VOV4.Sêdang - Vi ƀan hnê ngăn kong pơlê Dak Lak nếo pơkâ ƀă 9 khu tơdroăng cheăng ki xiâm pêi pro tung hơnăm hriâm nếo 2021 – 2022. Tiah mê, pakĭng tơdroăng ki hbrâ rơnáu mơjiâng ƀă tối tơbleăng túa pơkâ hơnăm hriâm 2021 -2022 tơtro ƀă rôh ki ai pơreăng COVID-19 a kong pơlê, mâu hngêi trung kal séa ngăn poê kơdroh ƀă kơdĭng khât mâu kơxô̆ liăn ‘no hrê vâ rak tơniăn, pôi tá mơdêk liăn hriâm tâng vâ pơchông ƀă hơnăm hriâm 2020 -2021; ai troăng hơlâ tŏng kum, ôh tá êa nâp, kơdroh, hâi khế nâp liăn hriâm, kum hlá mơ-éa hriâm ăm mâu vâi o hok tro ki ai tơdroăng rêh ối xơpá; pôi tá ăm ai tơdroăng ki pro pơxúa ăm dêi tơná krê ing tơdroăng ki nâp liăn hriâm apoăng hơnăm.

Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê Dak Lak mơhnhôk hok tro ƀă thái cô

Ƀă mâu kơpong ki xơpá, kơpong kong ngo ôh tá ai tŭm tơdroăng ki hnê ƀă hriâm in troăng hyôh Internet, hngêi trung hbrâ rơnáu tơrŭm ƀă nôu, pâ tơkŭm po ăm hok tro hriâm tâp ƀă mâu tơdroăng ki tơtro vâ hriâm klêi túa pơkâ hơnăm hriâm, rak tơniăn ki rơkê plĕng tung hnê hriâm; ôh tá tơkŭm po hnê hriâm ing troăng hyôh Internet ƀă mâu râ mầm non; tơkŭm tơrŭm; hnê mơhno, tŏng kum nôu pâ păn roăng, rak ngăn, hnê hriâm vâi hdrêng a hngêi ing mâu ƀâng ki tơtro.

Katarina Nga tơplôu ƀă tơbleăng