VOV4.Sêdang - Kong pơlê Dak Lak hiăng pơkâ pâk lối 17 rơpâu klŏng pơkeăng vaccine COVID 19 sap ing hâi kố lơ 24/4, rĕng tâ 3 hâi tâng pơchông ƀă pơkâ. Tung lâp kong pơlê Dak Lak, Khu pơkuâ ngăn pơkeăng ƀă khăm pơlât hiăng tơkŭm po hnê mơhno nhên ăm mâu khu râ kăn pơkuâ, kăn ƀô̆, nhân viên pêi tơdroăng cheăng pâk pơkeăng; tối ‘na vaccine COVID 19; hnê mơhno xúa, rah xo hdrối vâ pâk; hnê mơhno pơlât drêng châi xua pâk pơkeăng, rak tơniăn pâk pơkeăng vaccine. 

Hnê mơhno hdrối vâ pâk pơkeăng vaccine COVID-19

Tơdroăng pâk vaccine hbrâ mơdât COVID 19 roh kố, kong pơlê châ xing xoăng 17.050 klŏng pơkeăng vâ pâk ăm 3 khu ngế tung mê, cho mâu ngế pêi cheăng a hngêi pơkeăng, mâu ngế veăng hbrâ mơdât pơreăng ƀă mô đô̆i ki kum kuăn pơlê. Hâi khế pâk sap ing hâi lơ 24/4 troh lơ 5/5/2021. Vâ châ tiô pơkâ lối 95% ngế châ kơjo pâk, Dak Lak po rơdâ pâk ai a kong pơlê ƀă tơ’nôm péa tíu pâk tơniăn a hngêi pơkeăng kân kơpong Tây Nguyên ƀă Hngêi pơkeăng kân pơlê kong kơdrâm Ƀuôn Ma Thuột.

A Sa Ly tơplôu ƀă tơbleăng