VOV4.Sêdang - Vi ƀan tâ phĭu pôk kăn kong pơlê Dak Lak nếo tơkŭm po rôh pơtroh inâi 14 hồ sơ ngế ki châ tơbleăng vâ cheăng tung Kuô̆k hô̆i hneăng má 15 ƀă 141 hồ sơ ngế ki châ tơbleăng cheăng tung Hô̆i đong hnê ngăn kong pơlê hneăng má 10, tung mê ai 1 ngế chêh xêh inâi pơtroh vâ mot cheăng tung Hô̆i đong hnê ngăn kuăn pơlê kong pơlê. A rôh tâ phĭu pôk kố, kong pơlê Dak Lak ai 3 tíu pêi cheăng tâ phĭu khu kăn Kuô̆k hô̆i hneăng má 15 ƀă kơxô̆ ngế kăn Kuô̆k hô̆i châ pôk ai 9 ngế.

Tung mê, 5 ngế kăn pêi cheăng ƀă rêh ối a kong pơlê, 4 ngế kăn xua Tơnêi têa tơbleăng. Tâi tâng kơxô̆ ngế kăn cheăng tung Hô̆i đong hnê ngăn kong pơlê Dak Lak hneăng hơnăm 2021 -2026 châ pôk ai 75 ngế ƀă 20 tiú tâ phĭu pôk; môi tuăn xing xoăng ăm mâu kơ koan, tíu pêi cheăng khu kong pơlê 44 ngế kăn ƀă khô̆i tơring, pơlê kong krâm ai 31 ngế.

Klêi kơ'nâi tơdah xo hồ sơ, Vi ƀan xiâm Măt trâ̆n Tơnêi têa Việt Nam kong pơlê kô pơtroh ăm Hneăng hôp tơkêa rôh má péa a hâi lơ 18/3/2021 vâ môi tuăn tơdroăng chêh inâi mâu ngế ki vâ tơbriât cheăng tung khu Kuô̆k hô̆i ƀă kăn Hô̆i đong hnê ngăn kong pơlê.

Katarina Ngâ tơplôu ƀă tơbleăng