VOV4.Sêdang - Klêi kơ’nâi mâu F1 ai 3 rôh séa ngăn âm tĭnh ƀă virus SARS-CoV2, ai lối 140 ngế kuăn pơlê tung kơpong ki tro mơdât xuân ăm ‘nâi rôh má 2 séa ngăn âm tĭnh, kơxo lơ 26/5, Vi ƀan hnê ngăn kong pơlê Dak Lak hiăng kĭ pơkâ tah lôi tơdroăng ki mơdât prôk lăm ƀă kơpong a hơlâ 189/1 troăng Mai Hắc Đế, bêng Tân Thành, pơlê kong kơdrâm Ƀuôn Ma Thuột, kong pơlê Dak Lak, tíu ki ai 2 ngế tâ pơreăng COVID-19.

Dak Lak: Tah lôi tơdroăng ki mơdât prôk lăm kuăn pơlê rêh ối ki ai ngế tâ pơreăng

Jâ Trần Thị Dinh, kăn phŏ hnê ngăn Vi ƀan bêng Tân Thành ăm ‘nâi, tung plâ hâi khế ki klâ ối krê kơpong kuăn pơlê rêh ối, rơtế ƀă tơdroăng ki xing xoăng gak ngăn vâ rak tơniăn kring vế, rak tơniăn tung hbrâ mơdât pơreăng, khu kăn pơkuâ kong pơlê hiăng krếo thế mâu khu ki ai hiâm mơno hơ-ui kum tŏng kum kế kâ vâ rak tơniăn tơdroăng rêh ối ăm kuăn pơlê.

Tiô jâ Dinh, tung la ngiâ, maluâ hiăng tah tơdroăng ki mơdât, bêng pơtối ai troăng hơlâ séa ngăn ivá mâu ngế tung kơpong rêh ối kố vâ rĕng ai troăng hơlâ pơkâ tơleăng tâng ai tơdroăng ki ôh tá tơniăn.

            Katarina Nga tơplôu ƀă tơbleăng