VOV4.Sêdang - Pêi pro tiô rơkong hnê thế tâi tâng kuăn pơlê veăng ‘no ivá mơno hbrâ, tơplâ, mơdât pơreăng COVID-19, rơtế ƀă lâp tơnêi têa, kuăn pơlê a kong pơlê Dak Lak xuân dế kơhnâ khât tung tơdroăng veăng tơlo liăn ngân, veăng kum vâ rôe vaccine ƀă mâu tơdroăng hbrâ, tơplâ, mơdât pơreăng. Hên khu râ, kơvâ cheăng, khu mơdró kâ ƀă kuăn pơlê, maluâ ối trâm hên tơdroăng ki xahpá tung pêi chiâk deăng, tê mơdró ƀă tơdroăng rêh ối la xuân ối hbrâ rơnáu vâ veăng ‘no dêi ivá, mơno xua vâ kum ăm kuăn pơlê.

Hơnăm rế hên ƀă hlối ôh tá hlê vâ xúa phôn râng kŏng, pôa Y Tuaih Niê, kuăn ngo Rơđế, ối a bêng Ea Tam, pơlê kong kơdrâm Ƀuôn Ma Thuột, kong pơlê Dak Lak hiăng thế dêi kuăn kơdrâi hnê vâ pơtroh môi tài khoăn liăn kum ki vâ  rôe vaccine hbrâ mơdât pơreăng COVID-19. Pôa Y Tuaih tối, ngăn tơdroăng chêh tơbleăng tung hlá tơbeăng, pôa ăm hlo ki rơ-iô dêi pơreăng ƀă ki pá puât dêi mâu ngế cheăng ngăn pơkeăng pơlât a tíu xiâm ki mơdât pơreăng.

Pôa xuân vâ veăng ‘no hnoăng tơná iâ vâ rơtế ƀă lâp tơnêi têa plâ mơdât pơreăng. 

“Tơlo liăn veăng rôe vaccine hbrâ mơdât pơreăng COVID-19 mê a hâk mơnê ƀă vâ môi tuăn. Xua tung mê xuân kal cho vâ kring vế ivá ƀă hbrâ mơdât pơreăng”.

Hên ngế, khu tơrŭm ƀă khu mơdró veăng tơlo liăn rôe pơkeăng vaccine ƀă rôe mâu tơmeăm vâ mơdât pơreăng kong pơlê Dak Lak

Ôh tá xê to nhắn tin veăng kum ing phôn râng kŏng, pôa Phan Quang Vũ, Kăn phŏ pơkuâ kŏng ti veăng tơlo liăn pro on tơhrik Ƀuôn Đôn, ăm ‘nâi, pêi pro tiô rơkong krếo thế dêi Vi ƀan Măt trâ̆n tơnêi têa Việt Nam kong pơlê Dak Lak, kŏng ti hiăng mơhnhôk tâi tâng mâu kăn ƀô̆ ki pêi cheăng veăng tơlo liăn châ 50 rơtuh liăn veăng kum hbrâ mơdât pơreăng.

“Pêi pro tiô tơdroăng krếo thế dêi lâp tơnei têa rơtế veăng pêi, ‘no ivá hbrâ mơdât pơreăng COVID-19 mê kŏng ti xuân hiăng mơhnhôk thế rêm ngế kăn ƀô̆  ki pêi cheăng veăng tơlo ki iâ gá 1 hâi liăn khế, ƀă krê kŏng ti a xo liăn ki ‘măn kơdĭng ƀă liăn krê dêi kong ti vâ veăng tơlo. Tiô tơdroăng hnê tối mâu kăn ƀô̆ mâu ngế pêi cheăng vâ môi tuăn veăng tơlo mê, ai hên ngế vâ veăng tơlo xêh tơ’nôm pakĭng tơdroăng pơkâ dêi kŏng ti. Xuân púi vâ pơreăng rĕng kâi mơdât, rêm ngế thế hlê plĕng vâ rĕng kâi châ mơdât pơreăng kố”.

Ôh tá xê to veăng tơlo liăn rôe vaccine, mê hên tíu pêi cheăng ối veăng ‘no hnoăng cheăng hbrâ mơdât pơreăng a kong pơlê

Tiô pôa Vũ Đình Tân, Ngế xiâm pơkuâ kŏng ti veăng tơlo liăn pro on tơhrik kơtâu ƀă khía Trung Nam Dak Lak, ôh tá xê bú nâp liăn veăng rôe vaccine,  Khu pơkuâ grup kô hiăng hnê mơhno ăm tíu pêi cheăng tung khu mơ-eăm veăng tơlo liăn hbrâ mơdât pơreăng a mâu kong pơlê tơleăng tơdroăng tơkêa bro. Krê to a Dak Lak Grup kố hiăng veăng tơlo 1 rơtal liăn vâ veăng kum kơxô̆ liăn rôe vaccine ƀă rôe tơmeăm hbrâ mơdât pơreăng:

“Ƀă Chin phuh mê hdrối kố nah Grup Trung Nam xuân hiăng veăng kum ăm Chin phuh 1 rơtuh dollars ‘na vaccine hbrâ mơdât pơreăng COVID-19. ‘Na  kong pơlê nôkố Grup xuân ai hnê mơhno ăm mâu kŏng ti tung khu thế ai hnoăng cheăng pêi, pakĭng veăng tơlo liăn rôe vaccine mê kŏng ti kô pơtối veăng tơlo”.

Tiô pôa Lê Xuân Sương, Kăn phŏ hnê ngăn Vi ƀan Măt trâ̆n tơnêi têa Việt Nam kong pơlê Dak Lak tối, bú kơ’nâi 1 măng tĭng pơtroh kơthô krếo thế mơhnhôk rôh lăm rôe pơkeăng hbrâ mơdât pơreăng COVID-19, tíu pêi cheăng hiăng tơdah xo lối 5,1 rơtal liăn ing mâu khu tơrŭm cheăng, mâu ngế khu mơdró veăng tơlo liăn, veăng kum. Ing kơxô̆ liăn veăng tơlo mê, kong pơlê kô pơkâ xĭng xoăng rôe vaccine rôe tơmeăm ki veăng kum hbrâ mơdât pơreăng.

“Drêng mơhnhôk mâu rôh tối tơchoâm veăng ai hên ngế tơlo. Mơhé tung pơla ai pơreăng tâ tú tơdroăng tê mơdró xơpá la ƀă hiâm tuăn xua kuăn pơlê, mâu khu mơdró, hngêi rak liăn, mâu ki ai tuăn hơ-ui ƀă mâu rơpŏng tê mơdró veăng tơlo liăn xuân môi tiah tơmeăm.

Pakĭng mê mâu khu râ kuăn pơlê, hên ngế vâi vâi kơtiê la vâi xuân veăng tơlo iâ kơxô̆ liăn pơtroh ăm kơpong ki tâ pơreăng, thăm nếo ôh tá ai liăn vâi ăm mâu tơmeăm ki ê”.

Tung rôh tâ tú pơreăng drêng kố, kong pơlê Dak Lak hiăng ai 4 ngế tâ pơreăng COVID-19. Mơhé dế trâm pá xua tơdjâk dêi pơreăng, la kuăn pơlê, khu mơdró a kong pơlê kố dế rơtế tơdjuôm ivá môi tuăn dêi rơpó veăng pêi pro mâu tơdroăng vâ rĕng kâi mơdât pơreăng.

H’Xíu H’Mok chêh

Gương tơplôu ƀă tơbleăng