VOV4.Sêdang - Tung mâu hâi pơla hdrối kố nah, kong pơlê Dak Lak tơkŭm po trâm mâ kuăn pơlê ƀă mâu ngế ki tơbriât vâ cheăng tung Hô̆i đong hnê ngăn kong pơlê hneăng má 10, hneăng hơnăm 2021 – 2026 a mâu tíu tâ phĭu a kong pơlê.

A mâu tíu trâm mâ, klêi tơmâng tối mâu tơdroăng vâ pêi pro ƀă tiô tối hdrối mâu tơdroăng pêi pro dêi tơrêm ngế ki vâ lo tơbriât pro kăn drêng hiăng châ rah xo pro kăn Hô̆i đong hnê ngăn kong pơlê hneăng 10, hneăng hơnăm 2021-2026, mâu kuăn pơlê hiăng tối tơdroăng púi vâ dêi tơná ƀă mâu ngế ki lo tơbriât, tơpui tối tơdrăng, môi tuăn mâu tơdroăng vâ tŭm péa pâ rơtế hmâng vâ ’nâi.

Tiô tối hdrối tơdroăng pêi pro, mâu ngế ki lo tơbriât pro kăn hiăng ngăn a tơdroăng cheăng nôkố vâ tối mâu troăng hơlâ pêi pro drêng châ rah xo pro kăn Hô̆i đong hnê ngăn kong pơlê, vâ veăng mơnhông cheăng kâ - rêh ối, pơtối rak vế ƀă mơdêk tơdroăng séa ngăn, tí tăng ngăn dêi Hô̆i đong, kring vế hnoăng ki pơxúa tơxâng dêi kuăn pơlê.

Rôh trâm mâ kuăn pơlê a bêng Tân Thành, pơlê kong kơdrâm Ƀuôn Ma Thuột

Tung mâu roh trâm mâ, tiô kuăn pơlê tối, mâu tơdroăng pêi pro ki vâ lo tơbriât tơkŭm pú hên ƀă mơhno hnoăng cheăng dêi mơngế ki teăng mâ ăm hnoăng pơxúa dêi kuăn pơlê. Laga, mâu tơdroăng pêi pro xuân ối pêi, tối tơchoâm, hâi tối ki xiâm khât, hâi tơbleăng troăng hơlâ pêi ki nhên khât vâ pêi tung tơdroăng tơleăng mơnhên mâu tơdroăng ki u ối, ki hâi pêi, ki pêi hâi teăm tro a mâu tơdroăng cheăng, kơvâ cheăng.

Nguyễn Quyền, kuăn pơlê ki ối a bêng Tân Thành, pơlê kong kơdrâm Ƀuôn Ma Thuột tối

“Mâu tơdroăng pêi pro dêi mâu ngế ki vâ lo tơbriât pro kăn pro ti lâi thế pro tro khât, tơpui hlối pêi. Mê hlo nôkố tơdroăng mê chêh tối hên la châ khât hâi pêi tro, hâi pêi tro tiô púi vâ dêi kuăn pơlê ngin. Xua mê, ngin hlo kô cho rôh ki thế pêi pro tro tuăn kuăn pơlê vâ pơla mâu kuăn pơlê ƀă mâu kăn ki teăng mâ ăm kuăn pơlê tối ƀă dêi rơpó mâu tơdroăng klâi ki pin kal thế pêi pro vâ mơjiâng tơnêi têa tro tiô luât rế ton rế xông rơdêi, mê cho tơdroăng púi vâ dêi kuăn pơlê”.

Kuăn pơlê tí tăng ‘nâi plĕng tơdroăng‘na rêh ối dêi ngế ki lo tơbriât vâ pro kăn

Kuăn pơlê xuân kơ-êng, tơpui tối tơdrăng ƀă mâu ngế ki vâ lo tơbriât pro kăn ‘na mâu tơdroăng tơdjâk troh kơvâ cheăng ki vâi dế pơkuâ pêi, malối tung tơdroăng ‘na mơjiâng tơmeăm khoăng, troăng prôk, mâu tơmeăm ki pơxúa ăm kuăn pơlê; mâu tơdroăng tơkêa bro châ tơbleăng, ‘no liăn pêi pro ƀă pêi klêi la ôh tá pơtối rak vế ki tơ-ƀrê, ôh tá pro pơxúa ăm kuăn pơlê. Kuăn pơlê pâ thế mâu ngế ki lo tơbriât pro kăn mê tâng châ rah xo pêi cheăng tung hneăng ki nếo thế tơmâng tơdroăng kuăn pơlê tối, malối tung mâu roh trâm mâ kuăn pơlê, ƀă tơbleăng nhên mâu tơdroăng pêi ôh tá xê pơtê to “tơhrâ tơpui to ƀă rơkong tê”.

