VOV4.Sedang - Tung Khế droh rơtăm hơnăm kố, khu rơxông nếo Dak Lak hiăng pêi pro châ 710 kế tơmeăm, xoăng cheăng tơbleăng ing hên tơdroăng, tơdroăng cheăng pêi pro ki ai pơxúa. Kố cho tơdroăng ki ăm ‘nâi châ mơ’no tối a Leh tơbleăng Khế droh rơtăm hơnăm 2021 xua Khu pơkuâ ngăn Đoân droh rơtăm Dak Lak tơkŭm po a kơxê lơ 15/4. Tơdroăng cheăng ki xiâm môi tiah tơkŭm po 346 rôh hnê tối ƀă tơdroăng cheăng ‘na rak vế kong prâi tơnêi tơníu, hbrâ mơdât mâu tơdroăng ki tơdjâk ‘mêi dêi xok chhá, hbrâ ví ƀă kong prâi pro hơ’leh, tơ’mot lối 20.700 ngế đoân viên droh rơtăm veăng pêi.

Khĕn kơdeăn ăm mâu khu pú hên ƀă mâu ngế krê ki kơhnâ rơkê

Rêm râ Đoân droh rơtăm hiăng ‘mâi rơnêu lối 25 km troăng mot tung thôn pơlê; pêi pro lối 20 km bâ eăng a troăng pơlê; tơkŭm po 10 rôh pleăng mơheăm, ing mê mơhnhôk châ vâ chê 3 rơpâu tơdrong mơheăm. Mâu tơdroăng cheăng tŏng kum droh rơtăm pơxiâm vâ pêi cheăng, mơnhông cheăng kâ châ tơtrŏng tơbleăng ƀă hên tơdroăng pêi pro, môi tiah: tơkŭm lăm ngăn hriâm tâp mâu túa pơkâ, tơbleăng mâu tơdroăng kal ‘na tơdroăng ki vâ pơxiâm cheăng, hnê mơhno, tiâ mơnhên ăm droh rơtăm mơjiâng tơdroăng tơkêa ƀă châ mung liăn vâ pơxiâm pêi cheăng.

Nga tơplôu ƀă tơplôu tơbleăng