VOV4.Sêdang - A cheăm Ea Sôr, tơring Ea Kar, kong pơlê Dak Lak, môi tíu ‘măn prêi ôh tá tro luât troh rơpâu mêt khô̆i châ môi khu chiâ xo tơmeăm khoăng tung têa pro, chôu ‘măn hiăng ton ôh tá xâu kơbố, thăm nếo, ‘măn achê troăng kân kơxô̆ 29 cho troăng kân ki lăm ngi kong pơlê ki ê. Tíu chôu ‘măn prêi kố cho tíu pơto prêi pơla 3 kong pơlê, Phú Yên, Gia Lai ƀă Dak Lak, gá hiăng ton châ péa hơnăm, ôh tá bê tơmâng kuăn pơlê hiăng hên xôh tơpui tối troh khu râ kăn pơkuâ.

Môi hâi mơ’nui khế 4, ngin troh a ‘núa prêi ki vâi xo hmâng vâ Ƀuôn Ea Puk, cheăm Ea Sôr, tơring Ea Kar, kong pơlê Dak Lak. Akố, môi ‘núa prêi  kân rơdâ, châ rơpâu met khô̆i prêi châ tơkŭm pa kĭng troăng kân 29. A ‘núa prêi mê, ngế pơkuâ mơdró hiăng mơjiâng pro môi toăng hngêi vâ pơkuâ ngăn tơdroăng tê prêi, mâu ngế pêi cheăng xo prêi amê châ chât ngế. Pôa Hờ A Sủng, kăn pơlê Ƀuôn Ea Puk ăm ‘nâi, prêi ki ok amê hiăng” ai “sap ing hơnăm 2019 nah ƀă ing mê ai prêi kố hiăng pro tung pơlê chiâng ôh tá tơniăn. Xua hên rơxế kân prôk lăm, kơthung rơxế kân tơvâ tơvân, hên hâi prôk luâ chơ prêi hiăng pro tơ’nhiê troăng pơlê vâ prôk lăm ƀă tá troăng kân kơxô̆ 29, hên tíu ki ‘nâ hiăng tơ’nhiê ó chiâng kơhlong kơhlăng, tơ’lêi trâm tơdroăng xía vâ, pro kuăn pơlê chiâng tô tuăn ƀă hêng hôu khât:

“Kuăn pơlê hiăng tối hên ‘na tơdroăng ‘núa prêi. Rơxế kân chơ hên prêi hngăm, dâng 15-20 rơxế chơ prêi rêm hâi. Tung pơla chơ pro tơ’nhiê troăng ƀă hlối pro tơdroăng rêh ối dêi kuăn pơlê ngin chiâng ôh tá tơniăn - tơvâ tơvân hlo hên rơxế pơ’lok pơlâ, pro chiâng hêng hôu. Kuăn pơlê hiăng tối hên ăm mâu kăn cheăm, mâu kăn cheăm tối vâi hiăng tối ăm tơring, thế tơkôm tơring tơleăng mơnhên mê kuăn pơlê ôh tá ‘nâi”.

Prêi ki chiâ xo ôh tá tro luât kố hiăng hlo vâi ‘măn hmâng vâ amê hiăng ton châ 2 hơnăm

Pôa Hoàng Anh Dũng, Kăn phŏ hnê ngăn Vi ban cheăm Ea Sôr, tơring Ea Kar, ăm ‘nâi, kơpong ‘măn prêi ki xo hmâng vâ mê a ƀuôn Ea Puk cho dêi tơnêi 102, tung lơgât kơchuâ kơxô̆ 05 ai tâi tâng tơnêi mê vâ chê 13 rơpâu met karê. Tơnêi ki kố xua pôa Phan Đình Thái Anh (kot mâ hơnăm 1979, ối a bêng Thành Nhất, pơlê kong kơdrâm Ƀuôn Ma Thuôt) ngế ki xiâm. Pôa Hòang Anh Dũng tối, tâi tâng tơnêi ki ok pro tíu ‘măn prêi nôkố cho tơnêi pêi chiâk.

