VOV4.Sêdang - Kơxo ah, lơ 23/5, kuăn pơlê tung lâp tơnêi têa kô veăng lo pêi hnoăng cheăng kal kí, tâ phĭu rah xo kăn Kuô̆k hô̆i hneăng 15 ƀă kăn hnê ngăn Hô̆i đong rêm râ, hneăng hơnăm 2021 -2026. Tơdrêng ƀă lâp tơnêi têa, tơdroăng kal kí a kong pơlê Dak Lak dế pêi pro nôkố cho mâu tơdroăng cheăng roh mơ’nui, vâ hneăng ta phĭu châ tơniăn, tro tiô luât, kuăn pơlê môi tuăn ƀă cho hâi leh kân dêi tâng tâng kuăn pơlê.

Cho môi tung mâu tíu xiâm dêi pơlê kong kơdrâm Ƀuôn Ma Thuột, bêng Thành Công ai 13 kơpong tâ phĭu ƀă lối 5 rơpâu ngế kuăn pơlê. Mâu tơdroăng hngêi trăng, kơ-ƀeăng ‘nân, hiăng châ pơkâ chêh inâi mâu ngế ki tơbriât cheăng, hiăng châ mâu tôh tâ phĭu xing xoăng tơtro, khoa hok, hbrâ rơnáu ăm hâi mơdĭng tâi tâng kuăn pơlê.

Vâ rak tơniăn ‘na kring vế, gak ngăn, Khu hnê mơhno tâ phĭu bêng Thành Công xuân hiăng xing xoăng khu lêng, mơdêk lăm pơtrui ngăn vâ rĕng châ hlo, pơkâ tơleăng mâu tơdroăng ki ôh tá tro tâng ai. Pôa Phan Hữu Trí, kăn pơkuâ ngăn Đảng ủy, kăn hnê ngăn Hô̆i đong kuăn pơlê, kăn pơkuâ Hnê mơhno tâ phĭu bêng Thành Công, pơlê kong kơdrâm Ƀuôn Ma Thuột, kong pơlê Dak Lak ăm ‘nâi:

“Ngin pơkâ thế Vi ƀan tâ phĭu athế đi đo séa ngăn mâu hnoăng cheăng ki tơdjâk troh tâ phĭu. Má 2, rak tơniăn khât mâu inâi kuăn pơlê. Pơtối rak vế tơniăn inâi mâu ngế ki tơbriât pêi cheăng, klêi kơ’nâi inâi ngế ki tơbriât châ pơkâ nhên mê ngin xing xoăng khu lêng rêm măng ai khu lêng kŏng an, tôh kơphô̆, khu lêng rak ngăn bêng lăm pơtrui ngăn a bêng, ngin pơcháu hnoăng cheăng ăm mâu vâi pú athế đi đi séa ngăn mâu kơpong tâ phĭu. Troh nôkố mâu inâi ki tơbriât cheăng mê hiăng châ ngin rak ngăn tơniăn”.

Inâi kăn Kuô̆k hô̆i hneăng má 15 ƀă Hô̆i đong hnê ngăn kuăn pơlê rêm râ, hneăng hơnăm 2021 – 2026 châ tĕm tơniăn a tíu pêi cheăng Vi ƀan bêng Thành Công, pơlê kong kơdrâm Ƀuôn Ma Thuột, kong pơlê Dak Lak

A râ pơlê kong kơdrâm, Khu hnê tâ phĭu, Vi ƀan tâ phĭu ƀă Vi ƀan Măt trâ̆n Tơnêi têa pơlê kong kơdrâm Ƀuôn Ma Thuột, hiăng mơjiâng mâu khu, pêi pro mâu rôh séa ngăn, hnoăng cheăng tâ phĭu a tâi tâng mâu cheăm, bêng, rak tơniăn mâu tơdroăng ki kal, tơdroăng cheăng pêi pro tro tiô tơdroăng pơkâ ƀă tro luât.

Pôa Nguyễn Khắc Long, kăn phŏ hnê ngăn Hô̆i đong tâ phĭu pơlê kong kơdrâm ăm ‘nâi, troh nôkố, ki hên kuăn pơlê hiăng châ xo theh kuăn pơlê ƀă túa pơkâ ‘na mâu ngế cheăng ƀă ‘na kơxô̆ mơngế, pơkâ mâu kăn Kuô̆k hô̆i hneăng má 15 kăn Hô̆i đong hnê ngăn kuăn pơlê rêm râ hơnăm 2021 – 2026; inâi ngế ki tơbriât cheăng hiăng châ pơtroh rêm rơpŏng, vâ hriăn ngăn pơkâ rah xo, pôk mâu ngế ki tơxâng. Ƀă kuăn pơlê cho sinh viên drêng vêh a kong pơlê kô châ chêh ‘mot tơ’nôm inâi vâ rĕng rak tơniăn hnoăng kuăn pơlê dêi tơná.

