VOV4.Sêdang - Dak Lak hiăng mot tung rơnó tôu mơdrăng, tơdroăng ki rơhêng vâ xúa on tơhrrik gá hên. Vâ rak tơniăn on tơhrrik, pơtối ƀă tơniăn, malối cho tung tơdroăng ki hrik têa tôh ăm mâu kế tơmeăm khoăng pêt lối hrĭng ha kơphế, tiu, On tơhrrik Dak Lak hiăng hbrâ rơnáu tơbleăng hên troăng hơlâ mơ’no on tơhrrik tung rơnó tôu kố.

Kŏng nhân On tơhrik Ƀuôn Hồ dế rơnêu trăng kơxái on tơhrik.

Nôkố, on tơhrrik xúa a Dak Lak hiăng xúa dâng 7% tâng vâ pơchông ƀă khế kố hơnăm hdrối. Vâ rak tơniăn ‘no tơhrik, PC Dak Lak hiăng xúa châ tơbrê troăng mơni SCADA pêi pro ‘no sap ing hngế; rê̆ng klêi tơdroăng ki tơ’moê kơxái nếo; tơmiât ngăn vâ vêh krâ mâu kơmăi biến áp ăm rêm kơpong ki kal ƀă hên ki ê. Kơvâ on tơhrik xuân hiăng mơdêk séa ngăn troăng on tơhrik, tơrŭm krá ƀă khu kăn pơkuâ kong pơlê tung rak vế tơdroăng ki tơniăn ‘na on tơhrik cao áp. Kŏng ti on tơhrik Dak Lak pơkâ thế tâi tâng 15 to tíu pêi cheăng ối tung kong pơlê ai mâu túa pơkâ totro tơdroăng ki ‘no on tơhrik ƀă hbrâ kơmăi biến áp rak tơniăn on tơhrik, pơtối ăm kuăn pơlê tung lâp kơpong.

Katarina Nga tơplôu ƀă tơpleăng