VOV4.Sêdang - Hâi lơ 24/3, Khu pơkuâ ngăn Đảng kong pơlê Dak Lak tơkŭm po rôh hriâm tâp, hriăn ngăn, séa ngăn tơbleăng, pêi pro tơdroăng pơkâ Hneăng hôp khu kăn Đảng ƀô̆ kong pơlê rôh má 16 hơnăm 2020 – 2025.

Dak Lak séa ngăn kơtăng pơkâ Hneăng hôp Đảng ƀô̆ kong pơlê troh kăn ƀô̆ pơkuâ xiâm

A rôh hôp, kăn ƀô̆ pơkuâ, rak ngăn dêi kong pơlê ƀă kăn ƀô̆ xiâm mâu tơring, cheăm tơkŭm hriâm, hriăn ngăn, séa ngăn 5 tơdroăng ki kal, mê cho: Mâu tơdroăng ki xiâm cho tối tơbleăng tơdroăng kal kí ƀă tơdroăng pơkâ Hneăng hôp khu kăn Đảng ƀô̆ kong pơlê rôh má 16 hơnăm 2020 – 2025; mơdêk ivá pơkuâ tơdroăng tơplâ dêi Đảng ƀô̆ krá rơdêi ‘na tơdroăng kal kí, hiâm mơno, tơrŭm ƀă tơdroăng rêh ối; Mơjiâng khu pơkuâ tơdroăng kal kí, mơdêk tơniăn krê khu tơrŭm mâu hdroâng kuăn ngo; Mơdêk ki ai hlâu, ki pơxúa vâ mơnhông cheăng kâ rêh ối pơlê pơla, krá rĕng tơniăn; rak tơniăn tơdroăng gâk kring pơlê cheăm bêng, po rơdâ  ƀă mơdêk tơrŭm cheăng tơpui kâ.

Tơpui a rôh hôp, pôa Phạm Minh Tấn, kăn phŏ pơkuâ hnê ngăn Đảng kong pơlê Dak Lak tối nhên: Hneăng hôp cho tơdroăng cheăng kal kí ai pơxúa kal, vâ pêi tơƀrê tơdroăng pơkâ Hneăng hôp Đảng ƀô̆ kong pơlê rôh má 16 hơnăm 2020 – 2025.

Katarina Nga tơplôu ƀă tơbleăng