VOV4.Sêdang - Klêi kơ’nâi mâu F1 hiăng 3 hdroh séa ngăn âm tính ƀă virus SARS - CoV-2, lối 140 ngế kuăn pơlê a kơpong ki tro mơdât mot lo mê xuân hiăng ăm’nâi 2 hdroh séa ngăn âm tính, măng tĭng hdrối nah, Vi ƀan hnê ngăn kong pơlê Dak Lak hiăng pơkâ thế tah lôi tơdroăng ki prôk lăm, mot lo ƀă kơpong kăn pơlê rêh ối a hơlâ 189/1 troăng Mai Hắc Đế, bêng Tân Thành, pơlê kong kơdrâm Ƀuôn Ma Thuột, kong pơlê DakLak, tíu ki ai 2 ngế tâ COVID-19. Phiu ro xua hiăng châ tah lôi tơdroăng ki mơdât prôk lăm la, kuăn pơlê pôi tá tơngôu ƀă hnoăng hbrâ mơdât pơreăng COVID-19.

Hdrối vâ tah lôi tơdroăng mơdât ôh tá ăm lo pa kong, mâu kăn ƀô̆ ƀok thái pơkeăng xâp ếo ki hbrâ mơdât pơreăng hiăng xôh pơkeăng roh má mơ’nui a kơong kuăn pơlê rêh ối a kơtâu 189/1 troăng Mai Hắc Đế, bêng Tân Thành, pơlê kong kơdrâm Buôn Ma Thuột, tíu ai 2 ngế tro tâ pơreăng COVID 19. Kơ’nâi mê, tâi tâng kế ki tât hiăng châ tah lôi.

Khu râ kăn pơkuâ Vi ƀan bêng Tân Thành pơchuât pơkâ tah lôi mơdât ôh tá ăm lo pa kong ƀă diâp mơ-éa mơnhên hiăng kêi đeăng hâi khế klâ kơtăn ƀă lối 100 ngế kuăn pơlê. Tơdah mơ-éa mơnhên, pôa Bùi Trung Khánh tôi ăm ‘nâi:

“Ngin tâ phiu ro ‘nâng, xua tung pơla kố nah xuân hiăng pro tơtro pơkâ dêi Tơnêi têa, dêi Chin phuh ‘na klâ kơtăn, pêi kơtăng mâu pơkâ dêi kong pơlê. Tung la ngiâ ngin xuân klâ kơtăn a hngêi ƀă séa ngăn ivá a hngêi tơ’nôm 7 hâi nếo, drêng mê tâng ivá tơniăn mê kô lăm pêi cheăng tiah hmâ’’.

Hdrối mê, a kơmăng lơ 8/5, châ hlo 1 ngế tro tâ COVID 19 a kơtâo 189/1 troăng Mai Hắc Đế cho ngế tro tâ COVID 19 kơxô̆ 3237. Tung kơmăng lơ 8/5, kong pơlê Dak Lak hiăng pơkâ mơdât ôh tá ăm lo pa kong, klâ kơtăn kơpong kuăn pơlê rêh ối a kơtâu kố ƀă 47 rơpŏng kuăn pơlê, 144 pơ’leăng mâ mơngế. Tung tơdroăng mơdât ôh tá ăm lo pa kong, kơvâ khăm pơlât hiăng xo mơheăm khăm ngăn péa xôh ăm tâi tâng rơpŏng kuăn pơlê akố, pơrá âm tính ƀă SARS-CoV-2.

Jâ Lê Thị Ngọc Hương ối a kơtâo 189/1 troăng Mai Hắc Đế, bêng Tân Thành, pơlê kong kơdrâm Ƀuôn Ma Thuột tối:

“Klêi kơ’nâi vâ chê 20 hâi tâ rơrêk tung hiâm mơno ƀă xuân pói vâ ôh tá ai kơbố môi tiah kố. Mơhé vâ chê 20 hâi ối tung kơpong klâ kơtăn cho hêng hôu, laga séa ngăn tơdjuôm hlo rêm ngế xuân môi tuăn, xuân pói vâ pơreăng rĕng hluâ, vâ pơreăng ôh tá xông tâ tú a tíu kuăn pơlê rêh ối môi tiah kố xếo’’.

Kơpong kuăn pơlê tro mơdât ôh tá ăm lo pakong a kơtâu 189/1 troăng Mai Hắc Đế, bêng Tân Thành, pơlê kong kơdrâm Ƀuôn Ma Thuột ai 47 rơpŏng kuăn pơlê ƀă 140 pơ’leăng mâ mơngế, tung mê, ai 20 rơpŏng ối mung hngêi, cho mơngế lăm pêi cheăng hmâng vâ. Tung pơla klâ kơtăn kơpong kuăn pơlê rêh ối, rơtế ƀă tơdroăng pơtroh khu cheăng gak vâ tơniăn gak kring, tơniăn hbrâ mơdât pơreăng, khu râ kăn pơkuâ hiăng kơbông krếo mâu khu ai hiâm mơno tŏng kum veăng tơlo tơmeăm kâ vâ tơniăn tơdroăng rêh ối ăm kuăn pơlê.

