VOV4.Sêdang - Xua tơdjâk dêi pơreăng kân COVID-19, hên khu mơdró kâ trâm tơdroăng pá athế pơtê pêi cheăng kâ, kơdroh mâu ngế pêi cheăng, thăm nếo pơtê pêi cheăng, tơdjâk a mê cho hên hĭn mâu ngế pêi cheăng a Dak Lak xuân hía tơdroăng cheăng pêi ƀă pêi lo liăn. Vâ mâu ngế ki kố kơdroh ki xơpá, Dak Lak hiăng pro tơ’lêi hlâu vâ mâu ngế ki pêi cheăng châ kâ liăn tŏng kum ôh tá ai cheăng pêi tiô túa ki tơxâng.

Râng dêi hlá mơ-éa hô sơ lăm a Tíu xiâm tăng cheăng pêi kong pơlê Dak Lak vâ pro mơ-éa pơkâ thế châ tŏng kum liăn ôh tá ai cheăng pêi, tơdrêng amê ti tăng cheăng pêi ki nếo, ngoh Trương Đức Dũng, ối a troăng Đào Duy Từ, bêng Thành Công, pơlê kong kơdrâm Ƀuôn Ma Thuột tối ăm ‘nâi: Hdrối nah, ngoh pro kŏng nhân pêi lo liăn châ dâng 6 rơtuh liăn/khế. Mâu tơdroăng tơdjâk ing roh pơreăng COVID 19 dêi hơnăm 2020 ƀă roh pơreăng xông tâ tú nôkố hiăng pro kŏng ti ôh tá ai liăn vâ pêi cheăng.

Ahdrối tăng cheăng pêi ki nếo, tơdroăng rêh ối rơpŏng hngêi kô kơnôm a kơxô̆ liăn ƀaoh hiêm ôh tá ai cheăng pêi ki tơná châ xo:

“Tung pơla pơreăng xông tâ tú ing hơnăm nah troh nôkố mê khu tê mơdró pơxiâm chu kơdroh ƀă ôh tá kâi pôu râng xua mê thế pơtê cheăng hơnăm kố. Á xuân pói vâ ti tăng châ tơdroăng cheăng nếo tơniăn tâ tung tơdroăng rêh ôí”.

Ngế pêi cheăng tăng cheăng pêi tŏng kum mơngế hía tơdroăng cheăng pêi pro mơ-éa vâ tơdah kơxô̆ liăn ôh tá ai cheăng pêi

Xuân ôh tá ai cheăng pêi ƀă vêh ing kong pơlê Khánh Hòa, ngoh Nguyễn Vũ Bốn, thôn 6, cheăm Ea Bhôk, tơring Čư Kuin xuân thâ lăm pro mơ-éa vâ châ xo liăn tŏng kum ôh tá ai cheăng pêi. Ngoh Bốn tối ăm ‘nâi, ngoh hiăng châ mâu ngế pêi cheăng dêi Tíu xiâm tăng cheăng pêi kong pơlê Dak Lak hnê mơhno nhên ‘na tơdroăng pro mơ-éa ƀă rĕng châ tơdah kơlo liăn tŏng kum ôh tá ai cheăng pêi lối 2 rơtuh liăn/môi khế. Ngoh Bốn tối, mơhé kơlo liăn kố iâ tâ tâng pơchông ƀă liăn khế, laga xuân kum rơpŏng tơkâ hluâ pá puât:

“Drêng pơreăng xông tâ tú tiah kố tá hâi tơdroăng cheăng nếo mê ƀaoh hiêm ôh tá ai cheăng pêi xuân kơdroh môi iâ ki pá puât. Tung la ngiâ á pói vâ tăng cheăng pêi achê hngêi, achê rơpŏng’’.

Pôa Nguyễn Văn Cường, Kăn phŏ pơkuâ Tíu xiâm tăng cheăng pêi, ối tung Khu pơkuâ cheăng pêi – Mô đô̆i rong ƀă pơlê pơla kong pơlê Dak Lak tối ăm ‘nâi, tung 5 khế apoăng hơnăm 2021, Dak Lak hiăng ai 3.365 ngế nâp hô sơ pơkâ thế chêl ăm kuăn ôh tá ai cheăng pêi. Krê khế 5 ai lối 1 rơpâu hô sơ, tâk 15% tâng pơchông ƀă hdrối. Tung mê, kơxô̆ mơngế pêi cheăng pa kong kong pơlê nâp hô sơ pơkâ thế châ xo dêi liăn ôh tá ai cheăng pêi châ 70%. Nôkố hiăng ai vâ chê 3 rơpâu ngế ai pơkâ tŏng kum liăn ôh tá ai cheăng pêi ƀă kơxô̆ liăn lối 45 rơtal liăn.

Rơtế ƀă tơdroăng chêl ăm kơxô̆ liăn ôh tá ai cheăng pêi, vâ kum mơngế pêi cheăng tơniăn tơdroăng rêh ối, Tíu xiâm ối thăm hnê mơhno, tơbleăng cheăng pêi, tŏng kum hriâm cheăng pêi. Kơnôm mê, tung khế 5 hiăng ai 89 ngế dế châ xo dêi liăn ôh tá ai cheăng pêi châ hriâm cheăng pêi tiô pơkâ, ƀă kơxô̆ liăn tŏng kum vâ chê 400 rơtuh liăn. Tíu xiâm xuân hiăng ai hên tơdroăng hnê mơhno tăng cheăng pêi, tơrŭm ƀă mâu khu tê mơdró vâ kum mâu ngế pêi cheăng rĕng tăng châ cheăng pêi.

Pôa Nguyễn Văn Cường tối ăm ‘nâi:

“ ‘Na tơdroăng tơbleăng cheăng pêi drêng ai pơreăng tơdjâk kân mâu tơdroăng môi tiah tơkŭm po mâu roh  tơpui tơno tăng cheăng pêi mâu tơdroăng tơkŭm kơdrâm mơngế mê Tíu xiâm ôh tá chiâng vâ pêi pro. Tíu xiâm bu tơkŭm hnê mơhno ing phôn râng kŏng ing Website, Facebook tê. Tíu xiâm tơpui ƀă khu tê mơdró, tơpui tăng cheăng pêi vâ vâi tơdjêp ing phôn râng kŏng lơ nâp hô sơ tơdrêng”.

Tơdroăng tŏng kum pro mâu mơ-éa ăm liăn ôh tá ai cheăng pêi teăm tơdrêng dêi kơ koan cheăng Dak Lak hiăng kum mơngế pêi cheăng hía cheăng pêi xua tơdjâk dêi pơreăng COVID 19 hmiân tuăn, pơtân tơkâ hluâ pá puât tơkôm roh tơ’lêi vâ tăng cheăng pêi ki nếo.

Nam Trang chêh

A Sa Ly tơplôu ƀă tơbleăng