VOV4.Sêdang - Kong pơlê Dak Lak dế mot rơnó tô ó, hên ƀăng kong a Dak Lak tơ’lêi tro on chếo ó. Vâ hbrâ mơdât, mâu ngế pơkuâ kong ƀă kơvâ cheăng a kong pơlê dế po rơdâ hên mâu troăng mơdât. Tiô pôa Mai Văn Kiện – Kăn phŏ pơkuâ kơ koan xiâm gak ngăn kong kong pơlê Dak Lak, lâp kong pơlê ai dâng 200 rơpâu ha kong tung kơxô̆ vâ chê 500 rơpâu ha kong tơ’lêi tro on chếo râ má 4 lơ dế hiăng vâ chê râ má 5.

Po văng nhâ hlá pê ƀă tróu tơkăng loăng vâ hbrâ mơdât on chếo

Kong tô khăng khoăng ó tiô tối hdrối troh khế 5, tơ’lêi chếo kong kô râ tâ mê nếo. Kơ koan xiâm gak ngăn kong kong pơlê Dak Lak hiăng tơbleăng ăm Vi ƀan kong pơlê tơbleăng pơkâ hbrâ mơdât on chếo. Hnê mơhno mâu tíu cheăng ƀă khu pơkuâ kong mơdât ôh tá ăm prôk a hên kơpong ki tơ’lêi chếo kong a mâu tơring môi tiah: Ƀuôn Đôn, Ea Súp ƀă Ea Hleo ƀă ƀăng dâng 195 rơpâu ha vâ tơkŭm po rơdâ mâu troăng hbrâ mơdât tơdroăng on chếo kâ kong.

A Sa Ly tơplôu ƀă tơbleăng