VOV4.Sêdang - Tơkâ luâ tơdroăng pá rôh apoăng, kơ’nâi lối 1 khế pêi pro tơdroăng kring gak vâ hbrâ mơdât COVID-19, kuăn pơlê a hên pơlê cheăm Čư Né, tơring Krông Ƀuk, kong pơlê Dak Lak hiăng ai tơdroăng pơ’lêh tơtro vâ rak tơniăn tung rêh ối, hmiân tuăn tung pêi chiâk deăng. Ối tơniăn tung hngêi, la báu alâi a klâng chiâk xuân xông ngiât lê̆m, mơnăn păn xuân piê lĕm kơnôm ai tơdroăng veăng kum ing mâu tôh tơplâ COVID-19 ƀă mâu droh rơtăm ki pleăng dêi hnoăng cheăng tơná.

Châ vêh dêi ngi hngêi klêi hâi khế pơlât COVID-19, nâ Ha Trâm Kpă, ối a ƀuôn Drao, cheăm Čư̆ Né, tơring Krông Ƀuk phiu ro xua hiăng pơlât prêi ƀă châ trâm dêi kuăn tơxĭn. Nâ H’Trâm tối, tung plâ 1 khế hdrối nah, sap ing 4 ngế tung môi rơpŏng hngêi tro tâ pơreăng, nâ préa ó khât. Tung pơla pơlât, maluâ hiăng châ mâu ƀok thái pơkeăng, mâu ngế cheăng ‘na khăm pơlât ƀă mâu ngế ki pleăng dêi hnoăng cheăng rak ngăn, tŏng kum krâu, la nâ H’Trâm xuân ối tơmiât troh mâu nhŏng o, rơpŏng hngêi ƀă mâu mơnăn păn drêng rơpŏng hngêi athế lăm klâ ối krê, khăm pơlât, pơlê cheăm mê tro mơdât mot lo.

“Tiah hmâ hlo, kuăn pơlê hmâ lăm a chiâk vâ tăng kế kâ ăm dêi rơpŏng hngêi, la pơreăng kố mê vâi ôh tá châ lo pa gong. Sap ing pơreăng xông tâ tú ó mê á ai séa ngăn a mâu trang măng Facebook xuân môi tiah mâu tơdroăng ki tối tơbleăng dêi tơring mê hlo ai hên mâu khu ki ai hiâm mơno tŏng kum xuân môi tiah tơnêi têa lăm tŏng kum ăm kuăn pơlê, ôh ti xê to mâu rơpŏng hngêi ki xơpá mê tâi tâng mâu rơpŏng ki ai ngế cho F0, F1 mê pơrá châ tơnêi têa kum”.

Mâu ngế ki pleăng dêi hnoăng cheăng tŏng kum rak ngăn vâi hdrêng ki ai nôu dế athế pơlât pơreăng COVID-19

Lối 1 khế tro mơdât mot lo, tơdroăng rêh ối dêi kuăn pơlê a cheăm Čư̆ Né chiâng hơ’lêh phá tơ-ê. Ƀuôn Drao ƀă Ktơng Drun, 440 rơpŏng kuăn pơlê mê ai troh 439 rơpŏng cho mâu ngế Rơđế, rêh ối kơnôm ing tơdroăng ki pêi chiâk deăng. Tung pơla kố dế cho rơnó krí mâu plâi kâ, mâu kế tơmeăm pêi lo ing chiâk deăng môi tiah poê báu, đôu alâi, krí plâi sầu riêng ƀă po nhâ kơphế. La xua pêi pro tơdroăng pơkâ hbrâ mơdât pơreăng, rêm ngế pơrá athế ối a hngêi. Mâu tơdroăng cheăng rak ngăn hdrê loăng pêt, mơnăn păn, krí xo kế tơmeăm ing chiâk deăng, roê kế tơmeăm xúa ki kal dêi vâi krâ nhŏng o pơrá châ mâu khu ki pleăng dêi hnoăng cheăng pêi kum ăm. Ngoh Y Bih Êban, ngế ki cheăng tung khu ki pleăng dêi hnoăng cheăng a ƀuôn Drao tối:

“Mâu tơdroăng cheăng tŏng kum tung kơpong tro mơdât mot lo mê cho rak ngăn mâu mơnăn mơnoâ, í peâp môi tiah lăm poê nhâ ăm ro, ăm í, chu, chó, miếo kâ lơ teăng ăm tơdroăng ki klâ ối krê la ôh tá ai kơbố ối a hngêi. Kum roê kế tơmeăm ăm kuăn pơlê tung kơpong ki tro mơdât mot lo, roê kế kâ ki kal mê khu ki pleăng dêi hnoăng cheăng kô lăm chiân troh a hngêi ăm kuăn pơlê. Drêng mâu khu ki ai hiâm mơno ƀă đoân viên tŏng kum ăm kế kâ, pơtih kơchâi plâi pôm maluâ kong hiăng măng mê mâu vâi ngoh, nâ xuân ối to rơxế pơchoh chêk, rơxế hon đa lăm troh a rêm hơlâ troăng tung pơlê vâ rĕng chiân ăm kuăn pơlê”.

