VOV4.Sêdang - Drêng ai pơreăng xông tâ tú ó, Vi ƀan kong pơlê Dak Lak hiăng tơbleăng mơ-eá ki kal ‘na pêi pro mâu troăng hbrâ mơdât pơreăng tung kong pơlê hiăng châ hlo ngế tro tâ pơreăng COVID 19. Pơtối mê, kong pơlê Dak Lak hnê mơhno kăn hnê ngăn Vi ƀan kuăn pơlê râ tơring, râ cheăm hbrâ tơrŭm ƀă mâu tíu cheăng ki tơdjâk hnê mơhno pêi pro mâu troăng kơdroh lo pa gong vâ hbrâ mơdât pơreăng tung kong pơlê sap kơmăng dế hâi lơ 10/5/2021 troh la lâi ai tơbleăng tối nếo.

Dak Lak: Pơtê mâu tơdroăng hôp, tơdroăng kal tơkŭm lối 30 ngế

Ki nhên, pơtê mâu tơdroăng tơkŭm po hôp, mâu tơdroăng ki kal tơkŭm lối 30 ngế tung 1 kơbong, kơdroh tơdroăng tơkŭm kơdrâm mơngế, ôh tá tối tíu pêi cheăng, hngêi trung hriâm, hngêi pơkeăng; pơtê mâu tơdroăng ai tơkŭm lối 30 ngế a mâu hngêi khôp, tíu koh tơbâ; pêi pro kơtăng tơdroăng pâng rơkong môh, xôh pơkeăng kơdê pơreăng, pêi pro kơtăng pơkâ 5 thế dêi Khu xiâm ngăn pơkeăng ƀă khăm pơlât.

A Sa Ly tơplôu ƀă tơbleăng