Khu cheăng tah lôi kơxái mơdât ôh tá ăm lo pakong

Pơtối mê, hiăng ai vâ chê 50 rơtuh liăn; lối 5 tâ̆n kơchâi drêh; plâi pôm; vâ chê 15 tâ̆n phái; hrĭng kơthung xup kơxŏng khăng ƀă hên tơmeăm kâ ki ê hiăng châ mâu ngế ai hiâm mơno hơ-ui kum diâp ăm kuăn pơlê akố.

Jâ Trần Thị Dinh, Phŏ hnê ngăn Vi ƀan bêng Tân Thành, pơlê kong kơdrâm Ƀuôn Ma Thuột, kong pơlê Dak Lak tối ăm ‘nâi: tung la ngiâ, mơhé hiăng tah lôi mơdât ôh tá ăm kuăn pơlê lo pa kong, bêng hiăng pơtối séa ngăn, khăm ngăn ivá mâu ngế tung kơpong kuăn pơlê rêh ối kố vâ teăm tơdrêng tơleăng tơdroăng tâng ai.

“Klêi kơ’nâi tah lôi tơdroăng mơdât ôh tá ăm lo pa kong mê Khu hnê mơhno hbrâ mơdât COVID 19 dêi bêng pơtối séa ngăn ivá, pơtâng tối ăm vâi krâ pơtối pêi tơtro tơdroăng hbrâ mơdât pơreăng COVID 19 nôkố. Vâi krâ tâng hlo kơ-o, tơngê, châi ko mê vâi krâ tơno tơdrêng ƀă Hngêi pơkeăng bêng Tân Thành vâ ai hnê mơhno nhên’’.

Tiô ƀok thái pơkeăng Nguyễn Trung Thành, phŏ pơkuâ ngăn pơkeăng ƀă khăm pơlât, kơvâ ngăn pơkeăng ƀă khăm pơlât hiăng mơhnhôk mâu khu râ veăng hbrâ mơdât pơreăng COVID-19, tung mê, khu ngăn pơkeăng ƀă khăm pơlât cheăm, bêng, pơlê kân tung kong pơlê kum hên tung tơdroăng châ tơ-ƀrê mơdât pơreăng. Cho khu ki a ko ƀă cho kơ koan khăm pơlât achê kuăn pơlê má môi xua mê, hngêi pơkeăng cheăm, bêng ai hnoăng kal khât tung hbrâ mơdât pơreăng COVID 19.

Kuăn pơlê tung kơpong mơdât ôh tá ăm lo pakong phiu ro tơdah mơ-éa mơnhên hiăng kêi đeăng hâi khế klâ kơtăn

Tung pơla kố nah, drêng tung kong pơlê Dak Lak mơnhên 3 ngế dương tính ƀă SARS CoV-2, mâu hngêi pơkeăng cheăm, bêng, pơlê kân pơrá pơtroh mơngế gak pêi cheăng plâ hâi plâ măng vâ tơleăng tơdroăng tâng ai ngế tro tâ pơreăng. Tơdrêng amê, thăm séa ngăn ivá châ chăn dêi kuăn pơlê tung pơlê, châ hlo mâu tơdroăng ki tơngi, kơ-o, ôh tá kâi hiâm vâ khăm ngăn ivá ƀă pơlât teăm tơdrêng tâng nhôm tro tâ COVID 19; thăm tơbleăng ăm Khu hnê mơhno hbrâ mơdât pơreăng a pơlê tơrŭm ƀă mâu ƀok thái pơkeăng xôh pơkeăng kơdê pơreăng; hnê mơhno mâu rơpŏng, kơpong kuăn pơlê mơgrúa hngêi trăng, tối tơbleăng khăm pơlât; pơkuâ krá tơniăn mâu ngế lo ing kơpong ai pơreăng vâ teăm tơdrêng pêi pro klâ kơtăn tơkŭm, klâ kơtăn a hngêi ƀă pơtroh kăn ƀô̆ khăm pơlât séa ngăn, khăm ngăn ivá rêm hâi ƀă kuăn pơlê klâ kơtăn.

La ngiâ, Khu pơkuâ ngăn pơkeăng ƀă khăm pơlât kong pơlê Dak Lak kô mơjiâng khu séa ngăn ƀă tơkŭm séa ngăn mâu tíu khăm pơlât vâ pơ’lêh, pơchân tối xuân môi tiah hnê mơhno mâu tíu cheăng pêi pro tơtro tơdroăng hbrâ mơdât pơreăng tung pơlê pơla.

VOV Tây Nguyên

A Sa Ly tơplôu ƀă tơbleăng