VOV4.Sêdang - A mâu roh trâm mâ pơla mâu ngế ki châ rah xo vâ pro kăn teăng mâ Hô̆i đong hnê ngăn rêm râ a kong pơlê Dak Lak nếo achê pơla kố, ai hên ngế hiăng tối dêi tơdroăng cheăng tơná vâ pêi pro, kô pêi tá tuăn tá mơno. Ki má lôí, mâu ngế kơdrâi cho hdroâng mơngế kuăn ngo, maluâ xiâm apoăng châ rah xo vâ ăm kuăn pơlê pôk, la tơná vâi hiăng tối dêi mâu hnoăng cheăng ki vâ pêi pro nhên khât, tơtro khât, châ kuăn pơlê rơhêng vâ môi tuăn.

Drêng hiăng klêi lăm trâm mâ a pơlê cheăm vâ mơhnhôk kuăn pơlê pôk khu kăn teăng mâ, nâ Vi Thị Kiều Chi, hdroâng Tày, ngế ki châ kuăn pơlê rah xo vâ to pro Kăn teăng mâ Hô̆i đong hnê ngăn kuăn pơlê dêi kong pơlê Dak Lak hneăng 2021-2026 hiăng châ hên tơdroăng ki kuăn pơlê veăng tơpui tối, ing mê, kum ăm nâ kô pơtối pêi pro dêi mâu tơdroăng cheăng tơná ki hiăng tơkêa vâ pêi. Cho môi ngế hơnăm ối nếo má môi a tíu tâ phĭu kơxô̆ 1, pơlê kong kơdrâm Ƀuôn Ma Thuột, nâ Vi Thị Kiều Chi ai tối, nâ hiăng mơjiâng mâu tơdroăng cheăng ki vâ pêi pro, tung mê, ai pơxúa tá tơdroăng cheăng ăm đoân viên, droh rơtăm ƀă mâu phô̆m vâ xông kân, vâi hdrêng.

Tung mê, tơkŭm pêi pro hên tâ cho thăm mơdêk tơdroăng rak ngăn, tŏng kum mâu vâi o phô̆m vâ xông kân, mâu vâi ‘nĕng ki rếh ối a kơpong xahpá, pơlê cheăm dêi hdroâng kuăn ngo. Tiô nâ Vi Thị Kiều Chi tối, roh apoăng châ kuăn pơlê rah vâ pơtối pôk pro kăn, mê nâ xuân tá hâi teăm ‘nâi nhên dêi tơdroăng tơná ti lâi, la nâ loi tơngah hnoăng cheăng ki nâ vâ pêi pro, ƀă hiăng tơpui tơhrâ a ngiâ kuăn pơlê, ai pơxúa kân khât ăm kong pơlê tơná.

“Tung hnoăng cheăng ki á vâ pêi pro, mê tơdroăng cheăng krê á ƀă xuân cho teăng mâ ăm Khu pơkuâ ngăn Đoân mê tơdroăng mơjiâng tơdroăng cheăng mê athế pêi tơtrro ƀă pêi mâu hnoăng cheăng, ai pơxúa khât, kring vế ki pơxúa mê tơtro khât ăm khu đoân viên, droh rơtăm, khu phô̆m vâ xông kân, mâu vâi hdrêng. Pakĭng mê, á cho môi ngế kơdrâi, mê á ‘nâi nhên hnoăng cheăng dêi môi ngế kơdrâi, mê á khoh tơkŭm pêi pro mâu tơdroăng ki ai tơdjâk troh hnoăng cheăng kring vế, rak ngăn vâi kơdrâi ƀă vâi hdrêng tung la ngiâ mê ah”.

