VOV4.Sêdang - Hâi lơ 16/4, Vi ƀan Tiú xiâm Măt trâ̆n Tơnêi têa Việt Nam kong pơlê Dak Lak tơkŭm po Rôh hôp tơkêa rôh má 3, tối tơbleăng klêi kơ’nâi tơkŭm po xo rơkong veăng tơpui tối ƀă pôk kăn dêi kuăn pơlê a tíu rêh ôí, môi tuăn ƀă inâi mâu ngế ki ai tŭm tơdroăng vâ pôk pro kăn Kuô̆k hô̆i hneăng má 15, ƀă ngế ki tơbriât vâ pro kăn Hô̆i đong hnê ngăn kuăn pơlê dêi kong pơlê, hơnăm 2021 – 2026.

Dak Lak pêi klêi Hneăng hôp tơkêa rôh má 3 

Tung mâu tơdroăng pơkâ, ing tơpui tơno, a rôh hôp tơkêa rôh má 3, mâu kăn hiăng têk kŏng môi tuăn chêh inâi 11 ngế châ veăng tơbriât cheăng tung Kuô̆k hô̆i hneăng má 15. Rôh hôp kố xuân hiăng môi tuăn inâi ƀă 125 ngế ki ai tŭm tơdroăng ki vâ cheăng tung Hô̆i đong hnê ngăn kuăn pơlê rêm râ, hơnăm 2021 – 2026 xing xoăng vêh cheăng a 20 tiú pôk vâ pôk 75 ngế kăn. Klêi kơ’nâi hôp tơkêa rôh má 3, Vi ƀan tâ phĭu kong pơlê Dak Lak kô pơtối pêi pro mâu rôh vâ mâu ngế ki tơbriât pêi pro mơhnhôk tâ phĭu, tối tơbleăng ƀă kuăn pơlê ‘na tơdroăng pêi pro dêi tơná.

Katarina Nga tơplôu ƀă tơbleăng