VOV4.Sêdang - Vâ kum tơtro ăm tơdroăng tâ phĭu rah xo kăn teăng mâ Kuô̆k hô̆i hneăng má XV ƀă Hô̆i đong kuăn pơlê mâu râ hneăng hơnăm 2021 – 2026, Kŏng ti on tơhrik Dak Lak hiăng ƀă dế pêi pro mâu troăng mơ’no ăm on tơhrik tơniăn, đi đo troh rêm tíu cheăng tung pơla tơkŭm po tâ phĭu. Tiô pôa Trần Tấn Phụng – Kăn phŏ pơkuâ Kŏng ti on tơhrik Dak Lak, ahdrối hneăng tâ phĭu, Kŏng ti hiăng hnê mơhno mâu tíu mơ’no on tơhrik, tơtrŏng seá ngăn rak ngăn troăng on tơhrik a tâi tâng mâu tíu tâ phĭu vâ rak tơniăn mơ’no on tơhrik, ƀă loi tơngah khât.

Khu pơkuâ on tơhrik Ea Súp lăm séá ngăn troăng kơxái vâ kum tơniăn a hâi lăm tâ phĭu pôk khu kăn

Kŏng ti xuân pơkâ troăng mơ’no ăm on tơhrik, ƀă 100% mơngế pêi cheăng đi đo rak ngăn tơdroăng mơ’no on tơhrik, hbrâ hên kơmăi hbrâ ai on tơhrik vâ mơ’no on tơhrik drêng ai tơdroăng ki tơ’nhê on tơhrik.

Hneăng tâ phĭu rah xo kăn teăng mâ Kuô̆k hô̆i hneăng má XV ƀă Hô̆i đong hnê ngăn kuăn pơlê rêm râ hneăng hơnăm 2021 – 2026 a Dak Lak ai lối 1,2 rơtuh ngế kuăn pơlê lăm tâ phĭu a 1.849 tôh tâ phĭu, tung mê, ai 8 tôh a mâu cheăm tíu tơkăng kong kô rĕng tâ phĭu hdrối tâ, cho a hâi lơ 22/5, ki ê 1.841 tôh kô tơkŭm tâ phĭu a hâi lơ 23/5.

A Sa Ly tơplôu ƀă tơbleăng