VOV4.Sêdang - Kơxo lơ 22/3, Khu pơkuâ ngăn Đảng Dak Lak tơkŭm po Rôh hôp tơbleăng pơkâ dêi Khu pơkuâ ‘na hnoăng cheăng kăn ƀô̆. Tiah mê, Khu pơkuâ ngăn Đảng Dak Lak pơkâ pơtroh ƀă ‘mot tơ’nôm pôa Y Vinh Tơr, Ngế ki hbrâ vâ mot cheăng tung pơkuâ ngăn Tíu xiâm Đảng, Ngế cheăng tung khu pơkuâ ngăn Đảng, kăn pơkuâ ngăn pơlê kong krâm Ƀuôn Hồ pro kăn phŏ hnê ngăn Hô̆i đong hnê ngăn kong pơlê sap ing hâi lơ 22/3/2021; pơtroh ƀă ‘mot tơ’nôm jâ H’Lim Niê, ngế cheăng tung khu pơkuâ ngăn Đảng kong pơlê, kăn pơkuâ Khu tơrŭm ngăn Đảng kong pơlê pro kăn pơkuâ ngăn Đảng kong pơlê, Kăn pơkuâ Bơrô cheăng khu pơkuâ ngăn Đảng kong pơlê pro kăn pơkuâ khu tơrŭm ngăn Đảng kong pơlê; pơtroh ƀă ‘mot tơ’nôm pôa Nguyễn Thượng Hải, ngế cheăng tung khu pơkuâ ngăn Đảng ủy, kăn pơkuâ Bơrô khu pơkuâ ngăn Đảng pro kăn pơkuâ khu tơrŭm Đảng ủy; pơtroh ƀă ‘mot pôa Trần Trung Hiển, ngế cheăng Đảng, kăn pơkuâ ngăn Đảng tơring Krông Năng pro kăn pơkuâ bơrô cheăng Đảng kong pơlê Dak Lak.

Dak Lak pơtroh ƀă ‘mot tơ’nôm hên kăn ƀô̆

Drêng kố, khu pơkuâ ngăn Đảng kong ơlê Dak Lak xuân pơkâ thế jâ Lê Thị Thanh Xuân, ngế cheăng tung khu pơkuâ ngăn Đảng ƀă pro kăn phŏ pơkuâ ngăn Khu hnê hriâm kong pơlê Dak Lak veăng cheăng tung khu pơkuâ ngăn ƀă pro kăn pơkuâ ngăn Đảng pơlê kong krâm Ƀuôn Hồ. Thế pôa Y Bi On Niê, kăn phŏ pơkuâ ngăn Đảng, kăn hnê ngăn Hô̆i đong hnê ngăn tơring Krông Năng pơkuâ tơdroăng cheăng dêi Đảng ƀô̆ tơring troh drêng ai kăn pơkuâ ngăn Đảng ki nếo.

Katarina Nga tơplôu ƀă tơbleăng