VOV4.Sêdang - Ƀă túa pơkâ “hồ sơ troh lâi pơkâ mơnhên pêi troh dâng mê”, kong pơlê Dak Lak dế mơ-eăm tối tơbleăng mâu troăng hơlâ tŏng kum khu mơdró kâ ƀă mâu ngế pêi cheăng trâm pá xua pơreăng kân COVID-19. Kơnôm tiah mê, troh nôkố hiăng ai vâ chê 3 rơpâu tíu pêi cheăng ƀă lối 50.500 ngế kuăn pơlê châ xúa mâu troăng hơlâ tiô pơkâ 68 dêi Chin phuh.

Klêi pro kêi mâu hồ sơ tiô hnê mơhno dêi kơ koan baoh hiêm pơlê pơla kong pơlê Dak Lak, kŏng ti veăng tơlo liăn pro meăm Đông Nam Á, a kơpong hngêi kơmăi Hòa Phú, pơlê kong kơdrâm Ƀuôn Ma Thuột, kong pơlê Dak Lak hiăng châ kơdroh vâ chê 200 rơtuh liăn. Kố cho kơxô̆ liăn vâ tơ’mô 0,5% kơlo nâp baoh hiêm  xâu trâm xía vâ tung pơla pêi cheăng, châi tamo xua tơdroăng cheăng ăm lối 600 ngế pêi cheăng tung pơla 1 hơnăm, riân sap ing khế 7 hơnăm kô ta troh 6 hơnăm la ngiâ.

Jâ LêThị Tuyết Hạ, Ngế phŏ pơkuâ Kŏng ti ăm ‘nâi, mơngế ôh tá hên la luât pơkâ tŏng kum mê cho tơdroăng ki mơhnhôk hơlêm ƀă tíu pêi cheăng tung pơla dế trâm xơpá nôkố.

‘’Tâi tâng liăn khế peăng kŏng ti ngin ai dâng 3 rơtal liăn môi khế, drêng châ kơdroh 0,5% mê ngăn vâ tơ’mô 15 rơtuh liăn môi khế. Nôkố liăn ki châ kơjo kum ing tơdroăng pơkâ 68  peăng kŏng ti hiăng tơbleăng hbrâ rôe tơmeăm xua tung pơlât, tơmeăm hbrâ mơdât pơreăng ƀă kum tơmâng khât tơdroăng rêh ối dêi mâu kăn ƀô̆ ki pêi cheăng tung kŏng ti, rôe tơmeăm xuân môi tiah mơdêk tŏng kum liăn rôe kế tơmeăm ăm kŏng ti tung pơla dế trâm xơpá tiah nôkố’’.

Ƀaoh hiêm pơlê pơla kong pơlê Dak Lak kum mơnhên ăm khu mơdró , mơngế pêi cheăng ki pơtê pơtân tơdroăng cheăng lơ pơtê ‘nâp liăn ƀaoh hiêm pơlê pơla vâ xua tơdroăng Pơkâ 68

Hlo pơreăng COVID-19 tâ tú rơ-iô rôh má pŭn, pơlê kong kơdrâm Ƀuôn Ma Thuột, kong pơlê Dak Lak hiăng hên hdrôh pêi pro ăm klâ krê, ối kơtăn pơlê pơla tiô pơkâ xô̆ 16 , 15 ƀă 15+. Hên tíu pêi cheăng khu mơdró thế pơtê pêi cheăng, pơtê pro tơmeăm khoăng, pơtê tê mơdró ‘na hía pơkâ troăng rơhlâ pêi pro tê mơdró ki tơtro vâ tơniăn tung hbrâ mơdât pơreăng. Tơdroăng cheăng ƀă xô̆ liăn pêi lo dêi mơngế pêi cheăng xuân tro tơdjâk há. Xiâm liăn ki tŏng kum ing pơkâ 68 hiăng kum mâu khu mơdró ai tơ’nôm liăn vâ kum kơjo ăm mâu ngế ki pêi cheăng, mơhnhôk hơlêm vâi hmiân tuăn mơ-eăm pêi cheăng.

