VOV4.Sêdang - o lâi hâi hiăng hluâ, tung kong pơlê Dak Lak pơtối ai mâu roh klâk têa pro 5 ngế hok tro hlâ. Roh tơdroăng ki nếo má môi a kơxê lơ 17/5, a rơchôa têa thôn Ea Lang, cheăm Čư Pui, tơring Krông Bông pro môi ngế hok tro hlâ. Ngế ki hlâ châ mơnhên cho muăn: Lương Thị Như Ngọc, 9 hơnăm, ối a thôn Ea Lang, cheăm Čư Pui, tơring Krông Bông, kong pơlê Dak Lak. Muăn Ngọc cho hok tro lâm 3, Hngêi trung râ má môi Čư Pui II, cheăm Čư Pui, tơring Krông Bông, kong pơlê Dak Lak.

Roh klâk têa a dâng 3 chôu kơxê lơ 17/5, drêng muăn Ngọc rơtế khu pú hmâ lo lăm a rơchôa têa thôn Ea Lang xah hêi. Drêng xah hêi, ôh tá mơhúa Ngọc tro hliâk chêng klêh tung rơchôa têa ƀă tro klâk têa. Hdrối mê, a hâi lơ 13/5, mâu muăn H’Hằng Kmăn ƀă H’Nan Mlô, pơrá kot mâ hơnăm 2008, rơtế cho hok tro lâm 7A, hngêi trung râ má péa Trần Quốc Toản, cheăm Ea R’bin, rơtế ối a cheăm Ea R’bin, lo lăm a têa Krông Nô hum tro klâk têa.

A hâi lơ 16/5, a rơchôa têa Drao, cheăm Čư Dliê M’Nông, tơring Čư̆ Mgar xuân ai roh klâk têa pro péa ngế nâ o xiâm cho muăn: Phan Thị Than L. 13 hơnăm, ƀă Phan Thanh N. 11 hơnăm pơrá ối a thôn 1, cheăm Čư Dliê M’Nông hlâ. Pơtối ai roh klâk têa cho rơkong vâ tơbleăng tối ăm mơngế nôu pâ, rơpŏng ƀă pơlê pơla tung tơdroăng pơkuâ, rak ngăn dêi kuăn ‘nĕng athế krâu, tơniăn drêng rơnó pơtê hriâm dế vâ troh.

A Sa Ly tơplôu ƀă tơbleăng