VOV4.Sêdang - Pơtối mâu troăng pêi pro tơdroăng tâ phĭu rah xo kăn teăng mâ Kuô̆k hô̆i hneăng má XV ƀă kăn teăng mâ Hô̆i đong kuăn pơlê mâu râ hneăng hơnăm 2021 – 2026, Khu pêi cheăng Vi ƀan Măt trâ̆n Tơnêi têa Việt Nam kong pơlê Dak Lak hiăng tơkŭm séa ngăn, mơnhên ngăn tơdroăng tâ phĭu a mâu tơring tung kong pơlê.

Klêi kơ’nâi mơnhên, tâi tâng mâu tơring hiăng pêi pro tro tơdroăng, pơkâ, rak tơniăn tro tiô pơkâ mơ’no. Sap ing hâi lơ 8/4 troh hâi lơ 13/4, Khu râ kăn hiăng tơkŭm séa ngăn tơdroăng tâ phĭu rah xo mâu kăn râ tơring, râ cheăm ƀă Khu pêi cheăng Măt trâ̆n a kơpong kuăn pơlê rêh ối a mâu tơring Čư Mgar, Ea Kar, Krông Ana ƀă Ea H’Leo.

Dak Lak thăm séa ngăn tơdroăng tâ phĭu rah xo kăn

Tơdroăng xiâm séa ngăn, mê cho: Séa ngăn tơdroăng pêi pro, hlê plĕng tŭm Luât tâ phĭu; tơdroăng mơjiâng ƀă pêi cheăng dêi Vi ƀan tâ phĭu, mâu khu pơkuâ tâ phĭu; tơdroăng tơkŭm po tơmâng xo rơkong tơpui dêi kuăn pơlê a tíu rêh ối ƀă mâu ngế ki tơbriât to pro kăn.

Tung la ngiâ, Vi ƀan Măt trâ̆n Tơnêi têa Việt Nam kong pơlê Dak Lak pơtối pêi pro 2 roh séa ngăn ‘na tơdroăng tĕm inâi mâu ngế ki tâ phĭu ƀă tơdroăng hbrâ kơthung tâ phĭu, tĕm inâi mâu ngế tơbriât to pro kăn, tơleăng đơn săm tối săm tơkêng. Tung pơla séa ngăn sap ing hâi lơ 15/4 troh tâi hâi lơ 30/4/2021.

A Sa Ly tơplôu ƀă tơbleăng