Kong pơlê Dak Lak hiăng klêi ăm mâu ngế châ rah trâm mâ kuăn pơlê vâ pôk khu kăn teăng mâ Hô̆i đong hnê ngăn rêm râ

Ƀă nâ H’Jai HMok, hdroâng kuăn ngo Rơđế, roh apoăng châ rah xo vâ pơtối pôk pro kăn teăng mâ Hô̆i đong cheăm Dray Bhăng, tơring Čư̆ Kuin, nâ hiăng mơjiâng tơdroăng cheăng ki mơhnhôk vâi nâ o hdroâng kuăn ngo ki tiô khôp. Nâ H’Jai tối, tung cheăm kố ai 92% cho vâi kơdrâi hdroâng kuăn ngo ki tiô loi tơdroăng khôp. Khu pơkuâ ngăn vâi kơdrâi cheăm hiăng pơkâ pêi hên tơdroăng cheăng vâ kum vâi nâ o pơtối mơdêk pêi cheăng kâ, pêi lo liăn ngân, ing mê, hiăng kum ăm vâi nâ o châ veăng mot tung khu, veăng ‘no ivá mơnhông pêi cheăng kâ, mơdêk rêh ối pơlê pơla, kơdroh kơxô̆ rơpŏng kơtiê dêi cheăm chu ối  lối 5%.

Tâng châ pôk pro kăn teăng mâ Hô̆i đong hnê ngăn cheăm hneăng la ngiâ, ƀă tơdroăng ki thăm mơdêk mâu tơdroăng cheăng a cheăm, ki xiâm cho khu vâi nâ o ki mơ-eăm pêi, mê nâ H’Jai kô mơjiâng tơdroăng cheăng, pêi pro tơtro khât vâ thăm tơ’mot hên khu vâi kơdrâi veăng pêi mâu hnoăng cheăng, veăng kum vâi kơdrâi mơnhông pêi cheăng kâ ƀă mơjiâng on veăng rêh ối, cheăng kâ tơdâng tơ’mô, hơniâp ro, sôk suâ.

“Ki hên mâu kuăn pơlê rêh ối akố vâi bu rêh ối tiô dêi tơná tơmiât, bu pêi kâ to dêi tung rơpŏng hngêi, ôh tá vâ veăng pêi tơdroăng cheăng tơchôam dêi pơlê cheăm, vâi hmâ rêh ối krê xêh, xua mê, tung mâu tơdroăng ki á vâ pêi pro tung la ngiâ, a kô lăm mơhnhôk, djâ thế mâu vâi nâ o tơrŭm, lo pêi pro mâu hnoăng cheăng tơchoâm dêi thôn pơlê. Ki ahdrối á kô mơ’no mâu troăng prôk, tơdroăng cheăng, ai pơxúa, pro ti mê ‘nôi nếo châ hên nâ o veăng vâ mot, pêi pro, pro ti lâi mâu tơdroăng cheăng ki mê ga tơtro, ai pơxuá, hmâ mê cho tơdroăng cheăng dêi pơlê pơla la ga xuân tơtro ƀă tơdroăng khôp hiăng hnê há”.

Inâi hlá mơ-eá dêi mâu ngế ki châ rah hiăng châ tĕm a tiú tâ phĭu vâ vâi krâ-nhŏng o tí tăng pơchuât ngăn vâ pôk xo pro kăn

Mơngế ki châ rah xo vâ pơtối ăm kuăn pơlê pôk, ối a pơlê cheăm ki ai kơdrâm hdroâng kuăn ngo, tơkŭm hên hdroâng kuăn ngo peăng kơnhŏng, nâ Hoàng Thị Huệ, hdroâng Nùng, cho ngế ki châ rah xo vâ pơtối ăm kuăn pơlê pôk pro kăn teăng mâ Hô̆i đong cheăm Ea Tam, tơring Krông Năng, kong pơlê Dak Lak, nâ hiăng hriăn tơmiât ƀă kô pêi pro ‘na pơtối rak vế, pêi pro ‘na khôi túa, vêa vong dêi hdroâng kuăn ngo.

