VOV4.Sêdang - Ƀă tơdroăng “Bâ eăng troăng pơlê”, lối chât km troăng kơpong tơkăng kong dêi kong pơlê Dak Lak hiăng châ krâ ‘măn pul on bâ eăng; pro tơ’lêi hlâu ăm kuăn pơlê prôk lăm ƀă veăng kum rak tơniăn tung kring vế, gak ngăn, tơniăn lĕm kơpong tơkăng kong.

Apoăng khế 3 hơnăm kố, kuăn pơlê a thôn 8, cheăm Ia Rvê, tơring Ea Sup, kong pơlê Dak Lak hâk phiu drêng troăng kân tung thôn châ krâ pul on tơhrik ăm bâ eăng troăng. Tâp trăng hnhâng troăng kơxái on tơhrik ăm “Bâ eăng troăng pơlê” a thôn 8 xŏn lối 1 km, ƀă 20 to trăng hnhâng on tơhrik bâ eăng, xúa on tơhrik kơtâu ing mâ hâi, tâi tâng kơxô̆ liăn ‘no mơjiâng pro 35 rơtuh liăn.

Kố cho tơdroăng pêi pro tung tơdroăng pơkâ “Khế pái tíu tơkăng kong” xua khu pơkuâ ngăn Đoân Droh ơtăm kong pơlê Dak Lak tơrŭm ƀă Khu pơkuâ ngăn Đoân Droh ơtăm kong pơlê Lâm Đồng tơbleăng mơjiâng pro a kơpong tơkăng kong dêi kong pơlê Dak Lak, tung mê,  Khu pơkuâ ngăn Đoân Droh rơtăm kong ơlê Lâm Đồng tŏng kum liăn rôe tơmeăm, mâu đoân viên, droh rơtăm ƀă kuăn pơlê a cheăm mê veăng pêi cheăng pro krâ ‘măn on.

Tơmeăm khoăng bâ eăng troăng pơlê a thôn 8, cheăm Ia Rvê, tơring Ea Sup xúa on tơhrik kơtâu ing mâ hâi

Pôa Phạm Hồng Lĩnh, kăn thôn 8, cheăm Ia Rvê, tơring Ea Súp tối, ing ai on tơhrik drô troăng, mâu tơdroăng cheăng dêi kuăn pơlê  tung thôn hiăng ro tâ, kuăn pơlê ngế ki lâi xuân ro ai on:

 “Hdrối nah, drêng hâi teăm ai on tơhrik drô troăng, prôk lăm xuân pá ‘nâng ‘na tơdroăng tí tăng kring vế tơniăn tung pơlê. Klêi hiăng pro on tơhrik drô troăng kố mê kuăn pơlê hiăng tâ hniâp ro, má môi ‘na tơdroăng ki rak tơniăn pơlơrơrêm hơlâ troăng, troăng pơlê, kuăn pơlê môi tuăn ƀă hâk vâ. Sap ai troăng kân lĕm, ai on tơhrik kuăn pơlê kơhnâ prôk chêng pơtâp ivá, ƀă kơmăng la lâi xuân troh 9h30 phut, ‘nâ troh 10 chôu nếo koi”.

Hdrối nah, sap ing mơ’nui hơnăm nah, a ƀuôn Drang Phôk, cheăm Krông Na, tơring Ƀuôn Đôn, troăng pơlê xuân châ tơbleăng mơjiâng pro xŏn 1 kmơdế ƀă 27 tíu tâp trăng krâ pul on. Pôa Y Chuôn ɃKrông, kuăn pơlê a ƀuôn Drang Phôk ăm ‘nâi, tơmeăm mơjiâng pro mê sap ing pro kêi ƀă hlối xúa troh nôkố hiăng pro pơxúa hên. Ai on troăng ôh tá tá xê to kum prôk lăm tơniăn a pơlê mê ối pro ăm troăng lĕm tâ, kuăn pơlê hiăng hlê ‘nâi rak vế tơmeăm khoăng tơchoâm.

“Tâi tâng kuăn pơlê ngế ki lâi xuân ro, xua ai on tơhrik bâ eăng, prôk kơmăng, drêng ai tơdroăng châi vâ lăm rôe pơkeăng lơ lăm pôu dêi rơpó hiăng ai bâ eăng drô troăng, kơdroh ki pá drêng prôk, mơnê hên ‘nâng”.

