VOV4.Sêdang - Kơxê lơ 26/5, pôa Nay Phi La, Kăn pơkuâ ngăn pơkeăng ƀă khăm pơlât kong pơlê Dak Lak tối ăm ‘nâi, ngế tro tâ COVID 19 má 3836 dế pơlât a hngêi pơkeăng pơlât kơ-o lo mơheăm ƀă châi xôu hiăng tơniăn prêi lĕm. Tŭm tơdroăng tung châ hiăng tơniăn, hiăng pơtê ‘mot mơheăm, kơdroh ôu pơkeăng tơniăn châ chăn. 

Dak Lak hiăng tơ’nôm 3 kơmăi hiâm tŏng kum hngêi pơkeăng pơlât kơ-o lo mơheăm ƀă êi xôi

Hâi lơ 27/5 ngế ki tro tâ pơreăng kố hiăng chiâng tah lôi kơmăi hiâm ƀă tiô tối hdrối tung 2 hâi la ngiâ kô ăm hiâm tiah hmâ. Ngế tro tâ pơreăng má 3836 châ Khu xiâm pơkuâ ngăn pơkeăng ƀă khăm pơlât mơnhên a hâi lơ 15/5/2021. Klêi kơ’nâi 8 hâi pơlât a hngêi pơkeăng pơlât kơ-o lo mơheăm ƀă êi xôu kong pơlê Dak Lak, ngế tro tâ pơreăng kố hiăng râ, ôh tá kâi hiâm, ôh tá tơniăn troăng mơheăm.

Ngế ki kố hiâm ƀă kơmăi, rak ki mơdât pơreăng. Drêng ai ngế tro tâ pơreăng, kơvâ khăm pơlât hiăng pơtroh kơmăi kơmok ƀă 3 ngế ƀok thái pơkeăng ing hngêi pơkeăng kân kơpong Tây Nguyên troh Hngêi pơkeăng pơlât kơ-o lo mơheăm ƀă êi xôu vâ pơlât păng ‘nâng.

A Sa Ly tơplôu ƀă tơbleăng