VOV4.Sêdang - Tơdjâk troh tơdroăng tơkêa bro rơchoâ hno têa kơnâ 4.400 rơtal liăn Krông Pač Thượng klêi kơ’nâi lối chât hơnăm ôh tá chiâng klêi ƀă hên tơdroăng ki ôh tá tơniăn, ki Rơ’jiu Việt Nam hiăng pơtối tơbleăng tung pơla hdrối nah, Khu xiâm ngăn chiâk deăng ƀă mơnhông thôn pơlê rơtế ƀă mâu khu kăn pơkuâ kong pơlê Dak Lak hiăng pêi pro kơtăng tung mâu tơdroăng ki kố,  mê hiăng châ tơleăng mơnhên.

Lân lu a long têa mơnhâu troh tơmeăm khoăng, châ chăn kuăn pơlê

Kong pơlê Dak Lak xuân hiăng pơkâ túa pơxiâm ‘mâi xĕn kuăn pơlê. Tiô pơkâ môi tuăn pơla Khu rak ngăn tơdroăng tơkêa ‘no liăn cheăng mơjiâng rơchôa ƀă pêi chiâk deăng kong pơlê Dak Lak ƀă Khu rak ngăn tơdroăng tơkêa pro rơchôa 8 (Khu xiâm ngăn chiâk deăng ƀă Mơnhông thôn pơlê) rơtế ƀă khu kăn pơkuâ péa tơring Ea Kar, M’Drak, tơdroăng ki ‘mâi xĕn kuăn pơlê châ pơxiâm sap ing hâi lơ 12/3.

‘Na tâi tâng dêi tơdroăng tơkêa bro rơchôa Krông Pač Thượng ai lối 700 rơpŏng kuăn pơlê ối tung 3 thôn: 9, 10 ƀă 11, cheăm Čư̆ San, tơring M’Drak kal châ ‘mâi xĕn vâ kum ăm tơdroăng ki kơdĭng tung long. Kơxô̆ rơpŏng kuăn pơlê ki kố kô châ xoăng troh a 2 kơpong pro pơlê nếo pơrá ối a tơring Ea Kar.

Nga tơplôu ƀă tơbleăng