.VOV4.Sêdang - Hâi lơ 19/5, Hô̆i đong đô̆i kong pơlê Dak Lak tơrŭm ƀă Hngêi mơhno túa lĕm tro vâi hdrêng phô̆m xông kân vâi hdrêng kong pơlê tơkŭm po phiu ro kêi đeăng kơdrum vâi hdrêng kong pơlê Dak Lak ƀă têa kơxĭ – rơlố Tơnêi têa. Mâu tơmeăm pro a Hngêi mơhno túa lĕm tro vâi hdrêng phô̆m xông kân vâi hdrêng kong pơlê, tá tơneăn pro kŭn mâu rơlố a rơlố Trường Sa.

Mâu ngế teăng mâ xup um tơbâ kơpong kơdrum vâi hdrêng ƀă têa kơxĭ rơlố tơnêi têa

A rêm tơneăn pơrá ai chêh tŭm ‘na inâi tơneăn, vih đô̆, kinh đô̆. Klêi môi khế pro ƀă kơxô̆ liăn pơlê pơla ing mâu tíu cheăng tŏng kum ƀă ing tơdroăng veăng tơlo dêi vâi hdrêng lâp kong pơlê ing tơdroăng pơkâ pêi kŭn, tơmeăm hiăng kêi đeăng, tâi tâng kơxô̆ liăn mơjiâng pro cho 170 rơtuh liăn.

Tơmeăm châ pro a Hngêi mơhno túa lĕm tro vâi hdrêng phôm xông kân vâi hdrêng kong pơlê Dak Lak

Kơpong kơdrum ôh tá xê to pro tíu ki lĕm mơnâ mâ ngăn tung kơdrum Hngêi mơhno túa lĕm tro vâi hdrêng phô̆m xông kân-vâi hdrêng kong pơlê, mê ối cho troăng vâ hnê hriâm ăm vâi hdrêng, ing mê kum hnê hriâm tơdroăng mơnhông hlê plĕng ăm mâu vâi o ‘na tơdroăng têa kơxĭ rơlố ƀă hnoăng pơkuâ tơnêi tíu, mơjiâng tơdroăng nhuô̆m pâ pơlê xiâm, mơdêk pôu râng hnoăng cheăng dêi rơxông ối nếo vâi hdrêng tung mơjiâng ƀă gak kring tơnêi têa.

A Sa Ly tơplôu ƀă tơbleăng