VOV4.Sêdang - Kơxo lơ 30/3, a pơlê kong kơdrâm Ƀuôn Ma Thuột, Khu pơkuâ tơdroăng kal tiô troăng um tơvi, rơ’jíu ƀă Internet kong pơlê Dak Lak hiăng tơkŭm po lâm hnê mơhno ‘na  tơdroăng pơtâng tối roh tâ phĭu rah xo kăn teăng mâ Kuô̆k hô̆i hneăng má XV ƀă tâ phĭu rah xo kăn Hô̆i đong kuăn pơlê mâu râ hneăng hơnăm 2021 – 2026. Lối 130 ngế hriâm cho kăn pơkuâ, ngế chêh hlá tơbeăng, ngế rah chêh hlá tơbeăng mâu kơ koan kong pơlê ƀă ngế chêh hlá tơbeăng mâu kơ koan râ tơnêi têa ối a kong pơlê Dak Lak veăng hriâm. 

Dak Lak: Thăm pêi pro tơdroăng pơtâng tối ‘na tâ phĭu rah xo kăn teăng mâ Kuô̆k hô̆i hneăng má XV ƀă kăn teăng mâ Hô̆i đong kuăn pơlê mâu râ hneăng hơnăm 2021 – 2026

Khu pơkuâ kăn ƀô̆ kong pơlê Dak Lak tối, tơdroăng pơtâng tối khu chêh hlá tơbeăng cho kal khât tung  tơdroăng ki vâ châ tơbrê dêi roh tâ phĭu rah xo kăn teăng mâ Kuô̆k hô̆i hneăng má XV ƀă kăn teăng mâ Hôi đong kuăn pơlê mâu râ hneăng hơnăm 2021 – 2026. Klêi kơ’nâi tơdroăng pơtâng tối pro ăm tâi tâng Đảng, tâi tâng khu lêng ƀă tâi tâng kuăn pơlê hlê plĕng nhên xiâm kối, hnoăng, ki pơxúa, ki kal dêi tơdroăng kal kí kô cho vâ rah xo mâu kăn teăng mâ ki rơkê, tơxâng teăng mâ ăm tơdroăng mơ-eăm, pói vâ ƀă hnoăng pơkuâ dêi kuăn pơlê.

A Sa Ly tơplôu ƀă tơbleăng