Klêi tơpui tơno, mâu ki lo tơbriât pro kăn tối kô achê, tơmâng kuăn pơlê hnê tối vâ hnê mơhno tơleăng mơnhên lơ tối ăm mâu kơ koan râ kơpêng tơleăng mơnhên mâu tơdroăng ki kuăn pơlê púi vâ; pê klêi hnoăng cheăng dêi ngế ki teăng mâ dêi kuăn pơlê; Mâu tơdroăng hnê tối dêi kuăn pơlê cho tơdroăng ki kal vâ mâu ngế pơtối pê klêi tơdroăng cheăng tơná tung plâ tâ phĭu xuân môi tiah klêi hiăng chiâng ngế kăn teăng mâ Hô̆i đong hnê ngăn kong pơlê hneăng la ngiâ.

Jâ Vi Thị Kiều Chi, a tíu tâ phĭu kơxô̆ 1, pơlê kong kơdrâm Ƀuôn Ma Thuột ăm ‘nâi:

“Klêi tơmâng hnê tối dêi kuăn pơlê tơná jâ xuân hlo tung pơla pơtâp, tơdroăng cheăng tơná kal thế pơtối hriâm, hriâm hên tâ tí tăng ‘nâi plĕng mâu tơdroăng tung pơlê, ai ti mê ‘nôi nếo tơ-ƀrê tung pêi cheăng, tơdroăng pêi xuân môi tiah xo ah hmôi tâng châ rah xo pro kăn hnê ngăn Hô̆i đong kong pơlê mê xuân ngăn nhên dêi a tơná vâ pơtối hriâm ăm tơ-ƀrê tơdroăng cheăng pêi dêi tơná”.

A tíu tâ phĭu kơxô̆ 9, tơring Čư Kuin, mâu ngế ki lo tơbriât pro kăn hiăng trâm mâ kuăn pơlê ƀă lối 150 ngế kuăn pơlê teăng mâ ăm kuăn pơlê mâu cheăm Ea Wi  ƀă Ea Hu. Tơdroăng pêi pro dêi mâu ngế ki lo tơbriât tơkŭm a tơdroăng tí tăng’nâi plĕng mâu tơdroăng a pơlê cheăm vâ tơbleăng mâu troăng hơlâ pơtối rak vế ki rơdêi tung mơnhông cheăng kâ rêh ối vâ châ tơƀrê ƀă krá tơniăn, tung mê, tơkŭm hên a tơdroăng mơjiâng mâu kơpong pêi chiâk xúa kơmăi kơmok ki dâi lĕm; pơtối rak vế ki rơdêi dế tơrêm cheăm vâ mơjiâng tơmeăm pêi lo tiô troăng hơlâ “rêm cheăm môi tơmeăm”, mơ-eăm mơjiâng thôn pơlê nếo, pêi pro tro tơdroăng rak tơniăn pơlê pơla, malối tơdroăng xăm kơklêa kơdroh kơtiê, pêi cheăng krá tơniăn kal kí, tơniăn tung pơlê.

Hneăng hôp tơmâng xo tối 17 ngế tơbleăng ƀă 30 ngế veăng hnê tối, pâ thế. Tung mê, kuăn pơlê púi vâ mâu ngế ki lo tơbriât pro kăn tâng châ rah xo thế tơmâng pêi pro tro tơdroăng cheăng tơná; mơdêk hnoăng cheăng tơná cho ngế kăn Hô̆i đong hnê ngăn kong pơlê tung veăng mơjiâng mâu pơkâ ai tơ-ƀrê, tơtro ƀă tơdroăng ki ai khât nôkố a kong pơlê; pêi pro troăng hơlâ tơpui hlối pêi, tơmâng khât troh tơdroăng rêh ối dêi kuăn pơlê; mơ-eăm pê klêi mâu tơdroăng pơkâ mơnhông tơring Čư Kuin chiâng tơring ki xông tơ-ƀrê dêi tơring, kong pơlê.

Hneăng hôp vâ pro tơ’lêi hlâu ăm kuăn pơlê trâm mâ ƀă plĕng nhên mâu ngế ki lo tơbriât pro kăn, ing mê hbrâ rơnáu, rah xo, rah mâu ngế ki rơkê khât hlối kơhnâ ai tuăn mơno lĕm tơxâng vâ pro kăn hnê ngăn Hô̆i đong kong pơlê Dak Lak hneăng 10, hneăng hơnăm 2021-2026.

VOV Tây Nguyên chêh

Gương tơplôu ƀă tơbleăng