VOV4.Sêdang - Klêi kơ’nâi 12 hơnăm tơkôm, kuăn pơlê a kơpong long têa Krông Pač thượng pơxiâm châ ‘mâi xĕn troh a tíu ối ki nếo. Rêm râ khu kăn pơkuâ dế tơkŭm pêi pro vâ rak tơniăn tơdroăng rêh ối, cheăng kâ ăm kuăn pơlê.

Rơpŏng jâ Ma Thị Sinh, ối a thôn 9, cheăm Čư San, tơring M’Drak cho môi tung mâu rơpŏng kơtiê a kơpong rơchôa  têa Krông Păč thượng xĕn troh a kơpong kuăn pơlê rêh ối kơxô̆ 1, cheăm Čư Ea Lang, tơring Ea Kar. Klêi kơ’nâi lối 1 măng tĭng, rơpŏng jâ dế châ khu râ kăn pơkuâ tŏng kum ‘na mơngế tơmeăm khoăng vâ pro kêi đeăng môi toăng hngêi trăng pro ƀă loăng, mơnât meăn ƀă kât.

Toăng hngêi châ mơjiâng a kơpong kân rơdâ, achê tơdế cheăm, ai troăng ƀê tông, têa krúa troh troh a hngêi. 3 ngế kuăn dêi jâ Sinh dế hriâm râ má môi ƀă mâuh yăo xuân hiăng pơxiâm hriâm a hngêi trung nếo, bu kơtăn hngêi tá hâi châ 500 met.  Tơdroăng rêh ối nếo cho tơ’lêi hlâu hên:

“Mâu tăm a cheăm tơmâng, tŏng kum rơpŏng mơjiâng pro hngêi, lâm kuâ hngêi, xoi tơmeăm troh a hngêi. Cheăm tơmâng tiah mê cho tơtro ‘nâng. Hngêi á ai 5 sao klâng, 5 sao chiâk deăng, mơni to lâi hâi á kô lăm pêi chiâk deăng tê’’.

Cheăm Čư Elang dế tơkŭm tŏng kum kuăn pơlê xĕn tíu ối nếo tơniăn tơdroăng rêh ối

Pôa Trần Văn Thanh, Kăn hnê ngăn Vi ƀan cheăm Čư Elang, tơring Ea Kar tối ăm ‘nâi, xêo troh mơ’nui khế 3, hiăng ai lối 20 rơpŏng kuăn pơlê xĕn troh kơpong rêh ối kơxô̆ 1 ối tung cheăm. Xua hiăng rơkê plĕng tung tŏng kum kuăn pơlê xĕn tíu ối nếo, xua mê, mâu khu cheăng dêi cheăm tơrŭm tơtro, xing xoăng  tơdroăng cheăng nhên ‘nâng. Cheăm rak tơniăn tâi tâng mâu rơpŏng troh tíu ối nếo pơrá châ tŏng kum tâi tâng tơmeăm khoăng vâ rĕng tơniăn ‘na tơdroăng rêh ối.

Ƀă mâu rơpŏng hiăng xĕn troh kơpong nếo, cheăm rak tơniăn ăm rêm rơpŏng châ xing xoăng 1 sao tơnêi ối, 5 sao tơnêi pêt báu ƀă 5 sao tơnêi pêi chiâk deăng, tiô tro troăng pơkâ pêi dêi kong pơlê pơla.  Tơdroăng pêi kâ tơ’lêi ăm vâi krâ drêng rơchôa têa Ea Rớt, môi rơchôa tung tơdroăng tơkêa bro rơchôa têa Krông Pač Thươ̆ng ối achê kơpong xĕn ối, kum ăm ai têa tôh loăng plâi tơniăn.

Tơdrêng amê hngêi trung hriâm ing mauh yăo troh râ má 1, má 2 achê kơpong xĕn ối nếo. Kố cho mâu  tơdroăng ki tơ’lêi vâ vâi krâ tơniăn tơdroăng rêh ối:

“Cheăm mơnhên kố cho hnoăng cheăng kal kí ki kal khât. Môi tiah pơkâ pêi apoăng mê kong pơlê xuân hiăng xing xoăng mơngế pêi cheăng vâ rak tơniăn drêng vâi krâ peăng tá troh ối mê tơniăn tơdroăng rêh ối, tơniăn kring vế, kơ’nâi mê cho tơniăn pêi kâ”.

Kơpong xĕn ối nếo tơbăng ƀă tơniăn tŭm tơdroăng ki kal tung rêh ối dêi kuăn pơlê

Tiô pơkâ, lối 700 rơpŏng kuăn pơlê ƀă vâ chê 4 rơpâu pơ’leăng mâ mơngế a 3 thôn 9, 10 ƀă 11, cheăm Čư San, tơring M’Drak kô châ xĕn ối troh kơpong pơlê nếo kơxô̆ 1 ối tung cheăm Čư Elang ƀă kơpong xĕn ối nếo kơxô̆ 2 ối tung cheăm Čư Bông, tơring Ea Kar vâ kum ăm  tơdroăng tơkêa bro rơchôa têa 4.400 rơtal liăn Krông Pač thượng, tơdroăng môi tuăn dêi kuăn pơlê tá hâi hên, xua mê bu ai 44 rơpŏng kĭ xĕn tíu ối nếo.

Troh  nôkố, ƀă  tơdroăng ki mơhnhôk dêi khu râ kăn pơkuâ ƀă mâu tơdroăng ki ai khât mâu rơpŏng kuăn pơlê xĕn ối tơniăn tơdroăng rêh ối tơtro tơniăn tâ a tíu ối ton, rơpŏng kĭ xĕn tíu ối nếo tâk vâ chê 200 rơpŏng. Pôa Nguyễn Đức Thảo, Kăn phŏ hnê ngăn Vi ƀan tơring M’Drak tối ăm ‘nâi, tơring dế pơtối mơhnhôk khu cheăng, rế tŏng kum xĕn tíu ối, rế mơhnhôk vâ kuăn pơlê môi tuăn, ƀă  tơdroăng mơ-eăm rĕng kêi đeăng hnoăng cheăng xĕn tíu ối nếo kơpong rơchôa têa Krông Pač thượng:

“Tung la ngiâ tơring kô pơtối thăm rĕng pêi pro tơdroăng chêl thiê̆n liăn, tăng tơnêi, mơhnhôk kuăn pơlê xĕn rêh ối tíu nếo. Ing tơdroăng xĕn ối mê tâi tâng mâu rơpŏng pơrá môi tuăn vâ vêh a kơpong xĕn tíu ối nếo ki kong pơlê, tơring hiăng tăng tíu ối”.

Công Bắc chêh

A Sa Ly tơplôu ƀă tơbleăng