Kŏng ti ngăn On tơhrik Dak Lak veăng kum hnhâng kơxái, krâ pul on a mâu a ƀuôn Drang Phôk, cheăm Krông Na, tơring Ƀuôn Đôn

Troh nôkố a Dak Lak hiăng ai 8 to thôn, pơlê tíu tơkăng kong tơbleăng tâp trăng, hnhâng troăng kơxái krâ pul on tơhrik ăm bâ eăng pơlê, ƀă ai 13km troăng kân tung thôn châ krâ pul on. Tung kơxô̆ ki mê ai tơmeăm khoăng xua kŏng ti On tơhrik Dak Lak veăng kum, kăn ƀô̆ mâu lêng dêi mâu đông tơkăng kong tơrŭm veăng pêi. Mâu tơmeăm khoăng ki ê xua Khu pơkuâ ngăn Đoân Droh rơtăm kong pơlê Dak Lak mơhnhôk mâu kuăn pơlê veăng vâ ai on bâ eăng troh kuăn pơlê a kơpong tơkăng kong.

Ngoh Y Lê Pas Tơr, kăn phŏ hnê dêi khu pơkuâ ngăn Đoân Droh rơtăm kong pơlê Dak Lak ăm ‘nâi, sap hơnăm 2014 troh nôkố, tơmeăm khoăng mơjiâng pro on tơhrik trâ eăng troăng pơlê hiăng châ rêm râ khu pơkuâ ngăn Đoân Droh rơtăm a Dak lak tơbleăng pêi, ƀă hên túa pêi hên troăng. Mâu khu ngăn Đoân tơring ƀă Đoân cheăm hiăng mơhnhôk tăng liăn vâ tơmeăm mơjiâng pro, tơrŭm ƀă khu ngăn on tơhrik mâu tơring veăng mơjiâng pro, tâp trăng, krâ ‘măn pul on tơhrik a mâu thôn pơlê.

Tơdrêng amê, tung 2 hơnăm achê kố, Khu pơkuâ ngăn Đoân Droh rơtăm kong pơlê Dak Lak pơtối tơbleăng tơdroăng pêi pro trâ eăng troăng pơlê tíu tơkăng kong, tơkŭm tăng liăn ‘no mơjiâng pro troăng on bâ eăng a mâu troăng kân mâu thôn pơlê kơpong tíu tơkăng kong. Ki xiâm, troh hơnăm 2020 kô pro 20km troăng kân hlối ai on bâ eăng.

“Tâi tâng tá liăn tơmeăm khoăng xua kuăn pơlê veăng tơlo ‘no hnoăng pêi tâi. Ƀă la ngiâ ah Khu pơkuâ ngăn Đoân tối kô tâp trăng hnhâng kơxái krâ pul on tơhrik tá troh a troăng tơkăng kong hlối. Mê kố cho tơdroăng tơkêa dế pâ troăng hơlâ dêi rêm râ Đảng xuân môi tiah mơhnhôk tăng tơ’nôm liăn. Ƀă tơdroăng pro on bâ eăng troăng tơkăng kong kô ối pro xŏn tâ, tiô tối hdrối mơni kô pro dâng 20 km nếo tung pơla tâi hneăng hơnăm 2017-2022, mơ-eăm troh roh klêi hneăng, hdrối vâ po hneăng hôp Đoân Droh rơtăm râ kong pơlê kô pro klêi tơdroăng pơkâ mê ƀă vâ tối tơbleăng hdrối po hneăng hôp kân”.

Mâu tơmeăm khoăng mơjiâng pro bâ eăng troăng pơlê châ tơbleăng pro hiăng veăng kring vế tơniăn tung thôn pơlê, mơnhông tơdroăng rêh ối, tơmeăm khoăng, tuăn ngôa dêi kuăn pơlê a mâu kơpong ki ai troăng kân ai on bâ eăng. Ƀă kuăn pơlê ki rêh ối a kơpong tơkăng kong dêi kong pơlê Dak Lak, mâu tơmeăm khoăng mê hiăng pro pơxúa tơ-ƀrê khât, veăng hơ’leh ngiâ méa thôn pơlê, rak tơniăn pơlê pơla, tơniăn tung kơpong tíu tơkăng kong.

H’Xíu H’Mok chêh

Gương tơplôu ƀă tơbleăng