VOV4.Sêdang - Hnê tơdroăng ki tro ăm hok tro ing tơdroăng ăm vâi pơtâp tŏn chêng , tí tăng ‘nâi plĕng xêh, hriăn tăng ‘nâi ƀă tơbleăng ‘na khôi tuá, vêa vong ki lĕm tro dêi tơná tung mâu rôh koh hlá cờ apoăng măng tĭng. Kơ’nâi kố cho túa ki Hngêi trung râ má 2 Y Ngông Niê Kdăm a tơring Čư Mgar, kong pơlê Dak Lak dế pêi pro vâ mơhno ăm vâi o hok rế chôu vế ‘na khôi túa lĕm tro dêi kuăn ngo.

Tung pơla chôu pơtê lơ a mâu hâi mơ’nui măng tĭng, plông Hngêi trung râ má péa Y Ngông Niê Kdăm a pơlê kân Ea Pôč, tơring Čư̆ Mgar, kong pơlê Dak Lak mê tâng mâu idrâp chêng hơniâp ro. Vâ chê 2 hơnăm hdrối, idrâp chêng kơlá hiăng chiâng idrâp ki hmâ tâng ƀă mâu vâi hok tro. O H’Doen Ni Adrơng, lâm 7a1, ngế ki veăng tung khu chêng kố tối, kơnôm ing hriâm tŏn chêng ki a chôu pơtê mê hơniâp ro tâ, o ai hên tơdroăng ki nếo vâ tăng ‘nâi ƀă tơpui tơno ƀă mâu vâi pú. Sap ing mê o ai tơ’nôm tơdroăng ki hâk tơngăm ‘na khôi túa dêi hdroâng kuăn ngo pin ƀă păn roăng mâu tơdroăng ki tơchĕng tơmiât vâ pro cô vâ pơtối hnê ‘na khôi túa lĕm tro dêi mơngế Rơđế.

“Á rơhêng vâ veăng tŏn chêng koăng xua mê cho môi khôi túa lĕm tro dêi mơngế Rơđế mê á rơhêng vâ rak vế ƀă mơdêk. Tung pơla veăng ƀă mâu vâi pú tung hngêi trung, tung lâm mê á phiu ro khât. Sap ing hơnăm lâm 6 troh nôkô á hiăng tŏn chiâng 2 ƀai, xuân hiăng tŏn rơkê. Á rơhêng vâ xo ah hmôi xông kân mê chiâng môi ngế cô ki hnê vâ mâu vâi o chiâng tŏn chêng”.

Mơjiâng sap ing hơnăm hriâm hdrối, khu chêng kơlá hngêi trung râ má péa Y Ngông Niê Kdăm ai 12 ngế hok tro tá kơnốu ƀă kơdrâi ối khô̆i lâm 6,7. Kố cho mâu vâi o ki hâk vâ ƀă tơdroăng ki tŏn chêng. Hriâm tŏn tung pơla chôu lo pơtê hriâm, mâu vâi o châ vâi krâ hnê mâu ƀai chêng môi tiah “Pâ kong mêi”, “Krếo ôu drôu”, “Hâk phiu kâ báu nếo” ƀă hên ki ê.

Klêi mơ’nâi 3 khế hriâm tâp kơhnâ ƀă tơdroăng ki hâk vâ mê, mâu vâi o pơrá hiăng rơkê tŏn mâu ƀai chêng. O Võ Thanh Ngân, lâm 7a1, tối, khu ki veăng tŏn chêng ôh ti xê hâk ƀă tơdroăng ki hâk vâ ‘na khôi túa lĕm tro mê ối tơrŭm mâu vâi o pro ăm vâi hmâ tơdroăng ki lĕm tro tung hriâm:

“Á cho Xuăn hlo khôi túa lĕm tro dêi mơngế Rơđế gá hơniâp ro khât mê á hiăng veăng hriâm tâp. Tung pơla hriâm á hlo hâk vâ ƀă hơniâp ro drêng châ hriâm ƀă mâu vâi pú cho mơngế Rơđế. Ngin châ hriâm sap ing hơnăm lâm 6 nah troh nôkố, hmâ a hâi tơdrốu rêm măng tĭng ai hên mâu vâi pú lăm troh akố djâ dêi rơpó troh a hngêi khôi hmâ vâ hriâm tŏn chêng, ƀă mâu vâi pú ki ê troh akố cho vâ pơchuât mơ-éa”.

Mâu ngế tung khu tŏn chêng đi đo tơkŭm vâi o vâ hriâm mâu ƀai chêng

Rơtế ƀă tơdroăng ki rak vế khu chêng, Hngêi trung râ má péa Y Ngông Niê Kdăm ối tơkŭm po mâu rôh tơ’noăng ki ai tơdjâk troh tơdroăng ki rak vế khôi túa lĕm tro. Môi tiah tung rôh Tơbâ hâi Hnoăng cheăng Thái cô Việt Nam (20/11) kố nah, hngêi trung hiăng tơkŭm po rôh tơ’noăng pro kế tơmeăm khoăng ‘na khôi túa lĕm tro Rơđế ăm mâu thái cô ƀă hok tro. Ing mê, hiăng châ xo 54 to kế tơmeăm, khôi túa ton nah dêi mơngế Rơđế, môi tiah: ếo pơtâk tĕn, pong, jiâ, mơnĕng, tơdŭt, plôi, kơ’lêng ki vâ kơ’râu troh mâu tri trôu ƀă hên ki ê.