“Inâi kuăn pơlê nôkố ngin pơtối séa ngăn ƀă chêh inâi kuăn pơlê tá troh tâi hâi lơ 21/5. Xua nôkố ai pơreăng COVID-19 mê ai mâu hngêi trung đăi hok, kao đăng ăm hok tro hriâm tơdrêng ing măng mê sinh viên vêh a hngêi, sinh viên mâu tíu ki ê kô vêh akố mê athế vêh chêh nếo, lơ sinh viên Đăi hok Tây Nguyên kô vêh a tíu rêh ối, ôh tá ối akố xếo mê athế pơtối séa ngăn inâi kuăn pơlê vâ ngin rĕng ‘mot tơ’nôm ăm tơtro”.

Kuăn pơlê Dak Lak tơmâng ngăn khât inâi mâu ngế ki tơbriât cheăng tung Kuô̆k hô̆i hneăng má 15 ƀă Hô̆i đong hnê ngăn kuăn pơlê rêm râ, hneăng hơnăm 2021-2026

Tiô pôa Y Ƀiêr Niê, kăn phŏ pơkuâ ngăn Đảng, kăn hnê ngăn Hô̆i đong hnê ngăn kong pơlê, kăn pơkuâ khu kăn Kuô̆k hô̆i kong pơlê, kăn hnê ngăn Vi ƀan tâ phĭu kong pơlê Dak Lak, lâp kong pơlê ai 1.794 tôh tâ phĭu ƀă 1.802 tíu tâ phĭu. Rêm hnoăng cheăng hbrâ ăm rôh tâ phĭu a Dak Lak hiăng pêi pro klêi, pêi pro châ tơdroăng ki rơhêng vâ dêi Hô̆i đong tâ phĭu tơnêi têa pơkâ mơ’no. Malối, cho ôh tá tơniăn dêi pơeăng ƀă tơdroăng kring vế, gak ngăn tơniăn a kong pơlê, Tiêuh ƀan gak kring, tơniăn ƀă khăm pơlât hiăng pơkâ túa rak tơniăn kring vế, tơniăn tung pơlê pơla, tung kong pơlê drêng tơkŭm pêi pro hnoăng cheăng tâ phĭu.

Khu kŏng an hiăng tơbleăng hên roh lăm tăng rup mâu ngế ki pro xôi, tơkŭm séa ngăn, pơxâu phak mâu ngế pro xôi luât châ kuăn pơlê tung pơlê pơla tơmâng ngăn. Kơvâ ngăn pơkeăng ƀă khăm pơlât hbrâ rơnáu chêh mâu hlá mơéa, túa pơkâ tâ phĭu tung tơdroăng ki ai pơreăng COVID-19 ôh tá tơniăn. Pôa Y Ƀiêr Niê tối nhên:   

“Chiâng vâ tối rơdêi nôkố hnoăng cheăng hbrâ ăm rôh tâ phĭu a Dak Lak mâu tơdroăng pêi pro xuân môi tiah mâu tơdroăng cheăng pơkâ hiăng klêi tiô pơkâ mơ’no ƀă tiô kơxop hlá mơ-éa tối tơbleăng nôkố rêm tơdroăng tá hnoăng cheăng gak kring khăm pơlât dế châ rak tơniăn. Loi tơngah sap ing nôkố troh hâi tâ phĭu mâu tơdroăng cheăng kô châ tơniăn lĕm vâ pro tiah lâi pin ai rôh tâ phĭu a kong pơlê Dak Lak ƀlêi trâng tơniăn lĕm, veăng kum tung tơdroăng ki ƀlêi trâng ăm lâp tơnêi têa”.

Hâi tâ phĭu hiăng vâ chê troh. Hâi kố, lơ 22/5, 7 to đông ƀă Tiêuh đoân huấn luyện cơ động, ối tung Mố đô̆i gâk tơkăng kong Dak Lak hiăng tơkŭm,                                                                              po tâ phĭu pôk kăn Kuô̆k hô̆i hneăng má 15 ƀă Hô̆i đong hnê ngăn kuăn pơlê rêm râ hneăng hơnăm 2021 – 2026  rĕng tâ.

Ƀă tơdroăng ki veăng kum dêi khu pơkuâ tơdroăng kal kí sap ing kong pơlê troh cheăm, tơring rơtế ƀă tơdroăng ki loi tơngah, khŏm mơ-eăm khât dêi kuăn pơlê, rôh tâ phĭu pôk kăn Kuô̆k hô̆i hneăng má 15 ƀă Hô̆i đong hnê ngăn kuăn pơlê rêm râ hneăng hơnăm 2021 -2026 kong pơlê Dak Lak dế pêi pro troh tơdroăng ki ƀlêi trâng, tơniăn, tơƀrê, cho hâi mơdĭng dêi tâi tâng kuăn pơlê.

Hương Lý chêh

Katarina tơplôu ƀă tơbleăng