VOV4.Sêdang - Hlo tơdroăng tâ tú rơ-iô dêi pơreăng COVID - 19, kơxê lơ 31/5 Vi ƀan pơlê kong kơdrâm Ƀuôn Ma Thuột, kong pơlê Dak Lak pơxiâm pêi tơdroăng pro tíu gak séa ngăn pơla rêm kơvâ cheăng a troăng kân Hồ Chí Minh ki tơkâ luâ kông 14 dêi cheăm Hòa Phú vâ hbrâ mơdât pơreăng COVID-19.

Tíu gak ngăn vâ hbrâ mơdât COVID-19 a troăng kân Hồ Chí Minh pơla ki tơkâ luâ kong pơlê Dak Lak châ pơxiâm pêi cheăng

Ing mê, pơxiâm a 17h kơxê lơ 31/5, mâu khu râ pơkuâ cheăng mê cho kan sát gak ngăn troăng prôk, kring tơniăng, khăm ngăn... a tiú tơkŭm gak ngăn, séa ngăn mâu ngế, rơxế ki tơkâ luâ, ki mot lo tung kong pơlê Dak Lak vâ mơdât ôh tá ăm pơreăng châ tâ tú: Séa ngăn tơdroăng râk vế, pêi pro tro tơdroăng hbrâ mơdât pơreăng (khăm ngăn châ hôm tô, truâ kên pâng môh rơkong, tối inâi tíu ối tơná, xếo kŏng ƀă têa pơkeăng kơdê pơreăng, xôh pơkeăng a mơngế ƀă rơxế ki tơkâ luâ tíu gak ngăn.

Pakĭng mê, séa ngăn, tí tăng mơnhên ngăn teăm châ ‘nâi ai ngế tâ pơreăng, mâu ngế ki nếo lo ing kơpong tâ pơreăng vâ pêi pro mâu tơdroăng klâ krê, pơlât tơdrêng tâng lơ ai.

Kong măng lơ 31/5, jâ H’Yim Kđoh, kăn phŏ hnê ngăn Vi ƀan kong pơlê Dak Lak xuân cho kăn phŏ pơkuâ Khu hnê mơhno cheăng hbrâ mơdât pơreăng COVID-19 dêi kong pơlê hiăng kĭ hlá mơéa tơbleăng mâu troăng hơlâ pêi pro tơdrêng ‘na hbrâ mơdât pơreăng COVID-19 drêng kong pơlê kố nếo ‘nâi ai ngế ki tâ COVID-19 má 4 a tơring Ea Hleo, ngế ki tâ kơxô̆ 7186.

Khu ngăn pơkeăng pơlê kong kơdrâm Ƀuôn Ma Thuột hnê tơmối chêh ối inâi tíu ối

Tiô hlá mơ-éa mê pơkâ, lâp pơlê kong kơdrâm Ƀuôn Ma Thuột pôi tá chiâng ăm phêp ối tơkŭm hên luâ 10 ngế a mâu tíu kâ, hngêi ôu kâ, tíu ki tê, ôu kơphế, tíu ki ôu têa ngeăm; kơpong xah hêi tơdjuôm. Pơtê pơtân mâu tíu tê mơdró tơmeăm kâ, ôu a kĭng troăng. Xuân tiô hlá mơ-éa kố, kuăn pơlê vêh lo ing kong pơlê ki ai pơreăng COVID-19 dế ôh tá tơniăn athế lăm hngêi pơkeăng cheăm tối ‘na ivá ki achê má môi pơklât thế ƀă châ hnê mơhno pêi pro klâ ối krê a hngêi tung pơla 21 hâi.

A tơring Ea Hleo pêi pro kơtăng mâu troăng hơlâ mơdât prôk, lo, klâ krê vâ hbrâ mơdât pơreăng pơxiâm sap ing 21 chôu 00 hâi lơ 31/5/2021 tá troh ai tơbleăng ki nếo.

Gương tơplôu ƀă tơbleăng