Nâ Nguyễn Thị Thúy Ngọc, cô ki pơkuâ khu chêng tối, sap ing rôh tơ’noăng, hngêi trung hiăng ai tơdroăng ki hơ’lêh túa ki koh hlá cơ apoăng măng tĭng, vâ vâi o hok tro tí tăng ‘nâi ƀă tối ‘na kế tơmeăm ki mâu vâi o hiăng pro chiâng mê. Ƀă túa ki hơ’leh kố, ôh ti xê to thái cô mê hok tro xuân ối pêi pro tro khât. Mâu vâi o tonôu, tối ‘na kế tơmeăm ki tơná pro ƀă 2 nâl Rơđế - Xuăn. Rơtế amê, mâu tơdroăng cheăng kố dêi hngêi trung châ mâu vâi o veăng kơhnâ tâ, tŭm tâ.

“Má môi cho ‘na hơdruê xoâng lơ mâu tơdroăng ki xah hêi pú hên, tơkŭm po hâi khôi hmâ cho tâi tâng mâu vâi pơrá xâp ếo pơtâk dêi hdroâng kuăn ngo Rơđế, lo a plông hngêi trung kơxuâng khu pú hên mê mâi vâi o hlo hâk tơngăm dêi mâu vâi o mê rế hên, mâu vâi o rế loi tơngah ƀă drêng lâi xuân êng cô hôm ai mâu rôh tơ’noăng ki lâi há ăm ngin o veăng tơ’noăng há”.

Hngêi khôi hmâ – Tíu ‘măn rak hlá mơ-éa châ pro tiô hngêi xŏn dêi mơngế Rơđế, ai kơbong pơchuât mơ-éa ăm hok tro pơchuât ki ôh ti xê tung chôu hriâm

Hơnăm hriâm kố, Hngêi trung râ má péa Y Ngông Niê Kdăm ai 11 to lâm ƀă 322 ngế hok tro, tung 95% cho hok tro hdroâng kuăn ngo Rơđế. Tung plông hngêi trung mơjiâng pro môi toăng hngêi khôi hmâ – Tíu ‘măn rak mơ-éa tiô túa hngêi ki xŏn môi tiah dêi mơngế Rơđế, châ pro a khế 8 hơnăm nah. Tung mê, tơbleăng mâu tơdroăng cheăng dêi hngêi trung ing mâu chal, mâu kế tơmeăm ‘na khôi túa lĕm tro ton nah dêi mơngế Rơđế ƀă ‘măn chôu mâu tơmeăm ki ‘măn mơ-éa châ ‘măn hên túa mơ-éa.

Kố cho tíu ki hâk vâ dêi hên ngế mâu vâi o hok tro, tíu mâu vâi o chiâng vâ pcơhuât mâu kơxop hlá mơéa ki tơná vâ lơ hriâm tâp tŏn chêng koăng ƀă tăng ‘nâi ‘na khôi túa lĕm tro hdroâng kuăn ngo Rơđế.

Thái Hoàng Long Điện, thái pơkuâ hngêi trung ăm ‘nâi, rơtế ƀă hnê hriâm ki tơdroăng ki hriâm rêm hâi, hngêi trung kô pơtối tơbleăng hên tơdroăng cheăng pêi pro tơtrro vâ hnê tơdroăng rêh ối, ƀă tơdroăng ki hâk vâ, rak vế khôi túa lĕm tro ƀă mâu vâi o hok tro.

“La ngiâ ah, hngêi trung kô pơkâ túa pơtối rak vế mâu tơdroăng cheăng kố, malối cho tơdroăng ki hnê hriâm pei pro ƀă khôi túa lĕm tro ton nah dêi mâu hdroâng kuăn ngo akố, môi tiah rak vế đô̆i tŏn chêng ƀă mơdêk tơ’nôm mâu tơdroăng cheăng pêi pro ki ê môi tiah veăng tơ’noăng, tăng ‘nâi, tối ƀă pro mâu kế tơmeăm mơhno túa lĕm tro dêi mơngế Rơđế ƀă po rơdâ mâu túa pơkâ. Kal athế pơtối po đi đo, ai mâu vâi o hiăng lo hngêi trung mê ai mâu vâi o nếo mot hriâm ƀă mâu vâi o nếo mot kô pơtối châ hriâm tâp ‘na tơdroăng ki kố’’.

Hnê hriâm tơdroăng rêh ối tơtro ƀă tơdroăng ki tăng ‘nâi rak vế khôi túa lĕm tro cho túa pêi ki tro ‘ló dêi Hngêi trung râ má péa Y Ngông Niê Kdăm. Mâu tơdoăng cheăng kố ôh ti xê pro tíu ki vâ hok tro xah hêi, mơnúa ngăn klêi kơ’nâi mâu chôu pơtê hriâm mê ối veăng kum păn roăng, ‘na tơdroăng ki hâk vâ ƀă khôi túa lĕm tro ton nah ƀă rơxông mâu vâi o hok tro.

H’Xíu HMok chêh

Katarina Nga tơplôu ƀă tơbleăng