VOV4.Sêdang - Hâi lơ 16/8, Hngêi pơkeăng kân kơpong Tây Nguyên, kong pơlê Dak lak pêi klêi tơdroăng ki hơ’lêh mâu tíu ối ƀă ăm khoa Truyền nhiễm dêi hngêi pơkeăng chiâng râ ki má mơ’nui tung pơla xo, pơlât mâu ngế ki tâ COVID-19. Tơdroăng ki ăm kơpong pơlât kố pêi cheăng, kô kum Dak Lak hbrâ mơdât tro tâ ƀă pơreăng COVID-19 dế tâ tú ôh tá tơniăn, kum mâu kong pơlê ki achê pơlât mâu ngế ki tâ pơreăng râ tâng ai.

Dak Lak pơxiâm ăm xúa kơpong pơlât mâu ngế tâ COVID-19 ki râ

Tiah mê, Hngêi pơkeăng kơpong Tây Nguyên rơdah xúa khoa Truyền nhiễm ƀă Khoa Dinh dưỡng vâ pro kơpong ki pơlât ăm mâu ngế ki COVID-19 ki râ tung kơpong Tây Nguyên. Kơpong pơlât kố ai 200 to xoăng koi, ki hdrối tâ kô xúa 20 to xoăng koi pơlât. Mâu ngế ki tâ COVID-19 kô châ tơdah ‘mot a kơpong pơlât kố ƀă ƀă troăng prôk krê, ai tíu ki rak tơniăn Hngêi pơkeăng.

Nôkố hngêi pơkeăng hiăng hbrâ rơnáu tŭm mâu kế tơmeăm, kơmăi kơmok ăm 20 to xoăng pơlât mâu ngế ki râ cho kơmăi hiâm, kơmăi ki rah ngăn mơheăm, mâu kế tơmeăm ki séa ngăn mâu ngế ki tâ pơreăng.

Katarina Nga tơplôu ƀă tơbleăng