Tung mâu tơdroăng ki vâ pêi pro dêi tơná, tơdrêng ƀă hnoăng cheăng dêi khu pơkuâ cheăng Đảng, khu kăn pơkuâ cheăm lo lăm mơhnhôk vâi krâ-nhŏng o kuăn pơlê veăng pêi mơjiâng thôn pơlê nếo ki tơtêk hên tâ, cho Kăn hnê ngăn pơkuâ vâi kơdrâi cheăm, nâ Hoàng Thị Huệ tơkŭm mơ’no pêi mâu tơdroăng ki rêh ôí pơla vâi kơdrâi, vâi kơnốu thế tơdâng, mơjiâng túa cheăng “5 ôh, 3 krúa”, veăng kum ăm vâi kơdrâi ‘nâi hơ’leh mâu hdrê loăng, mơnăn păn ƀă rak vế, pơtối mơnhông ‘na khôí tuá, vêa vong dêi hdroângu kuăn ngo peăng Kơnhŏng, nâ hiăng tơpui tối dêi mâu tơdroăng ki tơná vâ pêi drêng trâm mâ kuăn pơlê.

Nâ Hoàng Thị Huệ mơnhên tối:

“Tâng vâi krâ-nhŏng o loi tơngah pôk xo á pro kăn teăng mâ Hô̆i đong hnê ngăn cheăm la ngiâ, mê tơná á kô pơtối mơnhông dêi tơdroăng cheăng ki tơná hiăng rơkê, hiăng chiâng pêi pro, pơtối hriâm, pơtối rak vế, pêi pro tiô tơdroăng pơkâ dêi râ pá pêng vâ pơtroh pơtâng ăm vâi krâ-nhŏng o kuăn pơlê”.

Hneăng 2021-2026, kong pơlê Dak Lak kô pôk vâ rah xo 75 ngế kăn cheăng tung Hô̆i đong râ kong pơlê, 514 ngế kăn teăng mâ Hô̆i đong râ tơring ƀă 4.667 kăn teăng mâ Hô̆i đong râ cheăm. Tung mê, vâ kơ tơniăn tro tiô tơdroăng pơkâ 1187 dêi Vi ƀan pơkuâ Kuô̆k hô̆i, mê ki vâ iâ hlái ai 35% kơxô̆ mâu ngế ki châ rah xo vâ pơtối pôk pro kăn mê cho vâi kơdrâi, khŏm mơ-eăm, kơxô̆ vâi kơdrâi ki châ pôk khŏm châ 30%.

Troh a chôu phut kố, tâi tâng mâu tíu ki tâ phĭu mê hiăng pêi klêi tơdroăng ki ăm mâu ngế châ rah xo vâ pro kăn lăm trâm mâ, tơpui tơno ƀă vâi krâ-nhŏng o tro tiô tơdroăng hiăng pơkâ. Inâi, tơdroăng cheăng dêi rêm ngế ki châ rah xo mê xuân hiăng châ tĕm a mâu tíu ki vâ tâ phĭu vâ kuăn pơlê châ pơchuât ngăn i nhên.

Ƀă mâu tơdroăng cheăng ki vâ pêi pro hiăng châ mâu ngế ki châ rah vâ pơtối ăm pôk pro kăn teăng mâ ki hiăng trâm mâ, tơpui tơno mê hiăng lăm mơhnhôk vâi krâ-nhŏng o kô kum kuăn pơlê hlê plĕng nhên tâ nếo ‘na tơdroăng cheăng dêi tơná, drêng vâi ki mê châ pôk pro kăn teăng mâ Hô̆i đong a hneăng la ngiâ, ing mê, vâ khoh chiâng rah xo mâu kăn ki ai hiâm tuăn lĕm tơdrăng khât, rơkê kơhnâ khât tung hâi pôk khu kăn a lơ 23/5 kố ah.

H’Xíu H’Mok chêh

Nhat Lisa tơplôu ƀă tơbleăng