VOV4.Sêdang - Kơhâi 31/5, Khu xiâm ngăn ‘na pơkeăng ƀă khăm pơlât hiăng tối pơt7âng ai tơ’nôm 1 ngế nếo a kong pơlê Dak Lak hiăng tâ pơreăng COVID-19, mê cho ngế ki tamo châi má 7186. Ngế ki kố ối a thôn 7, cheăm Čư̆ Mốt, tơring Ea Hleo, cho F1 dêi ngế ki tâ pơreăng a Pơlê kong kân Hồ Chí Minh. Drêng hlo ai tơdroăng xâu xía xua pơreăngu tâ tú, tơring Ea Hleo hiăng thâ pơkâ tơdroăng mơdât kuăn pơlê prôk lăm a kơpong ki mê. Klêi kơ’nâi 1 hâi, lôí 600 ngế ki ối achê, cho F1, F2 ƀă F3 xuân hiăng châ êng mơnhên tăng mơngế ki ối achê, ai 10 tíu ki mơdata prôk lăm. Klêi mê, hnối ăm kuăn pơlê klâ ối hơngế dêi pó, ôh tá chiâng ối tơkŭm, kơdrâm mơngế.

Pôa Nông Ngọc Thiết, Kăn hnê ngăn Vi ƀan cheăm Ea Wy, tíu ai mâu tíu ki tơdjâk troh ngế tro tâ pơreăng kơxô̆ 7186, tối ăm ‘nâi, sap ing 10h kơmăng lơ 30/5, khu cheăng cheăm hiăng pro tiú gak, mơdât ôh tá ăm mot mâu kơpong tíu tê mơdró Thanh Dậu, tíu tê mơdró ôu kơphế Cây Si, tiú tê mơdró ôu kâ 3 Khía, kơbong khăm pơlât Nha Khoa Việt Pháp 2, tơdrêng amê lăm ti tăng mâu ngế F1, F2:

“Ƀă mâu troăng pêi mê hiăng xêo châ 27 ngế cho F1, mâu ngế F2 xuân vâ chê 200 ngế. Ngin hiăng pêi pro 5 tíu gak a mâu kơpong ai ngế F0 prôk hluâ. Mâu tíu gak xuân hiăng tối tơbleăng tung loa. Ngin pêi pro ăm Hngêi pơkeăng cheăm pơtối ti tăng mâu ngế F1, F2 ƀă F3. ‘Na tơdroăng kố ngin krếo kuăn pơlê ‘nâi tŭm tơdroăng pơtối lăm tối tơbleăng ăm ƀok thái pơkeăng ‘nâi’’.

Kơpong gak mơdât pơreăng a thôn 6b cheăm Čư Mốt

Ƀă a cheăm Čư Mốt, tíu châ hlo ngế tro tâ COVID 19 kơxô̆ 7186, ing kơmăng lơ 30/5 troh nôkố khu râ kăn pơkuâ cheăm hiăng ti tăng ƀă djâ klâ kơtăn tơkŭm 15 ngế F1. 150 ngế F2 ƀă 180 ngế F3 xuân hiăng châ hnê mơhno klâ kơtăn. Cheăm xuân hiăng mơjiâng 5 tíu gâk a 3 thôn 6a, 6b ƀă thôn 7 ƀă 2.500 ngế kuăn pơlê. Pôa Võ Văn Lệ, Kăn phŏ hnê ngăn Vi ƀan cheăm Čư Mốt, tối ăm ‘nâi: rêm tíu gak mơdât, khu râ kăn pơkuâ cheăm hiăng xing xoăng 7 ngế ai khu lêng kuăn pơlê, đoân droh rơtăm, Khu pơkuâ vâi kơdrâi ƀă Kŏng an pơkuâ. Tơdroăng tŏng kum ăm kuăn pơlê tung kơpong, mơdât ôh tá ăm lo pa kong xuân châ cheăm tơmâng tŏng kum:

“Ngin pơcháu rêm tôh 2 ngế droh rơtăm ƀă kơdrâi drêng kuăn pơlê tung kơpong mơdât ôh tá ăm lo pakong ai kal ki klâi mê kô tơpui ƀă khu droh rơtăm ki pleăng hnoăng cheăng ngin kô lăm rôe ăm mâu tơmeăm ki kal dêi kuăn pơlê vâ xing xoăng ăm kuăn pơlê. Vi ƀan măt trâ̆n xuân kơbông krếo mơhnhôk kăn ƀô̆ pơkuâ xuân môi tiah mơngế cheăng tung cheăm veăng tơlo liăn ăm tơdroăng hbrâ mơdât pơreăng kố’’.

Kơpong mơdât ôh tá ăm lo pakong kơpong tê mơdró Ba Khía cheăm Ea Wy

Tiô pôa Nguyễn Văn Hà, Kăn hnê ngăn Vi ƀan tơring Ea Hleo, xêo troh 14 chôu hâi lơ 31/5, tơring hiăng ti tăng châ 62 ngế F1, lối 300 ngế F2. Nôkố tâi tâng mâu ngế F1 hiăng châ djâ a kơpong klâ kơtăn tơkŭm dêi kong pơlê a kơpong hngêi ăm hok tro, sinh viên ối hngêi trung Kao đăng Kŏng ngê̆ Tây Nguyên.

Klêi kơ’nâi khăm ngăn hiăng ai 47/62 ngế âm tĭnh roh má 1 ƀă SARS-CoV2. Sap ing 21 chôu hâi lơ 31/5 Vi ƀan tơring xuân hiăng pêi pro klâ kơtăn lâp pơlê pơla tiô pơkâ 15 dêi Ngế pro xiâm hnê ngăn Chin phuh ƀă pơlê kân Ea Drăng, cheăm Ea Wy.

Pôa Nguyễn Văn Hà mơnhên, khu râ kăn pơkuâ hiăng pơkâ pêi troăng tơniăn ai tŭm tơmeăm kâ kum ăm tơdroăng rêh ối ăm kuăn pơlê. Rơtế amê, Vi ƀan tơring hiăng xing xoăng hnoăng cheăng ăm rêm tíu cheăng ƀă pơkâ mâu khu cheăng thế pơxâu kơtăng mâu ngế pro xôi pơkâ klâ kơtăn:

“Khu pơkuâ ‘na mơhno túa lĕm tro ai hnoăng thế séa ngăn mâu kơvâ mơhno túa lĕm tro pơkuâ, Khu pơkuâ kăn ƀô̆ mê séa ngăn ‘na tơdroăng loi tĭng tiô khôp ƀă kŏng an mê séa ngăn mâu hngêi rơxế pơto chơ tơmối vêh. Ƀă mâu cheăm, mâu khu râ tâng lôi ai tơdroăng pro xôi mê hnoăng cheăng mê cho ngế ối a ko pôu. Ôh tá tơngôu laga thế ai tơmiât đi đo hbrâ rơnáu, thế krá chân’’.

Roh pơreăng COVID 19 xông tâ tú má 4 kố, Dak Lak hiăng châ hlo 4 ngế tro tâ pơreăng mê cho mâu ngế tro tâ pơreăng má 3237, 3334,3836 ƀă 7186. Kong pơlê kố xuân hiăng klâ kơtăn tơkŭm, klâ kơtăn a hngêi pơkeăng hrĭng ngế F1, klâ kơtăn a hngêi lối 5 rơpâu ngế ƀă lối 3 rơpâu ngế rêh ối tung kơpong mơdât ôh tá ăm lo pa kong.

Nam Trang chêh

A Sa Ly tơplôu ƀă tơbleăng