VOV4.Sêdang - Tung roh pêi cheăng ƀă khu râ kăn pơkuâ Grup pơkuâ FLC, Khu pơkuâ cheăng Đảng kong pơlê Dak Lak hiăng môi tuăn troăng hơlâ mơ’no liăn cheăng tơdroăng tơkêa bro hên tơdroăng ôm hyô ngăn loăng pơlái kong kế, tíu xah hêi ƀă plông xah golf long têa Ea Nhaih a cheăm Čuôr Dăng, tơring Čư Mgar kân rơdâ vâ chê 200 ha.

A roh pêi cheăng, Kăn hnê ngăn Hô̆i đong pơkuâ Kŏng ti tơlo liăn cheăng Grup pơkuâ FLC mơnhên: Tơdroăng têa bro hên tơdroăng ôm hyô ngăn loăng pơlái, kong kế, kơpong xah hêi ƀa plông xah golf Ea Nhaih a cheăm Čuôr Dăng, tơring Čư Mgar drêng châ kong pơlê Dak Lak môi tuăn pêi pro troăng hơlâ mơ’no liăn cheăng, rơtế ƀă tơdroăng khŏm mơ-eăm veăng dêi khu cheăng kal kí, kŏng ti kô po rơdâ pơxiâm pêi pro a khế 9 hơnăm kố, tung ƀăng tơnêi 190 ha.

Dak Lak môi tuăn troăng hơlâ mơ’no liăn tơdroăng tơkêa bro hên tơdroăng ôm hyô Ea Nhaih 

Hâi khế pêi pro tung pơla 1 hơnăm kô kêi đeăng plông xah golf ƀă hrá  má môi 2 hơnăm kô kêi đeăng tâi tâng tơdroăng tơkêa bro. Kăn pơkuâ hnê ngăn cheăng Đảng kong pơlê Dak Lak môi tuăn troăng hơlâ mơ’no liăn dêi Grup pơkuâ FLC a kơpong long têa Ea Nhaih ƀă pơkâ Vi ƀan kong pơlê mơjiâng Khu hnê mơhno tơdrêng pêi cheăng ƀă tah lôi mâu tơdroăng pá puât, tơvâ tơvân ăm Kŏng ti tơlo liăn cheăng Grup pơkuâ FLC tung tơdroăng po rơdâ pêi pro tơdroăng tơkêa bro.

A Sa Ly tơplôu ƀă tơbleăng