VOV4.Sêdang - Hâi lơ 14/3, a cheăm Ia Rvê, tơring Ea Súp, Khu pơkuâ Đoân droh rơtăm kong pơlê Dak Lak, Khu pơkuâ droh rơtăm Lâm Đồng ƀă Khu pơkuâ Đoân droh rơtăm Ea Súp tơrŭm tơkŭm po tơdroăng Khế pái tíu tơkăng kong hơnăm 2021 ƀă hên tơdroăng ki pơxúa. Tơdroăng tơkŭm po hên tơdroăng ki pơxúa, môi tiah: tơneăn kơxô̆ 41, chôu nhâng Um meăm tơbâ mâu ngế khên tơnôu Đông tíu tơkăng kong Ea Hleo, tơkŭm po Leh ‘mot 40 ngế đoân viên nếo a tơneăn. Khăm pơlât, hnê mơhno rak ngăn ivá, xing xoăng pơkeăng tê kơtê ăm 300 ngế kuăn pơlê ƀă diâp ăm 800 hlá kơ Tơnêi têa ăm mâu rơpŏng rêh ối achê tíu tơkăng kong.

Pơxiâm mơjiâng kơpong xah hêi ăm vâi hdrêng; pơcháu ăm troăng on tơhrik a troăng pơlê; phiu ro hiăng pêi kêi đeăng kơbong hriâm ăm hngêi trung mauh yăo ƀă pơxiâm mơjiâng pro hngêi tuăn pâ ăm rơpŏng pá puât.

Kăn teăng mâ khu pơkuâ Đoân droh rơtăm Lâm Đồng diâp hlá cơ tơnêi têa ăm cheăm Ia R'vê

Ngoh Y Lê Pas Tơr, Kăn phŏ pơkuâ hnê ngăn cheăng Đoân droh rơtăm kong pơlê Dak Lak tối ăm ‘nâi, kố cho tơdroăng vâ thăm mơnhông mâu tơdroăng Đoân droh rơtăm klăng Khế droh rơtăm, ing mê, mơnhông hiâm mơno djâ troăng ahdrối, pleăng hnoăng cheăng dêi khu tơrŭm cheăng, droh rơtăm tung tơdroăng tơmâng, rak ngăn troh tơdroăng rêh ối vâi krâ kuăn pơlê, droh rơtăm phô̆m xông kân a mâu tíu tơkăng kong pá puât.

A Sa Ly tơlôu ƀă tơbleăng