Mâu ngế pleăng dêi hnoăng kum poê nhâ ƀă hlá ăm kơpôu, ro, chu kâ maluâ kong mêi khía ƀă troăng prôk trâp hliâk

Cheăm Čư̆ Né cho tíu ki ai pơreăng kân, ƀă vâ chê 300 ngế tâ COVID-19, tung mê hên má môi cho a 2 pơlê, ƀuôn Drao ƀă Ktơng Drun ƀă vâ chê 240 ngế tâ. Sap ing hâi lơ 22/8 troh nôkố lâp cheăm ai 17 to thôn, pơlê tro mơdât mot lo, 4 thôn, pơlê ki ê pêi pro tơdroăng ki klâ ối krê tiô pơkâ 16. Cheăm hiăng mơjiâng 21 khu ki pleăng dêi hnoăng ƀă tôh tơplâ COVID-19 pơlê pơla, kố cho khu ki rế pêi rế kum, rế cho tíu ki tơdjêp pơla kuăn pơlê ƀă khu kăn pơkuâ. Mâu ngế cheăng tung khu rêm đô̆i kô xo pêi mâu tơdroăng ki roê mâu kế tơmeăm kum ăm rêm rơpŏng, hbru kế tơmeăm ƀă kên pâng môh rơkong ăm kuăn pơlê; tơdjêp tŏng kum roê kế tơmeăm pêi lo ing chiâk deăng vâ kum kuăn pơlê châ liăn ing tơdroăng ki tê kế tơmeăm pêi lo ing chiâk.

Kum kuăn pơlê krí xo dêi kế tơmeăm pêi lo ing chiâk deăng

Mâu khu ki pleăng dêi hnoăng cheăng ƀă tôh tơplâ COVID-19 pơlê pơla xuân dế rak vế dêi hnoăng cheăng tŏng kum rak ngăn 6 ngế vâi hdrêng dêi mâu rơpŏng ki dế klâ ối krê tơkŭm lơ dế pơlât pơreăng COVID-19. Cheăm kum têa tôu ro, kế tơmeăm xúa ki ê, mâu ngế pleăng dêi hnoăng cheăng kô pơ’lêh dêi rơpó troh pế hmê kơchâi ăm mâu vâi muăn, kuăn cháu. Pôa Hoàng Văn Thịnh, kăn hnê ngăn Vi ƀan Măt trâ̆n tơnêi têa Việt Nam cheăm Čư̆ Né ăm ‘nâi:

“Klêi kơ’nâi cheăm Čư̆ Né nếo tro mơdât mot lo 2 – 3 hâi mê tâi tâng mâu khu ki ai hiâm mơno hơ-ui a kong pơlê Dak Lak pơrá hiăng troh tŏng kum ăm Čư̆ Né hên kế tơmeăm, malối tung mê ai mâu kế tơmeăm xúa tung khăm pơlât, rak tơniăn ăm mâu nhŏng o tung tôh pêi hnoăng cheăng hbrâ mơdât pơreăng xuân môi tiah hbru ăm vâi krâ nhŏng o kế tơmeăm, ôh tá lôi kơbố ki lâi tro kơklêa tro lôi pá rŏng. ‘Na tôh tơplâ COVID-19 pơlê pơla ƀă mâu khu droh rơtăm ki pleăng dêi hnoăng mê kơhnâ khât ƀă tơrŭm tung pêi pro hnoăng cheăng hbrâ mơdât pơreăng. Hên mâu droh rơtăm ki pleăng dêi hnoăng cheăng, tôh tơplâ COVID-19 pơlê pơla maluâ ai kuăn tơxĭn lơ troăng prôk pá puât la mâu vâi nâ o xuân ối kơhnâ kum kuăn pơlê tiô túa ki tơƀrê má môi”.

Kuăn pơlê rak ngăn mơnăn păn

Klêi kơ’nâi lối 1 khế klâ ối krê, tro mơdât mot lo klâ ối krê pơlê pơla vâ hbrâ mơdât pơreăng, mê troh nôkố, pơreăng a tíu ki ai hên ngế tâ cho cheăm Čư̆ Né hiăng châ hbrâ mơdât, ôh tá hlo ai ngế tâ ki xếo tung pơlê pơla. Khu kăn pơkuâ ƀă kuăn pơlê dế khŏm mơ-eăm vâ pơ’lêh mơngiơk trĭng kơpong ki ai pơreăng, rĕng châ hbrâ mơdât pơreăng, djâ tơdroăng rêh ối vêh tiah hmâ.

Katarina Nga tơplôu ƀă tơbleăng