Ngoh Trần Trung Tiến, ngế pêi cheăng a Kŏng ti pro meăm Thép Đông Nam Á, a kơpong hngêi kơmăi Hòa Phú, pơlê kong kơdrâm Ƀuôn Ma Thuột , kong pơlê Dak Lak ăm ‘nâi:

‘’Drêng pơreăng tâ tú rơ-iô mơhé vâ pêi pro ƀă ivá pêi cheăng rế chu kơdroh hên, mê kơxô̆ liăn pêi lo xuân chu kơdroh há. Laga khu kăn dêi kŏng ti tơmâng ngăn khât dêi mơngế ki pêi cheăng ƀă ai mâu troăng rơhlâ pơkâ. Má môi cho kơjo kum tơ’nôm mâu kế kâ tung pơla chôu pơtê iâ pơla pêi cheăng, kum tơ’nôm liăn trêng têa kơxăng rơxế kơtâu ƀă tơmâng khât troh mơngế pêi cheăng tăng mâu tíu ối, a hngêi pơtê pơto ki achê tâ, tơniăn tâ vâ mơngế pêi cheăng hlŭn ing kơpong rơ-iô, kơpong ai pơreăng ki dế tâ tú hên vâ vâi châ pêi cheăng tơniăn ăm kŏng ti’’.

Xiâm liăn tŏng kum ing Pơkâ 68 hiăng kum ăm mâu khu mơdró ai tơ’nôm liăn vâ tơmâng kum, veăng kum mơngế pêi cheăng, mơhnhôk hơlêm vâi hmiân tuăn pêi cheăng kâ

Tiô pôa Nguyễn Khắc Tuấn, Ngế xiâm pơkuâ ƀaoh hiêm pơlê pơla kong pơlê Dak Lak, pêi pro mâu tơdroăng pơkâ tŏng kum tiô pơkâ 68, ƀaoh hiêm pơlê pơla kong pơlê kơdroh kơlo nâp liăn ƀaoh hiêm ki hbrâ xâu lơ trâm xía vâ tung pơla pêi cheăng ƀă tơdroăng châi xua pêi cheăng ăm vâ chê 3 rơpâu khu mơdró ƀă mâu ngế ki xua mơngế pêi cheăng ƀă dâng 44 rơpâu ngế pêi cheăng. Tâi tâng xô̆ liăn kơdroh mê lối 13 rơtal liăn. Pơtê nâp liăn ‘măn xúa pơtê cheăng hiăng krâ ah ƀă liăn ko mơngế ki hlâ ăm 4 khu mơdró ƀă kơxô̆ liăn vâ chê 800 rơtuh liăn.

Tíu pêi cheăng xuân cho tíu xiâm mơnhên tối khu mơdró ƀă mơngế pêi cheăng pơtê cheăng xua tơdroăng pơreăng tâ tú lơ xua pơtê nâp ƀaoh hiêm pơlê pơla la ôh tá châ xua ƀaoh hiêm ki ôh tá ai cheăng pêi vâ kơjo kum ing tơdroăng Pơkâ 68. Troh nôkố, tơdroăng tơbleăng pơkâ 68 a tíu pêi cheăng hlo hlâu ƀă tơ’lêi tâ.

‘’Tung tơdroăng tối tơbleăng mê ngin hiăng môi tuăn   ing tiú xiâm tơnêi têa troh kong pơlê pêi pro tiô troăng rơhlâ dêi Chin phuh ƀă dêi mâu kăn kơvâ cheăng. Ƀaoh hiêm pơlê pơla Việt Nam hnê mơhno cho môi tung hâi ki thế mơnhên ăm mơngế pêi cheăng ƀă khu mơdró drêng ai tŭm hồ sơ mê krê to kơ koan ƀaoh hiêm pơlê pơla  Dak Lak, ngin hiăng hnê mơhno tung tâi tâng kơvâ cheăng drêng hồ sơ pơtroh ăm ƀaoh hiêm pơlê pơla  mê tung pơla 1 chôu thế mơnhên ăm khu mơdró vâ pro tơ’lêi hlâu má môi ăm khu mơdró ƀă mơngế pêi cheăng xúa tơdroăng pơkâ tŏng kum dêi pơkâ 68’’.