Cheăm tối kô cho tơdroăng pêi pro ki ôh tá tro ‘na tơdroăng xuá tơnêi. A khế 3 hơnăm 2020, cheăm Ea Sôr hiăng mơjiâng khu séa ngăn ƀă mơnhên ai dâng 10 rơpâu met khô̆i tơnêi prêi châ tơkŭm ok akố hmâng vâ. Cheăm hiăng thế râ tơring tơmâng rĕng tơleăng mơnhên:

“Tối ‘na hnoăng cheăng rak ngăn Tơnêi têa gá luâ tâ hnoăng cheăng kâ  cheăm. Cheăm xuân hiăng ai hlá mơ-eá pâ thế, thế ai kơvâ cheăng khu râ kơpêng hnê mơhno, veăng tơmâng tối mê nếo kâi vâ tơleăng tơpui klêi tơniăn tơdroăng mê”.

Chât toăng rơxế ki kân chơ prêi hngăm kơtâu pơ’lok pơ’lâ mot lo rêm hâi pro ôh tá tơniăn kuăn pơlê ƀuôn Ea Puk chiâng tô tuăn, hêng hôu

Tơdjâk troh tíu ‘măn prêi rơpâu met khô̆i ki xo hmâng vâ hmếo pơ hlo ai ôh tá xâu klâi, pakĭng troăng kân kơxô̆ 29, pôa Nguyễn Ngọc Duẩn, Ngế xiâm pơkuâ ƀơrô ngăn Tơmeăm khoăng ƀă hyôh kong prâi tơring Ea Kar, ăm ‘nâi, tơring nếo mơjiâng khu lăm séa ngăn dêi mâu kơvâ cheăng, cho mâu kơvâ cheăng ‘na liăn ngân, kŏng an, khu cheăng ‘na xo hnoăng mơhá vâ lăm ngăn tíu ‘măn prêi mê.

Rôh apoăng ăm ‘nâi, khu mơdró hiăng xúa tơnêi mê ôh tá tro tơdroăng. Ƀă xiâm prêi ki mê, klêi tâng tối dêi khu mơdró cho hiăng lăm xo chơ ing 2 to kong pơlê Phú Yên ƀă Gia Lai djâ troh akố. Khu râ kơvâ cheăng bú séa ngăn ing hlá mơ-eá chêh tối tơbleăng bro hnoăng mơhá, hâi teăm mơnhên khât ki vâ ‘nâi xiâm rêi xo prêi mê ki djâ tơkŭm ‘măn akố hôm tro luât há lơ ôh. ‘Na tơdroăng ti lâi tíu ‘măn prêi kân kŭn hmâng vâ mê khu râ kăn cheăm hiăng tối tơbleăng la xuân u ối sap ing hơnăm 2019 nah troh nôkô, pôa Duẩn tối, tơdroăng tơleăng mơnhên pơxâu phâk mâu tơdroăng xôi pro oh tá tro luât cho pá, xua ƀơrô cheăng ôh tá ai tŭm mơngế vâ pêi cheăng.

‘Na troăng hơlâ tơleăng pơxâu mâu tơdroăng xôi, pôa Duẩn ăm ‘nâi, tơring Ea Kar khŏm thế tơleăng mơnhên klêi ƀă khŏm thế khu ki mơdró prêi xo dêi prêi mê djâ tiú ê, vâ tơvêh tơnêi tíu ki mê môi tiah hdrối:

“Cho ‘nâng vâ tối akố cho xúa ôh tá tro tơdroăng. Klêi pơxâu phak ƀă liăn mê khŏm thế tơvêh tơnêi mê môi tiah apoăng. Pơtih prêi mê 3 rơpâu khô̆i mê tung pơla 30 hâi thế hiăng xo dêi tâi”.

Môi plông ‘măn prêi hmâng vâ troh rơpâu mêt khô̆i prêi, pakĭng troăng kân 29, rơxế kơtâu pơ’lok pơ’lâ  plâ, hên ngế hlo, hên ngế tối kuăn pơlê tối puk pâk, la plâ 2 hơnăm xuân hâi kâi tơleăng mơnhên klêi. Tơdroăng kố ăm hlo, tơdroăng rak ngăn tơnêi, tê mơdró tơmeăm khoăng tung tơnêi a kong pơlê kố cho môi tơdroăng hlo hâi kâi pêi pro. Mơni prêi ki xo hmâng vâ mê vâi hiăng pro ăm gá chiâng  prêi xo to tơdroăng vâ tê mơdró.

Công Bắc chêh

Gương tơplôu ƀă tơbleăng