăng kum ing pơlê pơla veăng kum mâu kuăn pơlê ki ối a hơlâ troăng 189 mê. Ƀă hnoăng cheăng pêi dêi tơná mê ôh tá lôi rơpŏng ki lâi oh tá ai kế kâ môi tiah mâu phái hmê vâ kâ rêm hâi”.

Tơmeăm kế kâ châ klâ xĭng xoăng, tâ tung kơxu ăm mâu rơpŏng kuăn pơlê tung kơpong klâ krê

Tơdroăng tơmâng tŏng kum dêi mâu kăn bêng, kong pơlê, rơtế ƀă hên mâu ngế ki ai tuăn hơ-ui pâ hiăng kum ăm mâu kuăn pơlê ki rêh ối tung kơpong klâ krê tâ tơtô tung hiâm mơno. Ing mê, veăng tơ’nôm ivá rơdêi vâ tơkâ luâ tơdroăng pá tung rêh ối hlối rơtế ƀă dêi rơpó veăng plâ mơdât pơreăng.

Nam Trang chêh

Gương tơplôu ƀă tơbleăng