Pôa Nguyễn Quang Thuân, Ngế xiâm phŏ pơkuâ ngăn mô đô̆i rong- pơlê pơla dêi kong pơlê ăm ‘nâi, troh nôkố Dak Lak hiăng pêi châ 9/11 khu ki xiâm pơkâ tŏng kum tiô tơdroăng pơkâ 68. Tung mê, ai 3 khu tơdroăng pơkâ châ tơbleăng pêi cho kơdroh kơlo nâp ƀaoh hiêm xâu trâm xía vâ tung pơla pêi cheăng, châi tamo xua tơdroăng cheăng; tơdroăng pơkâ pơtê ‘nôi nâp liăn ‘măn kơdĭng xua pơtê cheăng ƀă liăn ko, pơkâ tŏng kum mâu ngế pêi cheăng ‘na ngê̆ thuâ̆t ƀă mâu ki cheăng a mâu tíu ôm hyô.

Nôkố Khu xiâm dế tơbleăng mâu troăng rơhlâ mơdêk hnê tối, tí tăng ‘nâi plĕng ăm Vi ƀan kong pơlê pơcháu hnoăng kĭ tŏng kum ăm Vi ƀan mâu tơring, pơlê kong kơdrâm ƀă pơlê kong krâm vâ tơniăn hâi khế, tơdroăng chêh ki kal ƀă tro mâu ngế ki xuá.

Pakĭng mê, Khu xiâm xuân ối mơjiâng mâu tôh pêi cheăng vâ séa ngăn, mơhnhôk pêi pro tơdroăng pơkâ 68 a tơring, cheăm.

“Vâ pêi tro tâ hnoăng cheăng mê tung la ngiâ mê Khu xiâm xuân hiăng pơkâ troăng rơhlâ tơpui tơno, tơrŭm ƀă Tíu pơkuâ ngăn tơdroăng pơtâng tối ‘na tơbleăng tung rơ’jiu, internet, mâu tíu pêi cheăng, kơvâ cheăng tơdjâk troh malối cho mâu tơring cheăng mơdêk hnê ăm mâu khu pơkâ tŏng kum ƀă mâu ngế vâ hbrâ tơniăn pro tro hồ sơ, tŏng kum tro mơngế, kuăn mơngế ƀă mơjiâng hnê mơhno ăm mâu khu pơkâ tŏng kum mê vâ ing mê kô mơdêk hnê tối ăm mâu ngế ki xúa hlê nhên mâu tơdroăng ki mê”.

Troăng rơhlâ pơkâ “Hồ sơ troh alâi tơleăng mơnhên klêi troh amê, ôh tá ăm kuăn pơlê ƀă khu mơdró thế tơkôm’’, nôkố rêm râ, kơvâ cheăng kong pơlê Dak Lak dế mơdêk hnoăng cheăng tơrŭm mơnhông mơdêk tơbleăng tăng, chêh inâi vâ pêi nhên tơdroăng tŏng kum ƀă mơngế pêi cheăng ƀă mâu ngế ki xúa mơngế pêi cheăng tiô pơkâ. Tơdroăng pơkâ tŏng kum thế tơniăn teăm tơdrêng, ăm tro mơngế, tơbleăng ăm hên ngế hlo ‘nâi, tơdrăng, pôi tá ăm ai tơdroăng ki ôh tá hriĕn vâ pro pơxuá ăm tơná ing tơdroăng pơkâ tŏng kum mê.

H’Xíu H’Mok

Gương tơplôu ƀă tơbleăng